Возен парк (ЈСП - ЛАЗ)

УКРАИНЦИТЕ ЌЕ ПЛАЌААТ ПЕНАЛИ ЗА ДОЦНЕЊЕ

Автобусите пристигнаа, првите крукчиња за две недели!

Поделбата кои линии први ќе се обноват се уште не е направена, но извесно е дека тоа ќе бидат градските линии, информираат одговорните од јавното претпријатие

Осум украински автобуси ја поминаа границата вчераутро два часа по полноќ, а еден стигна околу пладне. Со тоа пристигна првата пратка од 15 од вкупно 84 автобуси кои за потребите на ЈСП Скопје се произведуваат во фабриката за автобуси ЛАЗ во Лавов, а коишто требаше да стигнат до крајот на декември лани, а потоа го искористија и бонусот за пролонгирање на тајмингот за еден месец со плаќање на пенали. Пред Нова година пристигна само еден автобус на кој се вршеа неопходни тестирања и пробни вежби.

Автобусите од Украина беа транспортирани со возачи на ЛАЗ до унгарско-српската граница, каде што ги пречекале возачи на ЈСП, а потоа допатуваа во државава.
Како што информираа од претпријатието, автобусите најпрво треба да се хомологираат на Машинскиот факултет, а потоа Министерството за транспорт и врски треба да ги предаде на Град Скопје, а тие на ЈСП Скопје. На крајот треба да се регистрираат и осигураат.
- Оваа правна процедура би требало да трае некаде околу десетина дена, а потоа ќе биде направена и првата официјална промоција на автобусите. Поделбата кои линии први ќе се обноват се уште не е направена, но извесно е дека тоа ќе бидат градските линии, информираат одговорните од јавното претпријатие. Според наши извори новите автобуси ќе возат на линиите 5, 15, 50, 57...

Според договорот украински ЛАЗ треба да испорача уште 69 автобуси до крајот на годината. Досега е платен депозитот во вредност од десет проценти од договорот, односно 1,1 милион евра, а проектот за набавка на нови 84 градски автобуси вкупно чини 11 милиони евра. Останатите автобуси би требало да пристигнат до октомври годинава.

Со оваа пратка ќе се обнови една четвртина од возниот парк на ЈСП. До 2013 година ЈСП ќе се поднови и со 202 двокатни автобуси кои се произведуваат во Кина. Старите автобуси што сега се расипуваат секој ден ќе бидат расклопени и ќе се користат како резервни делови, а другиот дел ќе бида продаден како старо железо.