Австралијци ќе бараат злато во Кратово

Австралиската „Џенесис ресорсес“ учествува во проектот со 62 процента

Миркица Поповиќ

Австралиска компанија ќе бара злато во Македонија. Имено, компанијата од Австралија „Џенесис ресорсес“ најавила активно продолжување на работата на рудникот „Плавица“ во Македонија. Ова го објави грчкиот бизнис-портал „ЕМЕА бизнис монитор“. Оваа важна инвестиција, која за нас речиси непознатата австралиска компанија ја почна уште летото 2007 година, се однесува на проект за ископување злато и бакарна руда на територијата на нашата земја.

Ова е заеднички проект на австралиската компанија и македонската групацијата „Силекс“. „Џенесис ресорсес“, која се занимава со истражување и развој на рудници за минерали и природни богатства, учествува во проектот со 62 отсто.

Ископувањето се планира да се изведе во рудникот „Плавица“ во Кратовскиот регион, на оддалеченост од 65 километри од Скопје, за кој се смета дека изобилува со злато и бакарна руда.

Во регионот немало ископувања на злато уште од 1930 година. Покрај проектот во Македонија, „Џенерал ресорсес“ е фокусирана и на испитување извори на манган и на железо во Австралија.

Во „Силекс“ велат дека соработката и заедничките истражувања со австралиската компанија траат повеќе години.

„Имаме обезбедено концесија за овој рудник, кој е интересно наоѓалиште за злато и на бакарна руда. Сепак, потребно е уште повеќе да се истражува и да се вршат испитувања пред да почне ископувањето“, изјави директорот на рудникот, Васил Ристовски.

Според Интернет-страницата на австралиската компанија, за проектот во „Плавица“ се обезбедени две дозволи за истражувања, кои покриваат површина од повеќе од 200 квадратни метри, и тоа кај Карпатскиот вулкански лак, голема епитермална област што поминува низ Источна Европа и се смета за лежиште на злато, бакарна руда и сребрени минерали.

Во оваа област во римско време имало топилница за злато и се изработувале монети и разни други предмети, а исто така се вршеле и подземни минирања од британски рударски компании. Во поново време, рудникот „Плавица“ бил предмет на анализи и истражувања од страна на поранешната југословенска влада, потоа водечката рударска компанија „Рио тинто“ и „Европски минерали“, кои само го потврдиле потенцијалот за рудни богатства на оваа област.

Сепак, од „Џенесис ресорсес“ сметаат дека нема конечни заклучоци од истражувањата на овој регион, бидејќи засега се направени само четириаголни дупки и многу од нив не се испитани. Врз основа на ова, австралиската компанија смета дека досегашната работа нема обезбедено соодветни тестирања на минерализираната структура што се верува дека постои во рудникот.

Според наведениот проект на веб-страницата на „Џенесис“, компанијата почнала целосен преглед на опширната база на податоци за досегашните испитувања на рудникот. Компанијата планира да ги искористи податоците за идентификување блиски цели за дупчење кои ќе го тестираат потенцијалот за висококвалитетни разграничени ресурси на злато и бакарна руда.

Странските сопственици на рудниците во земјава планираат да вложат околу 30 милиони евра за подобрување на производството и на условите за работа. На тоа ги поттикна поволната клима најавена со зголемените цени на рудите и на минералите на светските берзи и постепеното зголемување на побарувачката кај преработувачите. - Во наредните пет години рудниците планираат да инвестираат околу 30 милиони евра за обнова на техниката и на опремата, но и за истражување на потенцијалните наоѓалишта - вели Николајчо Николов, претседател на Асоцијацијата на рудари на Македонија. Тоа, според него, ќе овозможи рудниците поуспешно да се вклопат во светските трендови на пораст на цените и на побарувачката. Рудникот „Бучим“, според податоците со кои располага Асоцијацијата, планира да инвестира пет милиони евра во опрема и во обнова на техниката. Во рудникот „Саса“ се планира инвестиција од 2,5 милиона евра кои главно ќе бидат насочени кон истражување нови наоѓалишта. Во „Злетово“ и „Тораница“ се планира инвестиција од 2,9 милиона евра за стабилизирање на ходниците и за подготовка на истражувања на нови наоѓалишта. „Фенимак“ планира инвестиција од 20 милиони евра за подобрување на производството. Од Синдикатот на индустрија, рударство и енергетика (СИРЕ) велат дека е добро што рудниците планираат инвестиции за обнова на опремата и на техниката, кои ќе овозможат вработување на поголем број рудари, а за работниците е мошне важно да се инвестира во рударската инфраструктура. - Инвестирањето во безбедноста на рудниците не го сметаме како посебна инвестиција. Во овој дел секојдневно мора да се инвестира за да не се случуваат немили настани како тие што ги имавме неодамна во неколку рудници и - и“вели Маре Анчевска, генерална секретарка на СИРЕ. Од рудниците се жалат дека тешко доаѓаат до концесии за експлоатација на нови наоѓалишта бидејќи постапката е многу долга. - Побаравме од Министерството за економија да се забрза процесот на давање концесии за нови истражни дејства, што ќе овозможи и побрз процес на експлоатација на рудата и“вели Николов.

Интензивно се трага по рудата габро

Интензивно продолжува потрагата по рудата габро кај рудникот во кочанското село Пантелеј. Расположивата механизација со која се врши ископот на теренот го прошири атарот на ископ и се очекува да се стигне подлабоко во земјата каде што се наоѓа жицата од рудата габро.

Станува збор за руда барана на светскиот пазар по многу висока цена, која спаѓа меѓу ретките руди во светот.