Надземни и подземни пешачки премини

Преминот на Бит-пазар ќе биде готов во септември

Надземниот пешачки премин што се гради на Бит-пазар за десетина дена ќе биде завршен и околу 10 септември ќе биде свечено предаден во употреба. Веќе е поставена кошулката на пешачкиот дел, по што ќе се редат керамички плочки, па ќе следува и поставувањето на страничната ограда и на гелендерите. Цилиндричниот дел од плексан засега нема да се монтира на металните прстени, а инвеститорот „Акцент медија“ вели дека тоа ќе го направат доколку во иднина се покаже дека е потребно. Севкупната инвестиција за надземниот премин на Бит-пазар ќе изнесува околу 200 илјади евра.

До крај на идната недела ќе бидат готови и лифтовите за физички инвалидизирани лица. Во Општина Чаир се' уште не знаат дали со нив ќе управуваат вработени лица, како што првично беше замислено или, пак, граѓаните ќе ги користат самостојно. Се надеваат дека нема да има никакви технички проблеми.

„Лифтовите се од шпанско производство, од фирмата ’Макпроарса‘. Тие се во Скопје веќе една година, а ги увезе и ќе ги монтира скопски ’Сезал‘. Лифтовските кабини ќе бидат монтирани в четврток. Само лифтовите чинат 28 илјади евра. Тие се посебно димензионирани за да можат во нив да влезат лица со инвалидски колички“, објасни Небојша Маслинко, директор на „Акцент медија“.

Одговорниот за проектот на надземниот пешачки премин од Општина Чаир, Арбен Речица, вели дека веднаш по завршувањето на објектот, во соработка со Градот, ќе бидат затворени постојните пешачки премини со продолжување на бетонските жардиниери. Ќе биде оставен само еден на пропишано растојание што го одредуваат сообраќајните правила.