Урбанистички планови и парцели (општо)

Скопската Општина Карпош нема да почне со никакво уривање на Шпанско село, поради тоа што за овој локалитет од Општината се чека изработката на Генералниот урбанистички план кој дополнително треба да се донесе. Инаку, Општината Карпош издвоила 3 милиони денари буџетски средства, распиша тендер и избра фирма за уривање на нелегално изградените објекти. Оваа акција започнува за десетина дена. Станува збор за акција за уривање на дивоградбите на територијата на цела Општина Карпош, а не на Шпанско село. Што се однесува на тој локалитет таму нема да се дозволуваат градби на нови објекти се до донесување на Генералниот урбанистички план.

Дозволени надградби на зградите во Аеродром

Три урбанистички плана беа усвоени на последната седница на Советот на Аеродром. Се работи за локалитетите Црква - урбана единица А, Реонски центар - урбана единица А и локалитет Јане Сандански - урбана единица А. Овие планови претходниот Совет на Аеродром ги кочеше, односно не ги изгласуваше две години, додека градоначалник беше Кирил Тодоровски. Советниците од опозицијата завчера негодуваа што плановите им беа поделени пред почетокот на седницата и коментираа дека немаат време да ги разгледаат измените и да расправаат за нив на ниво на координација, но мнозинството од ВМРО-ДПМНЕ ги усвои.

Планот за локалитетот Црква се однесува за реонот околу поликлиниката „Јане Сандански“. Со овој план се официјализира постоењето на црквата „Свети Пророк Илија“, која веќе е изградена. Во планот за дел од населбата Јане Сандански се предвидува височина на објектите од два до 15 ката. Од забелешките од граѓаните на јавната анкета може да се види дека на многу згради со планот е дозволена изградба на потпокриви на зградите. Со планот за Реонски центар се дава можност за изградба на нови 12-катници со потпокриви, како и подземна катна гаража. Ќе се градат и киосци по должина на булеварот Видое Смилевски-Бато.

Пред неколку месеци Општината донесе Правилник за поставување на типски киосци на територијата на Аеродром. Со неа, како што објасни градоначалникот Ивица Коневски, точно се знаат локациите на сите трафики, како и нивната квадратура. Предвидено е сите да имаат типски изглед, со максимална висина на венец од 3,5 метри. На хартија не се дозволени надградби, доградби и други надворешни и внатрешни интервенции на трафиките, но дали тоа ќе се почитува и на терен, допрва ќе се види.

Со цел создавање на можност за поефикасно уредување на просторот се воведуваат два нови инструменти во планирањето - државна и локална урбанистичка планска документација, Со државна урбанистичка планска документација се овозможува уредување на просторот преку оформување на  градежна парцела во и вон планските опфати, доколку истата не е формирана, како и во рамки на формирана градежна парцела заради усогласување на површината за градење и максималната височина на градбата со стандардите и нормативите за урбанистичко планирање, за градби од прва и втора категорија како градби од значење за Република Македонија.

Додека со  локалната урбанистичка планска документација, се овозможува општините самостојно да го уредуваат просторот, без учество на централната државна власт во постапката, односно се овозможува општините да го уредуваат просторот преку оформување на  градежна парцела во и вон планските опфати, доколку истата не е формирана како и во рамки на формирана градежна парцела, заради усогласување на површината за градење и максималната височина на градбата со стандардите и нормативите за урбанистичко планирање, за градби од трета, четврта и петта категорија како градби од значење за единиците на локална самоуправа. Исто така се предвидува можност повеќе општини заради реализација на соодветен проект од заеднички интерес преку оваа планска документација, да го уредуваат просторот.

Една од новините која се воведува е изработка на планска програма со која се предвидува урбанистичките планови, државната и локалната урбанистичка планска документација да се изработуваат врз основа на  програма со која ќе се утврдува границата и содржината на планскиот опфат.
 
Со законот исто така, е пропишана измена во постапката за донесување на урбанистички планови, во делот на давање Мислење на нацрт-плановите, при што се предвидува мислењето кое сега го издава министерството за транспорт и врски, да го дава комисија формирана од страна на градоначалниците на општините и градоначалникот на Градот Скопје. Оваа измена е во насока на процесот на децентрализација со која ќе се овозможи поголема самостојност на општините во урбанистичкото планирање.

Во основното училиште "Ѓорѓија Пулевски" во општина Аеродром од утре па до 20 август ќе се одржи јавна презентација и анкета на Деталниот урбанистички план за локалитетот "Јане Сандански" Урбана единица В. Од општина Аеродром соопштија дека, во рок од 10 работни дена, секој работен ден од 12 до 19 часот во основното училиште "Ѓорѓија Пулевски" ќе се одржува јавна анкета за Нацртот на Деталниот урбанистички план.

Во тој период, Деталниот урбанистички план ќе биде изложен во просториите на основното училиште и за време на јавната анкета граѓаните ќе можат да ги изнесуваат своите забелешки преку анкетни листови. Анкетните листови за учество во јавната анкета може да се добијат во просториите на училиштето, кај надлежното лице.

Во определениот рок заинтересираните правни и физички лица од конкретното подрачје исто така ќе можат да достават писмени забелешки, предлози и мислења на анкетните листови. Пополнувањето на анкетните листови се врши лично, при што граѓаните треба да покажат документ за идентификација.

Во текот на јавната анкета во училиштето ќе има претставници од општината и други стручни лица, од кои граѓаните ќе можат да добијат подетални информации во врска со Деталниот урбанистички план.

Јавната презентација ќе се одржи на 12 август во 17 часот и 30 минути во просториите на основното училиште "Ѓорѓија Пулевски". Нацртот на Деталниот урбанистички план за локалитетот "Јане Сандански" Урбана единица В опфаќа 15,5 хектари и со него се предвидени површини за семејно домување во станбени згради, за образование и наука, комерцијални и деловни објекти, како и зеленило и рекреација.

Нова црква покрај Пресвета Богородица

Владата нарачала нов ДУП, според кој во тој дел на градот треба да никнат и плоштад, уште еден мост на реката Вардар, понирачка улица, резиденција на македонскиот архиепископ, библиотека, трговски центар и објект за државни службеници

Уште една црква, посветена на светецот Мина, ќе се гради во околината на „Пресвета Богородица“, заштитничката на Скопје, ако советниците на Општина Центар ги прифатат измените на овој дел од детаљниот урбанистички план. Според проектанското биро ИНПУМА, Општина Центар уште планира да гради и плоштад, уште еден мост на реката Вардар, понирачка улица, резиденција на македонскиот архиепископ, библиотека, трговски центар, објект за државни службеници и два сплава на реката Вардар. Целиот план е по нарачка на Владата и, според презентерот Благоја Тагасовски, го опфаќа само делот околу црквата, но не и делот кај адвокатската уличка и основното училиште „Св. Кирил и Методиј“.

На јавната презентација, освен претставник од Општината и една адвокатка, која се надеваше оти планот ќе ја опфати и адвокатската уличка, немаше ниту еден заинтересиран скопјанец.

Тагасовски, проектант од ИНПУМА, изјави дека, иако сега нема јавна презентација, тие работат и на делот од ДУП што ја опфаќа и адвокатската улица, но тој план ќе се презентира дополнително. Таканаречената адвокатска уличка и делот на кој ќе има верски центар ќе ги дели само една пешачка патека. Според стариот урбанистички план, во тој дел треба да минува сообраќајница и планирани се станбени и деловни објекти. На делот кај црквата „Пресвета Богородица“ требаше да се гради цел црковен комплекс, со камбанарија, музеј и зграда на Синодот и дом за студентите од Теолошкиот факултет.

Со новите измени, пропаѓаат плановите предвидени со стариот ДУП, на тој дел да се градат образовни и верски објекти, катна гаража, фискултурна сала, два споменика - едниот за свети Мина, другиот за архиепископот Доситеј, катна гаража... Во следните две недели граѓаните ќе може да поднесуваат свои забелешки, сугестии и предлози за планот. Неговата нацрт-верзија е изложена во основното училиште Св. „Кирил и Методиј“.