Црква на Плоштад Македонија

Црквата на Груевски стана политички проблем

И вчера не беше објавен меѓународниот конкурс за изработка на идејно решение за црквата

ГРАЃАНИТЕ ВОЗБУДЕНИ ОД НАЈАВАТА ЗА ХРАМ НА ПЛОШТАДОТ

Интернет-петиција против владината црква

Авторите на петицијата сметаат дека одлуката е упад воестетиката на центарот на градот и дека државните пари се многу повеќе потребни во други општествени сфери

Дел од граѓаните на Скопје од вчера со интернет-петиција се обидуваат да ја спречат изградбата на црква на плоштадот Македонија, на местото меѓу стоковната куќа „Типо“ и ресторанот „Дал-мет-фу“, пред објектот „Лумикс“. Од утрото до 13.30 часот беа собрани над 520 потписи.

- Го даваме својот глас против идејата на Владата за изградба на црква на плоштадот, поради тоа што оваа идеја е уште еден упад во естетиката и урбанистичката рационалност на централното градско јадро, поради тоа што постојат други сфери каде што повеќе се потребни јавните пари. Против сме затоа што Црквата е уставно одвоена од државата, како и поради рамноправност на сите верски заедници во Македонија. Ние немаме намера да ги навредиме религиозните чувства на нашите сограѓани - се вели во уводот на петицијата, на веб-страницата www.petitiononline.com.

Својот негативен став околу оваа намера на Владата го искажаа и дел од архитектите и стручните лица, потенцирајќи дека просторот не соодветствува за таква градба, за која воопшто и нема маркица во детаљниот урбанистички план за Малиот ринг.

Владиниот портпарол Ивица Боцевски вчера негираше дека црквата ќе биде висока 30 метри, а нејзината камбанарија ќе достигне и до 50 метри, како што објавија некои од медиумите.

- Проектот му е доверен на Министерството за култура, кое треба да распише меѓународен конкурс за идејно решение. Се' додека не се добијат резултатите од тој конкурс, ние не можеме ништо да прејудицираме. Владата донесе одлука што едногласно е прифатена и која ќе се реализира - вели Боцевски. Од друга страна, Александар Ѓорѓиев, одговорен за односи со јавноста во Министерството за култура, потврди дека црквата ќе биде висока 33,5 метри, а камбанаријата ќе биде посебна и ќе достигне височина од 50 метри.

- Министерството треба да ја реализира владината одлука за црквата, која и официјално треба да ја прифати, со тоа што ќе биде потпишана од министерот Арификмет Џемаили - вели Ѓорѓиев.

Одлуката во текот на вчерашниот ден не беше потпишана од министерот, бидејќи тој бил зафатен надвор од Скопје. Во Министерството велат дека одлуката наскоро ќе го добие потребниот потпис, по што ќе биде распишан и меѓународниот конкурс, кој ќе трае 52 дена. Во врска со информациите дека црквата можеби ќе се вика „Свети Никола“ и дека нема да го добие името на светите Константин и Елена, како некогашната црква на плоштадот, од Скопската епархија велат дека тоа се само нагаѓања.

- Засега се' уште не сме одлучиле како ќе се вика. Епархискиот Управен одбор како највисок орган, со надлежниот архијереј ќе одлучат за тоа како ќе се вика црквата. Се' додека не се дефинираат заедничките ставови и на Епархијата и на Владата, не може да се каже ништо. Тоа дека црквата ќе се вика „Свети Никола“ или не знам како, се само нагаѓања - вели прота Коста Станоевски, секретар на Скопската епархија.

Анела Петрова