Деловен објект на местото на старата Народна банка

Прво карабина на објектот, потоа улица под кејот

Инвеститорот не се откажува од изградбата на подземната сообраќајница

Подземната улица што ќе биде единствена сообраќајна врска со деловната зграда што се гради на местото на некогашна Народна банка, ќе почне да се гради до почетокот на јули, најавуваат од „Дивелоп груп“, кој заедно со „Латис“ се инвеститори на објектот вреден 10 милиони евра. Тврдат дека не се откажале од изградбата на улицата, која според досегашните најави, веќе требаше да биде во фаза на изведба. Иако за неа инвеститорите имаат и готов проект, ги образложуваат причините за кои се' уште не преземаат конкретни градежни активности. 

„Нелогично е истовремено да ги градиме и улицата и објектот, бидејќи се' уште имаме потреба од дотур на градежни материјали до градилиштето. Дел од трасата каде што минуваат камионите со градежниот материјал е токму дел од теренот што ќе треба да се раскопа за подземната сообраќајница, па од тие причини чекаме објектот да се изгради до фаза на карабина. Тогаш нема да има потреба од дотур на градежен материјал, а теренот ќе се ослободи за изведба на проектот за сообраќајницата“, објаснува Александар Ивановски, управител на „Дивелоп“.

Тој ги демантира се' почестите шпекулации дека се откажале од инвестирање во подземната сообраќајницата. Вели оти тоа е незамисливо, бидејќи нелогично би било фирмата да инвестира 10 милиони евра во деловната зграда, а притоа да не ја изгради и улицата, која, според процените, би чинела 10 пати помалку и ќе претставува единствен сообраќаен линк до објектот. 

Инаку, изградбата на зградата е стасана до петти кат од предвидените шест. Според процените на Ивановски, карабината ќе биде завршена најдоцна до почетокот на јули, по што ќе почне и изградбата на подземната улица. Таа е предвидено да оди по должината на кејот од киоскот кај „Холидеј ин“ до новиот објект. Ќе биде 6,5 метри под земја со ширина од 6 метри. (Дс.Т.)