Булевар Македонска Војска

Ќе се гради улицата „Македонска војска“ во Ѓорче Петров

Камен-темелникот ќе биде поставен денеска покрај црквата „Свети Петар и Павле“

Градоначалниците на Скопје и на Ѓорче Петров, Трифун Костовски и Сокол Митровски, денеска свечено ќе го означат почетокот на изградбата на улицата „Македонска војска“. Камен-темелникот ќе биде поставен покрај црквата „Свети Петар и Павле“ во Ѓорче Петров, а ќе го освети архиепископот г.г. Стефан. Улицата со вкупна должина од 2,1 километар ќе се гради во две фази. Во првата фаза ќе се пробијат 900 метри, од улицата „4 Јули“ до улицата „Ѓорче Петров“. Во втората фаза, последните 1,2 километри со новата сообраќајница ќе го поврзат стадионот на фудбалскиот клуб Македонија. Улицата ќе има две ленти, широки по 5 метри, атмосферска канализација, тротоари и улично осветление. Иако првичната идеја беше „Македонска војска“ да биде булевар со 4 ленти, во интерес на финансиите и брзината на реализацијата, во општината сметаат дека и улица со овој профил ќе ги задоволи потребите на граѓаните и на стадионот.

Инвеститор на проектот е Градот Скопје, кој за првата фаза од буџетот има издвоено 21 милион денари. Втората фаза треба да се заврши до крајот на годинава, а финансии ќе се бараат со ребаланс на градскиот буџет. Проектот пред две години го изработи Општина Ѓорче Петров, а градежните работи ќе ги изведува фирмата „Гранит“.

„Изградбата на улицата е приоритет за општината, особено за фудбалскиот клуб Македонија, бидејќи за меѓународни, но и за домашни натпревари нема соодветен пристап до стадионот. Со изградбата, конечно, ќе се реши тој проблем. Општината веќе неколку години има готов проект, а се чекаше градската власт да обезбеди пари“, вели градоначалникот на Ѓорче Петров, Сокол Митровски. (С.Н.)

Улицата "Македонска војска", која води покрај црквата Свети Петар и Павле во Ѓорче Петров, од улицата "4 Јули" до стадионот Македонија, во должина од 1400 метри, ќе стане булевар. Вчера почна изградбата на првите 400 метри. Ќе се асфалтира десната сообраќајна лента широка седум метри меѓу подвозникот Ѓорче Петров и главната улица Ѓорче Петров. Паралелно со улицата ќе се гради пешачка патека и ќе се поставува улично осветлување.

Свечениот почеток на градежните работи го благослови архиепископот охридски и македонски г.г. Стефан. Градоначалникот на Општина Ѓорче Петров, Сокол Митровски, истакна дека новата сообраќајница во голема мера ќе го олесни пристапот на ѓорчепетровци до клучните институции во општината, како што се здраветвениот Дом, Полициската станица, верскиот храм, централниот парк, шопинг-центарот, спортските објекти и реонскиот центар, кој постепено го добива својот современ лик.

- Исто така, ќе биде овозможена и брза и ефикасна комуникација на скопјани кои во иднина ќе ги посетуваат фудбалските натпревари на стадионот Македонија - додаде Митровски и се заблагодари на градските власти и скопскиот градоначалник што покажале слух и почнале со реализацијата на долгоочекуваниот проект.
За изградба на првата фаза од сообраќајницата Градот ќе издвои 25 милиони денари.

http://vecer.com.mk/?ItemID=E884A6D861A22B43A86E1E2DBC5CCEF1