Кучиња скитници

Глоба за бакнување во автомобилот, хранење мачки и правењето кули од песок

Ако одите на одмор во Италија, бидете предупредени, земете си млеко за сончање и крпа но, наланите и сандалите што чкрипат оставете ги дома - тоа е кршење на законот и може да добиете казна од 150 до 500 евра.

Релаксираната италијанска нација се заплетка како шпагети во куп ситничави правила. Законите беа воведени откако владата на Силвио Берлускони и ги одврза рацете на локалната самоуправа сама да се бори против заканите за јавната безбедност и криминалот.

А деновиве во земјата на романтиката, криминал е да се бакнувате во автомобил - тоа задоволство во Неапол може да ве чини дури 500 евра. Законите варираат од град во град. Во Виџевано е забрането да се седи на скалите - пијалак во кафуле чини пет евра, а казната на скалите 160 евра - според градоначалникот, било скапо да се мијат секој месец.

Во Ераклеа не смеете да ги сопнувате шетачите со замоци од песок. На Сардинија цигарите се строго забранети на плажа. На Капри ќе ве казнат ако заталкате подалеку од плажата само во костим за капење.

Тоскана си го штити кулинарското наследство со забрана на ќебапчилници, во парковите во Новара е забрането собирање на друштво од повеќе од двајца, во Поситано можете да славите со огномет само во сабота.

Фиренца и Рим ги избркаа луѓето што чистат ветробрани на раскрсници, а уличните мачки нека се снаоѓаат како што знаат и умеат - вас скапо ќе ве казнат ако се обидете да ги нахранете.

Италијанските медиуми овој феномен го споредуваат со ерата на Мусолини, кога бирократијата го контролираше секој вид на друштвена активност - закони за се и сешто, а никој не го контролира разузданиот премиер.