Градска инфраструктура (општо)

На мостот Гоце Делчев се менува вод стар четири децении

Стариот вод се заменува, бидејќи минатата грејна сезона тука имало хаварија

АД „Топлификација“ врши замена на главните водови од магистралната мрежа за испорака на топлинска енергија на потегот од автобуската постојка спроти црквата „Свети Димитрија“ до објектот на Владата. Обновувањето на магистралниот вод стар четири децении е во должина од 230 метри, а „Топлификација“ ќе ја чини околу 180 илјади евра. Поради изведбените работи на „Топлификација“ сообраќајот по мостот Гоце Делчев се одвива по една коловозна лента. Токму поради сообраќајниот метеж и колоната возила, вчера дел од градските автобуси, место по вообичаената траса по мостот, се пренасочуваа кон МНТ. Преку централното градско подрачје се враќаа на трасите по кои возеа и претходно. Од АД „Топлификација“ велат дека имаат рок изведбените работи да ги завршат до крајот на август, но поради настанатиот сообраќаен метеж работат со забрзано темпо и во две смени и се надеваат дека ќе завршат до 15 август. Сметаат дека ваквите изведбени работи мора да ги завршат во овој период од годината кога фреквенцијата на луѓе и сообраќај е помала.

„Заменувањето на овој стар вод мораше да го направиме годинава, бидејќи минатата грејна сезона токму таму имавме поголема хаварија, на која зимото интервениравме. Токму преку оваа магистрална мрежа со топлинска енергија се снабдуваат потрошувачите од централното градско подрачје до населбата Капиштец. Секоја година вршиме реконструкции на вакви водови“, вели Алфонс Вета, управител на Дистрибуција на топлина.

Од „Топлификација“ информираат дека зафатите на топлификационите водови на улицата „Народни херои“ ги завршуваат, а слични зафати ќе изведуваат и на булеварот „Крсте Мисирков“ кај ТЦ „Мавровска“, потоа кај хотелот „Пелагонија“ во Кисела Вода, МБУ „Илија Николовски Луј“ и еден вод на улицата „Рузвелтова“, преку улиците „Орце Николов“ и „Илинденска“. Во планот за летни реконструкции е зацртан и еден вод во Старата чаршија. (Сн.К.)

Градските власти конечно решија да ги уредат тротоарите во централното градско подрачје, кои се дупка до дупка и со години не виделе целосна реконструкција, освен по некое инцидентно крпење. Од вчера Град Скопје на тендер бара фирми што ќе ги реконструираат тротоарите, а понуди ќе се примаат до10 септември. Договорот со фирмата која ќе се избере ќе важи една година, а пресудна во изборот ќе биде најниската понудена цена. Во Градот не одговорија каква реконструкција планираат, дали се работи само за тековно санирање на дупките или целосно ќе ги уредат тротоарите. Исто така, властите не сакаа да откријат за кои улици станува збор. Само негираа дека заштитните столпчиња, кои во повеќе наврати се поставуваа по булеварите, токму во централното подрачје, ќе пречат на поправката на тротоарите. Иако секоја активност Градот ја планира во буџетот, надлежните не сакаа да откријат ниту колку пари ќе издвојат за оваа намена. Моменталната слика во центарот на Скопје покажува дека во најлоша состојба се тротоарите на булеварот Свети Климент Охридски, а огромни дупки со години зјаат отворени и на Димитрија Чуповски. Пропаднати и оштетени тротоари има и на Партизански одреди, како и пред Собранието.


Р.П.