Владата ги проби роковите за изградба на пруга кон Албанија и кон Бугарија, а истовремено заборави и на реализација на повеќе поситни проекти, како што се воведување езерска линија од Охрид до Подградец, изградба на базени во повеќе градови, привлекување нискотарифни авиокомпании...

Ветено-несторено

Македонските граѓани нема да имаат можност со воз да отпатуваат за Албанија или за Бугарија во наредните неколку години бидејќи Владата веќе ги проби роковите дадени во предизборната програма за изградба на овие делници. Се чини дека Владата нема реална можност да почне со реализација на овие капитални инвестиции ниту до истекот на мандатот во 2012 година.

Така, во програмата „Преродба во 100 чекори, надградена и проширена“ се предвидуваше почеток на изградба на пругата Кичево - Струга - Ќафасан во 2009 или најдоцна во 2010 година. Воедно, во изминативе четири години Владата не успеа да обезбеди пари од меѓународните финансиски институции за доизградба на железничката пруга кон Бугарија. Станува збор за проекти што се одложуваат со години поради тоа што се потребни огромни средства за реализација.

Пред изборите во владејачката ВМРО-ДПМНЕ ветија и реализација на повеќе други поситни и поевтини проекти за кои роковите се веќе одамна пробиени.

Така, до септември 2009 година во патниот железнички сообраќај требаше да има електронска наплата на билетите. До крајот на 2009 година се предвидуваше санација на каналите Билјанини извори и Св. Наум во Охрид, а со цел да се воспостави езерската линија Подградец, Албанија - Св.Наум – Охрид. До крајот на 2010 година, пак, се предвидуваше воведување на интегриран електронски систем за наплата на патарина, кој требаше да поддржува готовинско и безготовинско плаќање. Една од најголемите пречки за масовно искористување на визната либерализација и патување до европските дестинации се превисоките цени на авиобилетите. Пред изборите, актуелната владејачка гарнитура вети и дека ќе привлече најмалку два нискотарифни авиопревозници на домашните аеродроми, а со цел да се поевтинат авиобилетите за македонските граѓани. Но оваа иницијатива никогаш не вроди со вистински плод. Индикативно е што партијата на власт во почетокот на секоја година по одржувањето на изборите најавува реализација на проектот за изградба на македонско село како национална туристичка атракција. Иако станува збор за проект што предвидува изградба на околу десет куќи со автентична архитектура од повеќе македонски краишта, рокот за негова реализација (2009 година) е одамна пробиен.

Интересно е што владините претставници во изминатиов период во повеќе наврати се појавија на отворањето тениски игралишта и училишни спортски сали, кои беа дел од агендата за воздигнување на спортскиот дух кај младите и воопшто кај македонските граѓани. Сепак, се чини дека владејачката гарнитура заборави дека пред изборите даде ветување дека во периодот 2008-2012 година ќе бидат изградени или ќе почне изградбата на неколку базени со олимписки стандарди во Скопје, Куманово, Штип, Струмица, Прилеп, Битола, Охрид, Тетово и во Гостивар. Иако Македонија е држава која има два полуфункционални затворени базени и тоа само во главниот град, досега не е изграден ниту еден нов базен.