Урбана опрема

Обновеното битолско шеталиште доби и нови киосци

На местото на дотраените трафики, кои го нагрдуваа битолското шеталиште, локалната власт постави 17 современо дизајнирани киосци. Инвестицијата изнесува шест милиони денари и е дел од проектот за реновирање на најпосетената рекреативна зона во градот. Од оваа пешачка зона исчезнаа „кратерите“ во распуканиот асфалт, се обновија демолираните клупи и оштетените светилки.

Според градоначалникот Владимир Талевски, реновирањето на шетачката зона ќе заврши најдоцна за десет дена.

- По шеталиштето планираме да го средиме Тумбе-кафе, исто така зелена зона, која битолчани ја користат за рекреација. Ќе објавиме конкурс за идејно решение. Целта е главната артерија што минува низ градот, почнувајќи од старата чаршија, безистенот, Широк сокак, шеталиштето, Тумбе-кафе, па се' до Хераклеја, да биде зона што ќе ја краси Битола - рече Талевски.

Шеталиштето е осветлено со канделабри, посадени се дрвја, а при поплочувањето се изработени мозаици според тие во Хераклеја. Дневно го посетуваат стотици битолчани, од млади до најстари.

(Ж.З.)

Промовирани три туристички мапи на чаршијата

На мапата се исцртани сите улици, како и локациите на дуќаните и на занаетчиските работилници

Општина Чаир во соработка со Про кредит банка вчера ги промовираше туристичките мапи на Старата скопска чаршија. Мапите ќе бидат лоцирани на три места во чаршијата, на влезот кај стоковната куќа „Спридер“, кај Бит-пазар и во близина на споменикот на Скендер-бег. На нив сите посетители и туристи, на три јазици, албански, англиски и македонски, ќе можат да се информираат за најважните знаменитости и културно-историски споменици што треба да се посетат. На мапата со димензии 1,5 на 1,2 метри, поставена во висока дрвена рамка се исцртани сите улици и нивните имиња во чаршијата, како и локациите на дуќаните и занаетчиските работилници. Целта на проектот, според општинарите, е запознавање на туристите со знаменитостите на чаршијата, привлекување поголем број посетители и подигнување на вредноста на чаршијата.

„Поставувањето на туристичките мапи е една од активностите во процесот на ревитализацијата на чаршијата. Во блиска иднина планираме отворање инфокиосци или канцеларии во кои ќе се дели и промотивен печатен материјал“, истакна Муса Зука, претседател на Советот на Општина Чаир. Покрај овие табли, наскоро ќе бидат поставени и нови, во помали димензии, покрај спомениците со повеќе податоци за нив. (С.Н.)

Во општина Аеродром се поставени 600 заштитни огради. Тие деновиве беа монтирани на повеќе локации во населбата Јане Сандански, покрај супермаркетот „Веро“ и низ булеварот Србија. Заштитни огради ќе се поставуваат и по целата должина на булеварот Јане Сандански на страната на ТЦ „Бисер“, како и на тротоарот спроти „Веро“. Оградите Општината ги поставува на зелени и на јавни површини, за да се спречи непрописното паркирање возила. Локациите се одредуваат според приоритетот одреден од стручните служби, како и врз основа на поднесените барања од жителите на Аеродром. Паралелно со поставувањето на заштитните огради, ќе се поставува и друга урбана опрема, односно клупи, кошници за отпадоци, чешмички за пиење вода.

А.В.