Импровизираните куќички од картони и од ламарина, кои претставуваа прибежиште на неколку бездомни семејства, во близина на комплексот банки, по налог на Општина Центар, се урнати. Во бедните објекти живееле две-три семејства, чиишто членови егзистирале од собирање пластични шишиња. Според надлежните, токму тоа било причината за тоа што се населиле во централното градско подрачје, каде што фреквенцијата на луѓе е поголема во споредба со другите делови во градот, што подразбира дека има и поголеми количества фрлена ПЕТ-амбалажа. Од Општина Центар велат дека е недозволиво среде градот да има дива населба со импровизирани живеалишта, особено што непосредната околина се користела како јавно веце, па се ширела неподнослива мирис, најмногу во летниот период. Ваквата акција на отстранување на овие објекти, според граѓаните што живеат во овој дел од градот, требало одамна да се случи. - Ова е прометно место каде што поради близината на автобуската и на железничката станица секојдневно поминуваат илјадници граѓани, од кои дел се туристи кои првпат доаѓаат во земјава. Поради ваквите импровизирани живеалишта, тие сигурно добиваат лоша и погрешна слика за Македонија “ вели Тина која живее во близина на урнатите објекти. Од Општина Центар, која е иницијатор на оваа акција за отстранување на привремените објекти, велат дека куќарките биле подигнати без каква било дозвола. - Низ годините таму живееле десетина семејства, за до пред неколку месеци нивната бројка да се намали само на две или три. Сепак, наша одлука беше ваквите објекти да се урнат и земјиштето таму да се врати во првобитната ситуација, за што побаравме асистенција од полицијата “ вели Јовица Ацковски, портпарол на Општина Центар. Од СВР Скопје велат дека уривањето поминало без никакви проблеми и дека воопшто не била потребна асистенција од нивна страна.