Тунелот под Кале нацртан на нова хартија

Потребата од тунел под Кале, како продолжение на булеварот Свети Климент Охридски, е внесена и во најновата нацрт-верзија на детаљниот урбанистички план за локалитетот Тетовска трошарина, што Советот на општината Центар го усвои завчера попладне. Тунелот ќе биде долг 180 метри и ќе минува во близина на Калето. Сообраќајницата ќе има четири коловозни ленти, односно 14 метри широчина и плус околу два метра заштитни тротоари, кои ќе се користат при сервисирањето и одржувањето на коловозите. Движењето на пешаците по овие тротоари нема да биде дозволено, односно тунелот ќе го користат само возила.

Презентацијата на планот пред Советот ја изврши проектантот Благоја Тагасовски од проектантското биро „Инпума“, кое со години ги изработува детаљните планови за Општина Центар.

- Тунелот постои во генералните урбанистички планови уште од 1965 година, потоа е потврден и во плановите од 1985 и 2002 година. Овој пат само го внесовме во детаљниот урбанистички план за Тетовска трошарина, односно го потврдивме, оти тој бил планиран и во претходните детаљни планови. Тој ќе има неверојатно олеснителна функција во однос на сообраќајниот метеж. Влезот на тунелот би бил во близина на лизгалиштето. Нема да минува под тврдината, туку под Музејот на современата уметност - рече Тагасовски.

Булеварот Свети Климент Охридски во Генералниот план е дел од прстенот брзи сообраќајници. Предвидено е откај Владата, до каде се протега моментно, да продолжи со мост преку Вардар и со тунел под Кале да се поврзе со булеварот Никола Карев. И овој булевар е предвиден за брза сообраќајница, а моментно функционира како обична улица со четири коловозни ленти, попозната како „пластичарска улица“.

Иако тунелот во плановите постои со години, досега ниту една гарнитура не се нафати да преземе посериозни чекори за да дојде до неговата реализација. Со години се повторува дека е значен за решавање на сообраќајниот метеж, а се' што се прави е само прецртување од стар во нов урбанистички план.

Освен тунелот, во планот за Тетовска трошарина се предвидува и изградба на шест резиденцијални објекти, кои може да бидат наменети за амбасади. Поголем простор треба хортикултурно да се уреди како заштитна зона.

Планот беше едногласно условен од Советот на Центар, без прашања и забелешки.

На седницата, советниците без забелешки ги изгласаа и измени на детаљните урбанистички планови за локалитетите Судска палата и Спортско-рекреативен центар „Кале“, кои, според објаснувањето на презентерите, не нудат големи измени во просторот.

Сопиште на удар на градежните профитери

Александар Момировски	Коментари (6)

Сопиште

Зелени делови од Сопиште во опасност да се претворат во урбан бетонски хаос. Советот на општината утре треба да одлучува по иницијатива на градежни профитери за измена на деталниот урбанистички план.

Се бара наместо куќи на одредени локации да може се градат згради, потег што, според познавачите, сигурно ќе го растури редот што сега постои меѓу зелената оаза и урбаните објекти. Според документите до кои дојде А1, измена на планот бара компанијата ФЗК Инвестмент Груп, заедно со Македонската Православна црква, која во целата работа се јавува партнер на приватната фирма.

На овој потег двете страни заеднички сакаат да градат масовни бетонски зданија од по неколку ката. Измени на планот бара и уште една фирма Продукција Десет, регистрирана како друштво за филмска дејност, а во моментов како што дознаваме работи со блокирана сметка.

Бара изградба на згради на уште 14 локации, на кои не се предвидени масивни објекти. Дали на сметка на дебелиот профит ќе се дозволи да се уништат овие нечепнати парчиња природа. Градоначалникот на Сопиште веќе најави дека инвеститори се добредојдени во општината, но нема да дозволи никакви отстапки од деталниот урбанистички план.

Јован Ѓорѓиоски

„Се што е во опфат со урбанистичкиот план ќе биде прифатено, се што е надвор од урбанистичкиот план нема да биде прифатено. Нема да се дозволат отстапки. Јас барем нема да дозволам отстапки, без разлика дали тоа ќе биде на висина или други параметри кои ќе побегнат од предвиденото“, рече Јован Ѓорѓиоски, градоначалник на Скопје.

А1 неодамна објави дека токму ФЗК Инвестмент Груп сака да гради куќи и згради на локации на кои нема право тоа да го прави, како и на локации кои според урбанистичкиот план се наменети само за изградба на куќи.

Во целата операција заинтересираниот инвеститор објаснува, дека ќе има ќар од 100 до 120 проценти. ФЗК предвидувал и да влезе во јавно приватно партнерство, да ја подигне цената на комуналиите на високи и 50 евра и да ги наплаќа. „Јас не нудам ништо, едно е да се направи концепт, може да се направи студија, само така може да го сфатите тоа. Јас ги нудам тие што ги имам, всушност не ги нудам, тоа е една форма, дискутабилно е“, вели Филип Скуманов, сопственик на ФЗК Инвестмент Груп.

На потег се општинските власти, од кои зависи дали Сопиште ќе го загуби својот оригинален лик, од зелен рај да се претвори во камена џунгла по примерот на скопско Дебар маало.

Урбанистичкиот план за овој дел од општината е донесен лани и во него е детално набележано кои парцели се за згради, а кои се за куќи. Згради се предвидени само на шест локации, но сега градежни профитери бараат промена на планот кој ако се прифати ќе значи почеток на уништување на најеколошката населба во Скопје.

Автор на новото урбанистичко решение за центарот на Гевгелија е архитектот Благоја Тагасовски, кој заедно со стручниот тим на „Инпума“ го изработи Нацрт-ДУП за Блок1, односно централното градско подрачје во Гевгелија. Тој своето урбанистичко видување го образлагаше пред бројните граѓани на јавната презентација, која се оддржа во Пионерскиот дом. Притоа, тој не го криеше задоволството од масовната посетеност на презентацијата и изнесените интересни забелешки и предлози. Уште повеќе поради првичното позитивно мислење од страна на гевгеличани во врска со идниот изглед на центарот во родната Гевгелија.

-Настојувавме да понудиме подобрување на сообраќајната мрежа со пренасочување на сообраќајното движење на периферијата од центарот со што се создаваат можности за ослободување на плоштадот од сообраќајни возила. Тоа значи целосно затворање на плоштадот за сообраќај и негова трансформација во пешачка оаза. Со дислокацијата на Градското пазариште и Автобуската станица се создаваат услови за нови содржини кои ќе го заокружат изгледот и функијата на центарот. Предвидени се хотлски комплекс и деловен објект на овие две локации. Што се однесува пак до просторот за домување предвиден е станбен комплекс долж улицата „Скопска“, која во иднина треба да биде проширена и двонасочна, објаснува Тагасовски.