Фала

Ескалаторите - надеж за спас на „Влајко“

На надземниот пешачки премин „Влајко“ во населба Влае деновиве почнаа работите за монтажа на ескалатори, со што од Општина Карпош очекуваат дека граѓаните во иднина побрзо и полесно ќе го минуваат булеварот Партизански одреди. Со зголемувањето на фреквенцијата на пешаците, локалните власти се надеваат дека конечно ќе заживее и самиот премин, кој четири години зјае празен. Ескалаторите ќе чинат околу 60.000 евра.

Идејата за поставување ескалатори е уште од првиот мандат на градоначалникот Стевчо Јакимовски, предвидена и со оригиналниот проект. Од поставување подвижни скали се откажа неговиот наследник Андреј Петров, со образложение дека општината нема пари за тоа, а сега Јакимовски повторно е решен „Влајко“ да го дотера до крај.

Иако изминативе години секој што имаше потреба да упати критика на сметка на Јакимовски како слаба точка го избираше „Влајко“, сепак градоначалникот убедува дека тие што негодуваат не се во право.

- Не е точно дека „Влајко“ е неискористен. Преку него преминуваат многу ученици што одат во блиското училиште, како и мајки со мали деца. Не е врвулица, но не би рекол дека е запустен како што е впечатокот во јавноста - вели Јакомовски.

Градоначалникот најавува дека Општина Карпош повторно ќе организира нова продажба на 13 од 16-те дуќани на „Влајко“. Со тоа ќе се обиде да врати дел од парите што беа потрошени за неговата изградба, оти со години овој општински проект е на удар на јавноста поради неговата непродуктивност.

- „Влајко“ чинеше 900.000 евра и веќе е исплатен. Има фирма заинтересирана за купување на дуќаните. Со години за нив немаше имотни листови, што беше проблем за продажбата, но изминативе месеци успеавме да извадиме - вели Јакимовски.

Втората опција, ако дуќаните не се продадат, е тие да се адаптираат во канцеларии за потребите на дел од вработените во општинската администрација. Според надлежните, вработените би им давале услуги на граѓаните, но би примале и разни жалби, поплаки и барања.

Жителката на Влае, Милена Т. вели дека за сиве овие години на преминот се качила само два пати, но не за да премине од другата страна на булеварот, туку за да види што има во дуќаните.

- Живеам во непосредна близина и можам да кажам дека преминот малку се користи. Не знам дали откако ќе се постават ескалатори ќе имам желба почесто да се качувам таму - вели таа.

Општина Карпош најави изградба на надземни премини преку „Партизанска“ и кај Драмски театар и кај општинските бараки, но тие се' уште не се реализирани.

Јорданка Ивановска

Подземјето ги урниса желбите на Трајановски

Иако пред изборите вети дека ќе изгради повеќе подземни пешачки премини, градоначалникот Трајановски не може да го исполни ветувањето поради густата мрежа подземни инсталации и непостоењето подземен катастар

Два од петте најавени подземни пешачки премини, кои градоначалникот Коце Трајановски вети дека ќе ги изгради за поголема безбедност на пешаците, имаат шанса да видат бел ден. Станува збор за премините на улицата Димитрија Чуповски и кај Трговскиот центар „Бисер“ во Аеродром. Но неизвесно е кога ќе се случи почетокот на нивната изградба, бидејќи градската власт се' уште „се бори со подземјето“, кое е преполно со инсталации и кабли, а нема подземен катастар.

За останатите три најавени подземни премини од Градот Скопје не велат ниту да ниту не, но според изјавите, малку е веројатно дека некогаш ќе бидат изградени. Станува збор за еден премин на Бит-пазар и два на булеварот Партизански одреди, кај Градежниот факултет и кај Трговскиот центар „Лептокарија“. Петте премини градоначалникот Трајановски ги вети лани во својата кампања за локалните избори, како спасоносни решенија за заштита на пешаците на „црните точки“ во градот. Од градското одделение за односи со јавност не најавуваат датуми за почеток на какви било градежни работи, напротив, информираат дека се' уште работат на утврдување на урбанистичката и градежната изведливост на проектите.

- Непостоењето на подземниот катастар ја отежнува целата постапка за изработка на документацијата за изградба на подземните пешачки премини. Првичните резултати говорат дека на две локации постојат услови за нивна изградба - на улицата Димитрие Чуповски, кај поранешен „Рубин кармин“ и кај „Бисер“ во Аеродром, додека на останатите три локации има прегуста мрежа на подземни инсталации. За првите две локации ќе продолжиме со изработка на подготвителната документација - велат во Градот.

Најголемиот проблем, изработката на подземниот катастар, чие непостоење со децении одзема многу време и пари, е оставен за наредната година. Тогаш се очекува конечно да почне неговата изработка, а кога ќе заврши, не се знае.

- Во програмата на градоначалникот е предвидено дека на крајот на 2011 година ќе почне изработката на дигитализиран подземен катастар на водоводните, гасоводните и топловодните инсталации. За конечната изработка на сеопфатен подземен катастар потребна е и измена на законите. Операторите кои поседуваат подземни инсталации треба да бидат законски обврзани да ги дадат информациите за потребите на дигитализираниот подземен катастар. Непостоењето подземен катастар му прави проблеми на Градот при реализацијата на проектите, затоа што непотребно се губи време и непланирано се пролонгираат работите при изградба на инфраструктура - објаснуваат градските власти.

Во врска со исплатливоста на подземните премини, од кабинетот на Трајановски се убедени дека тие се вистинското нешто, иако досега се покажаа како неефикасни. Во Скопје со децении има четири вакви премини, кај хотелот „Континентал“, кај средното сообраќајно училиште, на Јужен булевар и кај Трговскиот центар „Скопјанка“. Тие се преполни со ѓубре, неосветлени и опасни поради присуство на деликвенти или зависници, па ретко кој се одлучува да ги користи. Според изјавите на скопскиот градоначалник, премините што тој планира да ги гради ќе бидат многу користени, оти во нив ќе има разни дуќани и други содржини.

Тастерите за пешаци ќе го забават сообраќајот

Од Градот Скопје не се уверени дека безбедноста на пешаците, наместо со подземни премини, може да се реши со поставување на таканаречените тастери за пешаци, кои во многу европски градови се секојдневие. Се работи за копчиња на семафорските уреди кои пред се', се поставуваат на фреквентни улици. Наместо да зависат од добрата волја на возачите, пешаците со притискање на копчињата палат црвено светло за возилата и добиваат предност за минување.

- Поставување семафори со тастери за пешаците на булеварите не е практично решение за одржување на зелениот бран и ќе создава само дополнителен застој во сообраќајот - сметаат градските власти.

http://www.dnevnik.com.mk/?ItemID=03099FB24E83C649BB9DC010973BF745