Интернет и телекомуникации

Значителен прогрес на пазарот за електронски комуникации во земјава е констатиран во 2009 година. Од Министерството за транспорт и врски велат дека тоа се должи на обезбедувањето на исти услови за влез не само на домашни туку и на странски оператори, а доказ за ова е влезот на Телоком Словенија преку купувањето на Космофон и воведувањето на дигитална телевизија - Боом ТВ.

Според официјалните показатели од Државниот завод за статистика и Евростат, земјава во користењето на широкопојасниот интернет е еден од лидерите во регионот. Имено, забележан е значител скок на користење на широкопојасен интернет, што во 2006 година беше 1%, а во 2009 година 33% од вкупниот број на домаќинства.

По утврдување на стандардите државите-членки на ИТУ вклучително и Македонија, ќе можат да распишат оглас за одобренија за 4-Г

Македонија има слободен фреквенциски опсег за новите системи од четвртата генерација мобилна телефонија (4-Г). Токму за стандардите на оваа технологија и за безбедносните аспекти во нејзината примена се разговараше на меѓународната работилница Кон следната генерација мобилни мрежи", што се одржа во Скопје. Според Јане Јакимовски, раководител на секторот за радиокомуникации при Агенцијата за електронски комуникации (АЕК), за новите мобилни системи од четвртата генерација се уште не е усвоен стандард на ниво на Меѓународната унија за телекомуникации (ИТУ).

-По утврдување на стандардите државите-членки на ИТУ вклучително и Македонија, ќе можат да ги имплементираат тие мрежи, а АЕК ќе го ослободи тој опсег и ќе распише оглас за одобрение за нови оператори што би користеле 4-Г или веќе постоечки оператори за да ги надградат нивните мрежи за четвртата генерација - рече Јакимовски.

Министерот за транспорт и врски, Миле Јанакиески, на работилницата најави активности и поддршка за натамошен развој на електронските комуникации и информатичкото општество, кои ги оцени како круцијални за развојот на државата.
- Во Македонија е направен голем прогрес во последните пет години за суштинска либерализација и развој на комуникацискиот сектор - оцени Јанакиески.

Тој потсети дека моментно две компании за мобилна телефонија во земјава нудат услуги од третата генерација мобилна телефонија (3-Г), која обезбедува брзина на размена од 10 мегабити. За споредба, 4-Г овозможуваат брзина на пренос на услуги преку мобилен телефон од 100 мегабити во секунда.
- Во тек е тендер за распределба на уште две нови 3-Г лиценци, со што ќе се придонесе кон зголемената понуда на овие услуги, а преку конкуренцијата се надеваме да се влијае и на понудата на услугите - најави Јанакиески.

Тој истакна дека според последните статистички податоци Македонија е еден од лидерите во регионот во користење широкопојасен интернет и потсети дека успешните реформи во секторот на електронски комуникации се потврдени во последниот извештај на Европската комисија.
Позитивни оценки за прогресот на Македонија во користењето интернет и либерализацијата на телекомуникацискиот пазар на работилницата изнесе Свеин Тенингас, висок советник на Европското биро за телекомуникациски развој. На новинарско прашање дали во Македонија има простор за четврти мобилен оператор, за што е во тек тендер, Тенингас рече дека тоа ќе го утврди пазарот.

Во фиксната телефонија "пребегале" 20.093 претплатници, а меѓу трите мобилни оператори мигрирале 8.086 корисници

Расте бројот на корисници на фиксна и мобилна телефонија кои во трка по подобри и поевтини услуги, го напуштаат досегашниот оператор и мигрираат кај друг, при тоа задржувајќи го префиксот на бројот. Заклучно со 8 февруари, трансфери од една во друга мрежа направиле вкупно 28.179 корисници, од кои 20.093 направиле преселба во фиксна, а 8.086 во мобилна теелефонија. Оваа услуга стана оперативна од први септември 2008 година.

Европските искуства покажуваат дека речиси во сите држави, каде што е воведена оваа услуга, во првата година е регистриран благ пораст на мигрирање на броевите, за потоа, по запознавањето со новата услуга, втората година тоа да биде зголемено, а веќе во третата година е значителна стапката на пораст на префрлувањето на броевите во мрежите на операторите.
-Ние сме сега некаде на половина од тој период, односно околу 1,5 година од стартот на оваа услуга. Бројот на мигрирани броеви е со очекувана стапка, при што евидентно е дека само во последните шест месеци имаме речиси удвојување на претходната бројка на префрлени броеви, регистрирана на крајот на првата година од воведувањето на оваа услуга - велат од Агенцијата за електронски комуникации (АЕК).

Во фиксната телефонија миграциите се главно од Македонски Телеком во мрежи на други оператори кои нудат фиксна линија. Во мобилната телефонија пак, има подеднаква тенденција на селење на броевите меѓу трите мобилни оператори: Т-Мобиле Македонија, ОNЕ и Вип оператор.
-Ова е последица на се поразвиениот телекомуникациски пазар, изедначеноста на операторите во своите понуди и поразвиената конкурентска борба за корисници. На мобилниот пазар сите се конкурентни и се бркаат со цените и понудите на одделни услуги и пакети на услуги, па трансферите на броеви од мрежа во мрежа се скоро подеднакви од оператор до оператор.