Македонска Филхармонија

Министерството за култура негира дека за објектот досега се потрошени 10 милиони евра

Катерина Богоева


Салата на Македонската филхармонија се' уште е без подигната карабина, за која минатата година на 25 март, при поставувањето на темелите од Министерството за култура беше најавено дека ќе биде изградена за една година, од почнувањето на градежните работи. На просторот работите се' уште се одвиваат на две нивоа под земја, а според сегашните најави карабината треба да биде готова до средината на годинава. Салата треба да биде готова во 2011 година, но до неа според презентираната визија, ќе се доаѓа по нови патчиња, меѓу објектите што треба да никнат. Дали и тогаш на музичарите ќе им биде важна само акустиката на салата, останува да се види, бидејќи одењето на концерт е свечен чин и прашање на чие доживување, несомнено влијае и поширокиот простор.

Изградбата на овој објект во јавноста повторно се актуелизира по минатонеделната презентација на планот за новиот изглед на Скопје, во кој е предвидено на поширокиот простор пред идната сала да се подигнат нови објекти, кои ќе го покријат засега отворениот поглед кон кејот на Вардар.

Медиумите во анкетите ја пренесуваа загриженоста на дел од граѓаните за идниот нарушен поглед од свете страни на реката, а беа пренесени и информации дека за изградба на концертната сала се потрошени 10 милиони евра.

Анета Јованоска, портпаролка во Министерството за култура ги негира информациите за висината на потрошените средства и посочува дека во 2007 година објектот чинел 5,4 милиони денари, во 2008 година – 8 милиони денари, а минатата година – 136,6 милиони денари.

„Во тек е изградбата на првата фаза од објектот – затворена карабина, која ги опфаќа градежните работи од фазите земјени работи; бетонски и армирано-бетонски работи; челик; ѕидарски и разни ѕидарски работи; изолациони; нивелационо партерно уредување и сообраќајно решение“ објаснува таа, потенцирајќи дека целата постапка се одвива според планот и динамиката на Министерството и дека останатите фази ќе бидат тендерирани во наредна постапка.

„Изработката на проектната документација е во тек, а се одвива во соработка со проектантот за акустика и градежна физика Muller – BBM International Germany, Јорг Кумел, кој се смета за врвно име во таа област во Австрија“.

Изградбата на концертната сала на Македонската филхармонија будно ја следат и музичарите на кои најмногу им е важен најавениот квалитет на изградба на објектот, очекуваната квалитетна акустика, која ја врзуваат за вклученоста на проектантот Јорг Кумел во проектот.

Концерт мајсторот во Македонската филхармонија Ана Контраденко изјави: „Искрено, секогаш кога ќе поминам таму, ми се разведрува небото дека сепак се гради. Не е важна брзината, туку квалитетот и тоа што Кумел ја контролира акустиката, а тој веќе се има потврдено и во ’Бољшој театар‘ во Москва, во концертните сали во Кина и во други земји“.

И директорката на Македонската филхармонија Маја Чанаќевиќ го фокусира внманието на изградбата на објектот, без да ја спомене најавената промена на изгледот на просторот. „Со големо нетрпение го очекуваваме почетокот на изградбата на салата на Македонската филхармонија. Неизмерно беше задоволството и среќата на музичарите, а и воопшто на уметниците и целата јавност, бидејќи конечно после 65 години постоење Македонската филхармонија ќе добие свој дом, концертна сала каде музичарите од овој оркестар ќе творат, а публиката ќе ужива во нивните уметнички креации. Да се изгради една концертна сала е многу комплексен потфат. За жал, овој оркестар 65 години работи во несодветни услови, во простор кој нема никаква акустика и навистина е тажно што досега никој не го презеде овој голем чекор. По нивото на уметноста се познава и нивото на една држава“, вели Чанаќевиќ.

Таа нагласува дека често поминува до местото каде што сега се гради концертната сала. За неа времетраењето на изградбата не е толку важен момент, многу поважен е квалитетот, бидејќи ваков голем проект се гради еднаш во сто години.

Филхармонијата во одбрана на својот иден дом