Роза Петкова

Една година откако надземниот пешачки премин кај скопски Бит-пазар почна да се гради, но се уште не е целосно довршен и не може официјално да биде пуштен во употреба. Граѓаните речиси четири месеци го користат за да го преминат фреквентниот булевар Крсте Петков Мисирков, но има и такви кои, како што беше очекувано, каубојски газат по зеленилото во жардиниерата и предизвикуваат хаос во сообраќајот, притоа загрозувајќи си ја и личната безбедност. Тоа јасно се гледа, велат надлежните и од импровизираните патеки, кои граѓаните ги направиле во тревата кога непрописно преминувале преку улицата. Иако градоначалниците на Скопје и на општина Чаир, Коце Трајановски и Изет Меџити, ветуваа дека изградбата на преминот нема да биде залудна и дека граѓаните ќе бидат принудени да се качуваат по него, а тоа требаше да се постигне со поставување на железна ограда, очигледно и ова не ги спречи минувачите да газат по жардиниерата.
- Исто е како порано. Да постоиш тука десетина минути, ќе видиш најмалку десетина граѓани како слободно претрчуваат преку тревата. Ако некој може да се качува по скали за да ја премине улицата, тоа треба да важи за сите. И мене ми е полесно директно да си поминам, а не да губам време и да кружам, ама такви ни се навиките и тешко се учиме на прописно преминување улица - вели скопјанецот Алија Мешиќ.
Сепак, и оние што се решаваат да се качат по скалите и одозгора да го преминат булеварот, реагираат дека кога врне дожд или снег мораат да газат по вода, затоа што објектот се уште не е покриен. Преминот има и вграден лифт, за инвалиди и за постарите граѓани кои потешко се движат, но и тој не е пуштен во употреба бидејќи изградбата на објектот не е целосно завршена.
Во фирмата-инвеститор „Акцент медија“ велат дека сите работи во најкраток рок ќе се комплетираат и тогаш ќе биде и официјалното ставање во функција.
- Покрај Општината Чаир, „Акцент медија“ е еден од инвеститорите за реализација на проектот за надвозник кај Бит-пазар. Информирани сме дека е во завршна фаза поставувањето на конструкцијата за покрив, по што ќе следи покривањето на надвозникот и формалното пуштање во функција. Со официјалното пуштање во употреба, оперативни ќе бидат сите негови елементи. Сето тоа очекуваме да се случи во најкраток можен рок - велат од компанијата.
Темелите на пешачкиот мост на Бит-пазар официјално беа поставени во декември минатата година, откако претходно подолго време се најавуваше дека ќе почне да се гради. Уште на почетокот од изградбата, инвеститорите наидоа на пречки, па доста време одзема поместувањето на подземните инсталации, кои беа откриени на теренот. Пред неколку месеци преминот беше речиси готов, па на страничните делови веднаш се ставија и реклами, со кои инвеститорот очекува да си ги поврати вложените пари во проектот.
Пешачкиот мост се изгради токму на влезот во пазарот бидејќи тука со години има најголема фреквенција на минувачи, па тоа често го сопираше сообраќајот. Изградбата чини околу 200.000 евра, а, според договорот, „Акцент медија“ ќе стопанисува со него во период од десет години.