Скопски сообраќај (општо)

Средствата во буџетот на град Скопје предвидени за трамвај, најверојатно, ќе се намалат за околу 400 милиони денари, односно ќе останат пари само за ревизија и за консултанти за проектот. Со ребалансот, кој градоначалникот Коце Трајановски го предложи до советниците за наредната седница, ставките за трамвајско депо, изградба на шини и трафостаница, како и за кредити целосно се бришат. Остануваат само 42 милиони денари за проект, ревизија и за консултанти за трамвај. Вкупниот буџет на Скопје се намалува за околу пет милијарди денари. Од Град Скопје велат дека не се откажуваат од проектот, но се уште го разгледуваат како можност. - Ребалансот е направен бидејќи буџетот не одговара на реалната состојба, туку е предимензиониран. Намалени се средствата во повеќе ставки кои биле нереално планирани. Проектот за трамвај се уште се еволуира од страна на градоначалникот. Тој влегува во ребалансот, но со оглед на тоа што е вклучен и во програмата за работа за периодот од 2009 до 2011 година, сепак не може да се каже дека градоначалникот се откажал од него “ вели Неделчо Крстевски, портпарол во Град Скопје. Меѓу проектите со скратени средства се и проектите за Илинденска, за која наместо предвидените 120 остануваат 40 милиони денари, плоштадот на кејот Димитар Влахов, поточно околу црквата „Раѓање на Пресвета Богородица“, реконструкција на улици, а целосно се бришат ставките за изградба на првата фаза од булеварот Гологанов и за тротоари. Четирикратно се намалува и сумата за набавка на опрема за сообраќајници, а ќе се зголемат средствата за клучката Бит-пазар и за булеварот Гоце Делчев. - Илинденска се наоѓа во програмата на градоначалникот и ќе се реализира, а овие средства во буџетот се за проектирање, не за нејзина изведба. За проектите на градоначалникот немаше изработени изведбени проекти, а и доколку има нешто, тоа е на база на идеен проект “ вели Крстевски. Во програмата на Градот за следните три години остануваат проектите за обнова на првиот и на вториот дел од Градски парк, регулација на Вардар во близина на изворот Рашче, систем за одведување отпадни води во општина Аеродром и Центарот за управување и контрола на сообраќајот. Со предлогот на градоначалникот трошоците за работа на градската администрација, во делот за снимање на ТВ-емисии и кампањи за промоција на нивната работа, ќе се намалат. Парите за проектите на „Паркови и зеленило“ за цветни знамиња, хортикултурниот проект за аквадуктот, уредувањето за новиот театар и висечките жардиниери на канделабрите се бришат, а се намалува и сумата за обнова на градското зеленило. Отпаѓаат и реализацијата на патеката „Виа ферата“ за екстремно планинарење на Матка, уредување на пештерата Дона Дука во Сарај и за природно-научниот музеј и спасителната станица во кањонот. Се намалуваат и ставките за изградба и обнова на Зоолошката градина со буџетски пари.

Бескрајни редици автомобили, турканици и нервози на секоја пофреквентна крстосница се секојдневие за скопјани, кои по половина час и повеќе патуваат од поблиските населби до центарот на градот. Проблемите со сообраќајниот хаос не се ниту нови, ниту непознати, но нивното разрешување со години тапка в место. Најголемиот метеж се случува на крстосницата на Илинденска, мостот „Гоце Делчев“, кај Судска палата, на булеварот Свети Климент Охридски, Партизанска, кај Железничка станица, пред Народна банки, кај Стара рампа во Кисела Вода, на крстосницата кај „Тутунски комбинат“ и на други локации. Сообраќајните инженери посочуваат дека денес во светот е тренд крстосниците да се решаваат со кружен тек. Според нив, кружните текови не предизвикуваат застој и чекања на семафори, со тоа се намалува и загадувањето на воздухот, но и потрошувачката на граѓаните кои ги користат автомобилите. - Во одделни земји, особено во западна Европа, се промовира како добро решение зашто се елиминира семафоризацијата, а и протекот на возила е поголем. Но мора да се има предвид дека ваквото решение важи само за определен број возила. На пример, ако протекот е од 900 до 1.000 возила на час и притоа на кружниот тек се вкрстува широка улица со три ленти, во таква ситуација ќе се создаде метеж и ќе мора да се постави семафор “ смета Никола Крстаноски, професор на отсекот сообраќај и транспорт на битолскиот Технички факултет. Според него, ваквите решенија треба да се проектираат внимателно и посебно да се внимава на радиусот на кругот и приодите. - Ги поддржувам овие решенија затоа што имаат многу предности, па дури има и истражувања кои покажуваат дека се добри од визуелен аспект, бидејќи кога ќе се приближат возачите, автоматски ја намалуваат брзината затоа што мора да свртат, а со тоа се намалува и опасноста од сообраќајни несреќи. Сообраќајниот дел не е скапа инвестиција, но проблем кај нас е што немаме катастар за подземните инсталации, па преместувањето на цевки дополнително чини пари и време “ додава Крстаноски. Последни локации за кои се споменуваше изградба на кружен тек во градот се крстосницата кај црквата „Светите Петар и Павле“ во Ѓорче Петров и Католичката црква во Капиштец. Во првиот случај, каде што се вкрстуваат пет улици, општинските власти најавија дека е во тек тендер за изработка на идејно решение. За вториот случај, со смена на власта и доаѓањето на нов градоначалник, се променија и најавите од почетокот на годинава кога властите велеа дека проектот за идејно решение е готов, па ќе распишат тендер за основен проект. - Во програмата на градоначалникот Коце Трајановски е предвиденопроширување на булеварот Теодосиј Гологанов. Во моментов се подготвуваидејно решение кое најдобро ќе покаже како треба да се реши проблемот сорегулацијата на оваа фреквентна сообраќајница “ соопштија од Град Скопје, без да одговорат јасно дали се откажале од идејата за кружен тек кај црквата. Кружниот тек како сообраќајно решение се користи и во Тетово, Охрид, Штип, а надвор од земјава доста се применува во Словенија, Софија, Белград, Букурешт, Франција, Шпанија, Австрија. Во арапските земји е особено популарен, како на пример во Египет, каде што најголем дел од сообраќајниците се решаваат на овој начин.

Градот прави проект за кружен тек на булевар Македонска војска

Со идејниот проект, кој во моментов го работат во Градот, треба да се изгради кружен тек за регулирање на сообраќајот на новоизградената прва делница од булеварот Македонска војска, но, како што велат градските власти, сe уште не е прецизирано како ќе се изведе тоа

Во населбата Мичурин, на улицата "Венијамин Мачуковски" започна да се поставува и вториот асфалтен слој. Улицата ќе се асфалтира во должина од околу 350 метри и широчина од 7 метри. Градежните активности ги изведува фирмата "Урбан инвест", а средствата се обезбедени од Буџетот на Општина Аеродром. Асфалтирањето на улицата, се очекува да заврши до крајот на неделата доколку не се променат временските услови.

Од Општина Аеродром, апелираат до жителите и до посетителите на Мичурин да не ги паркираат своите возила во близина на местата каде што се работи, со што ќе овозможат градежните активности да се изведуваат со поголем интензитет. Во спротивно, возилата паркирани на локациите каде што се извршуваат градежни работи ќе бидат подигнати од страна на пајак-службата на Град Скопје.

Изградбата на тунелот под Кале, кој би продолжувал со мост преку Вардар и би ги споил северниот и јужниот дел на Скопје, остана како подзаборавена идеја од Генералниот урбанистички план која ниедна власт досега не ја реализираше. Проектот предвидуваше да се продолжи булеварот Свети Климент Охридски покрај зградата на Владата, па преку мост да поминува и да ја сече улицата Лазар Личеновски под Калето за да влезе во тунел под тврдината. Излезот на тунелот е замислен кај булеварот Никола Карев, односно улицата позната како пластичарска. Идејата била на тој начин да се добие директна и најкуса врска на центарот на градот со северните населби Скопје Север, Бутел, Шуто Оризари. Познавачите на оваа проблематика велат дека проектот стар повеќе од педесет години, би бил клучно решение за сообраќајниот хаос во главниот град, кој со текот на времето станува се поголем проблем. - Според идејата, тунелот би имал должина од околу два километри и висина од 5,5 метри. Земјиштето под Калето е меко бидејќи се работи за седиментна карпа, која лесно може да се пробуши и поради тоа нема да има поголем проблем во изградбата. Кога се градеше американската амбасада, се постави прашањето дали проектот е изводлив, но потоа се утврди дека правецот на тунелот не поминува под овој објект, туку е на растојание од два до три километри “ вели Благој Гајдов, градежен инженер. Продолжението на булеварот е замислено со два коловози, колку што има и сегашното решение, а на излезот кај Лазар Личеновски, според Гајдов, се предлага да се направи надвозник кој ќе го премости тунелот и ќе обезбеди непрекинат тек на улицата. Единствена пречка би се појавила во делот каде што излегува тунелот и каде што ќе мора да се урнат неколку приватни објекти. Гајдов потсетува дека идејата за тунел под Кале и пробивање на булеварот Свети Климент Охридски постоела уште во 1955 година, кога негов колега бранел дипломска работа на истата тема на Градежниот факултет. Според него, главната придобивка од реализацијата на проектот е растоварување на целиот сообраќај кој минува преку Бит-пазар, а особено метежот на крстосницата кај Судска палата, каде што е проценето дека дневно поминуваат и повеќе од 86.000 возила. - Пред седум години на правецот на булеварот нелегално почна да се гради објект. Тогашните власти издадоа локација за магацин со управна зграда на претпријатието „Рудине“, на левата страна на Вардар. И покрај пријавите за стопирање на изградбата, таа упорно се градеше без некој да ја санкционира, за најпосле во 2003 година Републичката градежна инспекција да донесе решение за нејзино уривање. Уривањето на таа зграда ја водев јас, со тоа што сите столбови се скратени за 80 сантиметри и сите железа се исечени “ раскажува Гајдов. Пред пет години тогашните градски власти на трибина за решавање на примарната сообраќајна мрежа во градот ја разгледуваа оваа идеја. Тогаш беа направени пресметки дека за нејзина реализација би биле потребни околу 16 милиони евра. Во Град Скопје потврдија дека во актуелниот ГУП постои коридор под Кале, како можно сообраќајно решение за поврзување на булеварите Свети Климент Охридски и Никола Карев. Но, сепак, во програмата на градоначалникот Коце Трајановски овој проект не е влезен, што значи тунелот најверојатно ќе биде прескокнат и од оваа градска гарнитура.