Железнички станици

Железничка станица од хорор-филм

Патниците се смрзнуваат во единствената отворена чекалница

Снежана Калабакова


Железничката станица во Скопје, најверојатно, е најсивото и најстуденото место за сите патници и за нивните блиски што дошле да ги пречекаат или испратат. Студ и мраз на пероните, а студено е и во единствената отворена чекалница за патниците. И не е проблем само студот. Станицата е многу валкана, несредена и без основни услови за нормално функционирање. Ескалаторите не работат, лифтови нема, а хендикепираните не можат ни да помислат сами да се качат до пероните. Чекалницата е единствено место каде што можат да седнат патниците, но не и да напијат чај или кафе. Распаднати се и трафиките на пероните и воопшто не изгледаат привлечно за патникот да посака да купи нешто за јадење или за освежување.

Општ впечаток за секој што прв пат ќе влезе во станицата се супстандардните услови и хорор-сликата што кажува дека таа е илјадници километри далеку од европските стандарди за да може патникот да има пријатно чувство пред да тргне на пат. На Железничката станица и' недостасуваат многу содржини. Од „Македонски железници“ изминативе години најавуваа реконструкција на станицата заедно со чекалниците, но досега ништо не е променето.

Од Министерството за транспорт и врски тврдат дека станицата ќе се реконструира наредната година. Предвидена е реконструкција според најдобрите искуства во Европската унија. Проектот ќе чини 2,9 милиони евра и ќе биде финансиран со средства од ИПА-фондовите за претпристапна помош, како и од буџетот на Македонија. Но, до реализацијата на проектот патниците ќе се смрзнуваат.

„Зимава е навистина тешко да се чека воз на Железничката станица, а уште полошо е што вратата за комуникација со чекалницата на Автобуската станица е затворена, па мора да се прави цел круг за да се дојде од едно место до друго. Вратата беше корисна и поради тоа што можевме да седиме во чекалницата на Автобуската, па потоа да претрчаме до пероните“, вели студентот Илија Илковски од Битола.

Од Министерството за транспорт и врски појаснуваат дека Железничката станица е изградена во почетокот на осумдесеттите години и факт е дека во изминатиот период нејзиното одржување не било на соодветно ниво. Токму затоа општата состојба може да се оцени како лоша.

„Во рамките на проектот за рехабилитација и надградба на Железничката станица во текот на оваа година е предвидено да се избере консултант за подготовка на досие за градежни работи, вклучувајќи и подготовка на основен и изведбен проект според бараните европски стандарди за пристапност, безбедност и сигурност, како и стандардите за информирање на патниците. Потоа ќе почне јавна постапка за изведување на градежните работи“, вели Драган Симоновски, портпарол во Министерството за транспорт и врски.

Оттаму објаснуваат дека со реконструкцијата на станицата ќе се подобри пристапноста до неа, особено на лицата со инвалидитет и намалена подвижност, а ќе се реконструираат и сегментите за подобра безбедност на патниците. Се предвидува нов информациски систем за сигнализација и информирање на патниците.

Проекциите предвидуваат градежните работи за реконструкција на Железничката станица да почнат во почетокот на 2012 година и да завршат до средината на 2013 година.