На Тетово повторно му се заканува еколошка катастрофа. По одлуката на гостиварската локална самоуправа да ја затвори регионалната депонија Русино, Јавното комунално претпријатие „Тетово“ сметот го депонира во близина на Железничката станица во градот. Секој ден таму се оставаат од 70 до 100 тони смет.

- Ако не се реши проблемот, ситуацијата ќе излезе од контрола. Немаме друга алтернатива. Ако го носиме сметот во депонијата Дрисла, тоа е скапо и ќе треба да ставиме клуч на претпријатието, а работниците да ги пратиме дома - вели раководителот на Центарот за информирање и контрола во комуналното претпријатие, Љуљзим Шабани.

Локалната власт во Гостивар влезе во конфликт со Министерството за екологија поради затворањето на депонијата во месноста Русино. Засега нема докази дека се работи за политичка нетрпеливост или реваншизам, на ДУИ, чиј кандидат за градоначалник ја загуби битката од Руфи Османи, кој стана нов градоначалник на Гостивар.

Министерот за животна средина Неџати Јакупи, кој на локалните избори беше шеф на изборниот штаб на кандидатот за градоначалник од ДУИ, Невзат Бејта, најави казнени мерки за ваквата одлука на Општина Гостивар.

- Затворањето на депонијата ќе има негативно влијание врз Полошкиот регион. Ваквиот акт е во конфликт со законите, бидејќи станува збор за регионална депонија. Надлежно за затворање на депонијата е само Министерство за животна средина - информираат од тој ресор. Руфи Османи, пак, го обвини Министерството за контрадикторност.

- Министерството требало да ја затвори оваа депонија уште во 2007 година, кога биле констатирани неправилности. За нејзиното користење нема никаков правен акт и таа е дива. Заради непочитување на законите, државниот инспекторат против ЈКП „Тетово“ поведе прекршочна постапка во февруари 2008 година - објаснува Османи.Тој смета дека одлуката за затворање на депонијата е еден вид помош за забрзано решавање на проблемот.

Од ЈКП „Тетово“ потсетуваат дека никој освен Министерството не може да ја затвори депонијата, бидејќи таа е регионална и е наменета за сите девет општини од Полог.

- Депонијата во Русино е направена во согласност со националниот план за менаџирање со отпад. Таа ги задоволува стандардите за таков објект. Депонијата Мечкин Дол, каде што по затворањето на Русино гостиварци го носат сметот, не ги задоволува условите и е дива - вели Шабани.

Трајно решение за овој проблем е изградба на фабрика за рециклирање на отпад и изградба на регионална депонија, тврдат од Институтот за животна средина и здравје при Универзитетот на ЈИЕ во Тетово.

- Потребна е соработка меѓу локалната, централната власт и приватниот сектор. Таков проект трајно ќе го реши проблемот со депонирањето на комуналниот смет. Инвеститор од Германија беше заинтересиран да стапи во контакт со институциите за да изгради фабрика за рециклирање на смет, но проектот се изјалови поради нечија незаинтересираност - вели Вулнет Зенки од Институтот за животна средина и здравје.

Граѓаните што живеат во близина на дивата депонија во Тетово стравуваат од големото загадување, слично како пред неколку години, кога им се закануваше „еколошка бомба“. За загадувањата, тогашните раководители на ЈКП „Тетово“ заработија и кривични пријави. Како преодно решение, беше одлучено да се уреди простор на поранешен ископ на глина во месноста Русино, која е десетина километри оддалечена од Гостивар.

Коце, испразни ги контејнерите

Кејнерите кај Порта Буџаковец на булевар Партизански одреди секогаш се преполни

Грдите слики на контејнери, преполни со секаков вид отпад, веќе неколку недели наназад им бодат очи на скопјани и околу нив се шири неподнослива смрдеа. Контејнерите личат на ридови од ѓубре и воопшто не се гледаат од остатоците од сезонско овошје и зеленчук, пластични шишиња, картонски кутии, отпад од дворовите и од градежен шут, што се расфрла и по неколку метри околу нив. Градското комунално претпријатие, пак, се правда дека нонстоп се работи со вообичаеното темпо, ама не можеле да постигнат да го соберат зашто количеството ѓубре преку лето било дури двојно поголемо. Скопјани реагираат дека состојбата е веќе алармантна зашто поради недостигот од садови за смет, околу поставените контејнери и на најфреквентните места во градот постојано се создавале диви депонии, од кои во летниот период се шири многу непријатна миризба. Граѓаните се жалат дека смрдеата од преполните контејнери и од дивите депонии околу нив се шири и до нивните домови, па кога треба да го исфрлат ѓубрето, дополнителен проблем е што мораат буквално да газат низ купиштата смет за да стигнат до контејнерот, или се принудени да го фрлаат на веќе создадената депонија. - Само два контејнери се премалку за да се собере ѓубрето од толку многу жители во овој дел, а депонијата е токму до маркет за прехранбени производи, амбуланта и до училишниот двор - реагира Марина од Ѓорче Петров 2, која е револтирана од тоа што секојдневно минува до купиштата смет на главната маалска улица, во близина до маркетот на „Жито Вардар“. Нејзиното семејство е принудено да седи дома со затворени врати и прозорци и кога е најжешко, затоа што неподносливата миризба се шири од контејнерите, кои се само на неколку метри од нивната куќа. Таа очекува барем преку лето, кога како последица на топлото време отпадот забрзано скапува, комуналците да реагираат побрзо, а не, како што вели, да доаѓаат на неколку дена. Од ЈП „Комунална хигиена“, како надлежно комунално претпријатие за собирање отпад, велат дека работат со ист интензитет како и во текот на целата година, но проблемот бил во тоа што во лето дневното количество отпад било многу поголемо од обично. - Во еден летен ден нашите екипи собираат приближно 500 тони отпад, што во споредба со другите годишни времиња е значително поголемо количество. Проблеми ни создаваат и дивите депонии што се создаваат во Лисиче, Ѓорче Петров и во Кисела Вода, каде што кантите за смет, наместо со отпад од домаќинството, луѓето ги полнат со градежен шут или со отпадоци од нивните дворови “ вели Катерина Лаова, портпаролка на ЈП „Комунална хигиена“. Од ова јавно претпријатие објаснуваат дека недостигот од контејнери за собирање отпад најмногу се забележувал во лето. Според нив, за да се намали создавањето на дивите депонии околу контејнерите, но и на места каде што воопшто не се поставени садови за собирање смет, нивниот број треба барем двојно да се зголеми.