Продажба на автомобили во МК

Американски возила за нашите друмови

Станува збор за автомобили со црвени трепкачи, брзинометар во милји на час, мерач за гориво во галони, затегачи на ремен и други елементи кои се различни од пропишаните со домашните закони

Владата сака да издејствува увоз на возила произведени за американскиот пазар, кои не ги исполнуваат условите за хомологација, тврдат увозниците на автомобили во земјава. Американските возила не можат да бидат увезени во земјава бидејќи не се произведени според стандардите за квалитет на ЕУ, кои се применуваат во Македонија. Тоа не значи дека американските автомобили се помалку квалитетни, туку едноставно се поинакви од европските. Станува збор за автомобили со црвени трепкачи, брзинометар во милји на час, мерач за гориво во галони, затегачи на ремен и други елементи различни од пропишаните со домашните закони. Повеќе експерти од надлежни институции се обиделе на Владата да и' објаснат на владините претставници за негативните ефекти од дозволата за увоз на стари американски возила, но нивните аргументи не биле прифатени.

Од страна на увозниците било поставено прашањето дали постои анализа за ефектите од ваквата мерка врз работата на увозниците и врз системот, но и за очекуваните позитивни мерки за граѓаните.

- На ова прашање, одговор од Министерството за економија е дека Владата сака да се увезат евтини американски возила, без поконкретна анализа, кои и какви се тие возила, нови или половни, од европско, јапонско, корејско или американско производство и која потрошувачка група ќе сака да ги набави - велат увозниците.

Според еден од претставниците на Групацијата на увозноци на возила при Сојузот на стопанските комори, на неодамнешниот состанок во Министерството биле изнесени неколку аргументи зошто не треба да се воведува оваа постапка.

Инаку владата на седница одржана пред десетина дена го заложила Министерството за економија во соработка и консултација со повеќе експерти да подготви и во рок од 30 дена да достави соодветни законски измени со кои ќе се даде можност за увоз на возила во Македонија што се произведени за американскиот пазар. За таа цел потребна е измена на Законот за возила.

Оттаму велат дека одговорните во Министерството за економија се сложиле оти оваа постапка не е во согласност со важечките прописи и ќе воведе конфузија на пазарот.

- На седница на Владата биле повикани претставници на министерството и на Машинскиот факултет, кои уште еднаш се обиделе да ги објаснат последиците од воведување на оваа мерка. Заклучок е дека на Владата и' се многу јасни сите факти и аргументи, но дека и покрај тоа има намера ова да го спроведе - велат увозниците.

На следниот состанок во Министерството за економија, одржан на 13 јули, биле повикани стручни лица од Бирото за Метрологија, Машинскиот факултет, Институтот за стандардизација, Институтот за акредитација, Министерството за животна средина, МВР, увозниците на возила, телата за оценка на сообразност и други.

- Освен претставниците на МВР, кои беа воздржани од суштинска дискусија, сите други учесници се изјаснија дека не гледаат можност за предлог во рамките на своите надлежности, т.е. дека се бара создавање конфликтно законско решение - посочуваат увозниците.

Единствен начин на кој граѓаните може да донесат возило произведено за американскиот пазар е ако поседуваат американски пасош. Но, можат да го возат само со американски таблички бидејќи не ги исполнува домашните услови за хомологација. При увоз на ваквите возила, само за транспорт по воден пат треба да се одвојат околу 2.000 долари.

Владата кон средината на март Владата дозволи увоз на стари возила и над 16 години според Евро 1 и Евро 2 стандардите. Истовремено, беа намалени царинските давачки и акцизата за увозот на возила. Со ова се отвори ширум вратата за старите автомобили од Европа, по што досега во земјава се увезени над 30.000 стари автомобили. Покрај економската криза оваа мерка имаше погубно влијание врз увозот и продажбата на нови автомобили во земјава, која е падната за околу 40 отсто во споредба со лани.

Светлана Вукчевиќ

Увозот на половни автомобили од почетокот на месецов се сведува на вообичаените граници, откако од средината на март до крајот на август драстично се зголеми поради намалената акциза која што значително им ја симна цената. Шпедитерите кои ги подготвуваат царинските документи за возилата купени во странство велат дека минатиот месец се достигнал врвот и дека веќе не очекуваат поголем увоз. Проценуваат дека од почетокот на месецов увозот на половни возила е намален и за 70 отсто. Или, ако претходните месеци дневно носеле на царинење и по 15 автомобили, сега имаат најмногу пет. Според податоците од Царинската управа на Македонија, во јануари и во февруари во просек се увезле по 150 стари возила, а во следните шест месеци просечно се царинеле по 6.000. Од почетокот на годинава до крајот на август се оцаринети вкупно 36.432 половни и само 4.901 нови возила. Еден дел од возилата беа донесени со шлепери, за продажба, а дел граѓаните сами си ги купуваа во странство. Шпедитерите забележуваат дека автомобилите донесени за продажба се изложени на плацови, какви што само во Скопје сега има петнаесетина, се постари, поамортизирани, а со тоа и поевтини. - Најголем дел од увезените автомобили во овој бран се произведени меѓу 1995 и 1998 година. Многу ретко работевме со возила од 2000 до 2002 година и нив главно ги носеа граѓаните за себе или, пак, ги царинеа нашите гастарбајтери за да им ги остават на своите роднини или пријатели во Македонија. Не би рекол дека со ова решение на Владата, со кое возилата поевтинија, се подобри возниот парк во државата. Се увезуваа и возила со најнискиот дозволен стандард ЕУРО 1. Тоа се возила стари и до 18 години. Тие ќе можат да се увезуваат уште до крајот на месецов, но како и другите, и нив сега ги има помалку - вели Златко Богевски од „Кватрошпед“.
Шпедитерите информираат дека на плацовите се уште има многу возила за продажба. Велат дека на некои од нив има и по педесетина, а, пак, граѓаните кои ги посетуваат забележуваат дека цената почнала да им паѓа зашто потешко се продаваат. - За продажба се носат главно автомобили кои се вистински крш. Увозниците ги купуваат од Словенија по цена до 1.000 евра, ги царинат и тука го продаваат. Тоа се луѓе кои и до сега се бавеа со овој бизнис, но носеа едно по едно возило и на него печалеа по 200-300 евра, а откога падна акцизата, почнаа да ги увезуваат со шлепери. Но, и тој бизнис замира. Едни исти увозници до минатиот месец дневно носеа по неколку шлепери, а сега го намалија увозот и на царинење ни носат по еден шлепер на неколку дена - објаснува еден шпедитер кој сакаше да остане анонимен. Тој вели дека годинава од странство најмногу се донеле постари модели на „корса“, „вектра“ и слично. Шпедитерите, исто така, посочуваат дека се уште не е решен проблемот со возилата со бугарски регистарски таблички, кои граѓаните ги увезле пред неколку години и ги возат бидејќи поседуваат бугарски пасош. Тие коментираат дека ако сите овие решенија со увозот Владата ги презела за да го реши проблемот со нив, не ја постигнала целта. Додаваат дека сопствениците на вакви возила доаѓаат кај нив и се распрашуваат што да прават, но занемарлив број се царинат бидејќи повеќето се многу стари и не ги исполнуваат еколошките стандарди. Овие возила треба да добијат македонски регистарски таблички најдоцна до крајот на месецов.


Се увезуваа и камиони и автобуси


Годинава до крајот на август во државата се увезени вкупно 44.114 возила. Од нив 41.333 се патнички, од кои поголемиот дел се употребувани. Увезени и царинети се и 2.363 камиони. Само 571 бил нов, останатите половни. Поволностите за увоз ги искористија и автопревозниците. До крајот на август е направен и увоз на 418 автобуси и минибуси, од кои само седум нови. Најмногу патнички автомобили се увезле во јули, кога биле царинети околу 9.000.