Црква на Плоштад Македонија

Капиталните цркви се граделе во средновековието

„Нотр Дам“ во Париз почна да се гради во 12 век на остров во Сена

Историските записи сведочат дека најпрвин се градел верскиот објект, па околу него сите други градби

Главниот аргумент на премиерот Никола Груевски во прилог на идејата за изградба на црква во центарот на градот е дека сите светски метрополи имаат плоштади со цркви. Податоците говорат дека сите религиски објекти во светските метрополи се изградени во средновековието или во други дамнешни времиња кога црквата била една од главните фактори во социјалниот и во политичкиот живот на граѓаните. И покрај многубројните забелешки, премиерот не се откажува од замислата.

„Во повеќето големи градови, а особено во главните градови и во православните, и во католичките, и во протестантските земји има вакви објекти на самите плоштади“, изјави Груевски во интервјуто за МИА, осудувајќи ја како погрешна тезата на опозиционерите дека црквата не треба.

Историските записи сведочат дека се' до средновековието, кога црквата била доминантна институција, најпрвин се градел верскиот објект, па околу него сите други градби.

Првата локација која премиерот ја зеде за пример е Црвениот плоштад во Москва. Катедралната црква на овој плоштад позната по своите блескави шарени кубиња, посветена на св. Василиј, никнала во 1561 година, а изградбата почнала во 1555 година по иницијатива на царот Иван Четврти, познат во историјата како Иван Грозни. Како главен повод за изградба на овој капитален објект било заробувањето на варваринот Казан.

Премиерот, исто така, го споменува Париз како пример. Градот на светлината првпат бил прогласен за главен град по ослободувањето од римската окупација, откако кралот Кловис Први ја подигнал катедралата околу која се конструирал другиот дел од современ Париз. Во денешно време најзабележителен верски објект во Париз е катедралата „Нотр-Дам“, која не е изградена во центарот на градот, туку се наоѓа на остров во Сена. Катедралата почнала со изградба во 12 век.

Блескавата катедрала посветена на Богородица на Стариот плоштад во Прага е изградена во 14 век, на местото каде што претходно веќе имало мала црква. На прочуениот плоштад „Гранд плас“ во Брисел нема црква. Кулата што ја гледаме секојдневно на телевизиите е од градската куќа. (А.П.)