Трговски објекти (општо)

Трговскиот стана зона на самракот

Преку ден објектот со дуќани изгледа како секоја просечна автобуска станица, но кога и последниот автобус ќе замине од Гостивар за Скопје, просторот станува зона на самракот

Бездомници и зависници од дрога се „муштерии и трговци“ во триесетината дуќани што се наоѓаат во рамките на гостиварската автобуска станица, поради нерешен сопственички статус на објектот. Катот од едното крило на овој објект е целосно запуштен. Заплетканите сопственички односи, покрај штетите од неработењето, придонеле дел од објектот да стане дувло на натрапниците.

- Во овој дел од градот, по 22 часот граѓаните не се чувствуваат безбедно бидејќи не знаат на кого се' може да налетаат. А тука е и недоволно осветлено. Често се забележуваат сомнителни лица што се движат тука - се жалат жители од неколкуте згради на улицата Мара Угринова.

Прошетавме низ објектот, кој би требало да претставува трговски центар. Под скалилата затекнавме бездомник, кој покриен со јоргани спиеше врз поплочениот под. Не го разбуди ни нашето зборување. На катот глетката згрозува. Купишта ѓубре, измет, стари алишта и постелнина, а смрдеата ги пара ноздрите. Некои излози од дуќаните се искршени, вратите разбиени. Во внатрешноста може да се забележи дека некој тука е чест посетител. На подовите остатоци од алуминиумска фолија, игли и друг прибор што зависниците го користат за уживање наркотици.

Нашите соговорници сметаат дека токму запуштеноста е причина што трговскиот навечер се претвора во собиралиште на сомнителни лица. Се жалат и сопствениците на бизнисите на ова локација. Тие на приземјето почнале некаков бизнис, па проблем им се нехигиената и кражбите.

- Од западната страна на автобуската, можеби поради близината на зградите, а можеби и поради тоа што има повеќе дуќани, тие луѓе не свраќаат. На катот имам магацин, во кој неколку пати беше провалено, но откако ставив аларм, просторот не е атрактивен за крадците. Сами се заштитуваме кој како знае - вели Игор Пандилоски, сопственик на минимаркет.

И нему му пречи што објектот е запуштен.

Жителите во неколку наврати побарале помош од полицијата. Оттаму велат дека трговскиот центар на автобуската неколкупати бил опфатен со нивни акции. Потврдија и дека затекнувале зависници и бездомници што доаѓаат од други градови. Се' завршувало со предупредување.

- Со оглед на тоа дека станува збор за специфична категорија граѓани, ние не можеме да направиме ништо повеќе освен протерување. За кратко време тие повторно се собираат - вели портпаролот на СВР Тетово, Марјан Јосифоски.

Тој нагласи дека поради поплаките на граѓаните, во наредниот период зајакнато ќе го надгледува местото.

Гостиварци со години чекаа на модерна автобуска станица, а архитектите овој простор го осмислиле како урбана целина. Таквиот објект требаше да носи профит. Сепак, трговскиот центар никогаш не заживеа во целост.

На почетокот од деведесеттите години со профункционирањето на станицата дел од дуќаните се разработија. Десетина локали во приземјето што се сопственост на приватни бизнисмени работат.

Од вработените во автобуската станица и од околните жители разбравме дека поголемиот број дуќани практично немаат сопственик.

Според нив, објектот го градела градежната фирма „Маврово“, но подоцна поради долгови, му бил отстапен на ФАС „11 Октомври“. Откако фирмата отишла под стечај, престанала и грижата за објектите.

Иако со сигурност никој не можеше да потврди, нашите соговорници рекоа дека се под хипотека во неколку банки. За дел од дуќаните имаше оглас дека е на продажба.

Преку ден овој објект наликува на секоја просечна автобуска станица, но откако и последниот автобус ќе замине за Скопје, овој простор станува зона на самракот.