Споменици и скулптури (општо)

Идејното решение на скулпторот Ангел Коруновски, насловено „Ангелот", е она кое ќе биде идно спомен обележје за загинатите бранители од Битола во конфликтот во 2001 година. На конкурсот кој беше распишан на 26 февруари идејни решенија доставиле шест автори, одборот за избор прифатил само четири, а одлуката за избор на делото „Ангелот" била донесена едногласно.

-Двете дела кои ги елиминиравме немаа потполна документација при изборот одборот се водеше делото да се издвојува по својата оригиналност, уметнички израз и идејната порака - вели Моника Јовановска, претседател на одборот за избор.

Пет члена комисија составена од архитект, уметник, графички дизајнер, градежен инженер и историчар ги оценуваа макетите. „Ангелот" , кој ќе биде висок околу седум метри, го претставува раѓањето, животот и смртта. Во долниот дел на спомен обележјето ќе бидат испишани имињата на седумте загинати битолчани.

-Во долниот дел е претставена борбата, има не само мажи туку и жени и деца, кои си помагаат и издигнуваат, а ангелот е спој на земното и небесното - додава Јовановска.

Оние кои доброволно учествувале во конфликтот, сметаат дека со ова спомен обележје се означува една важна епоха од историјата на градот и земјата.

- Според мене требаше да се избере првото решение, но сите проекти имаат своја вредност - вели Тоде Ѓоргиев, воен пензионер.

Спомен-обележјето се предвидува да биде поставено во паркот, пред градскиот часовник, зад споменикот на Филип Втори. Тоа се предудивало со последните измени на деталниот урбанистички план за овој простор од централното градско подрачје.

-Со својата вертикална поставеност нема да го наруши постојниот амбиент и се запазува зелената површина - вели Јовановска.

Битолчани сметаат дека идејата да се постави споменик за бранителите е добра, но локацијата требало да е друга. Премногу споменици на едно место, а сите заслужувале да бидат видени, никој не требало да е во сенка.

Сега општината е таа која е надлежна за реализација на спомен обележјето. Во меѓувреме, сите заинтересирани можат да ги погледнат четирите дела пристигнати на конкурсот кои се изложени во Магазата. Алтан- е предлогот на Горги Алтанџиев, итмак - е идејното решение на Христијан Атанасовски, а Херонеја е предлогот на Венса Кондева и Сашо Поповски.