Урбанистички планови и парцели (општо)

На неродена пруга, урбанистички план и кројат

Општината нема 100.000 евра за нов детален план, откако пред 13 години залудно потроши 50.000 евра за план што пропадна поради промената на трасата

Општината Крива Паланка нема пари сама да инвестира во нови урбанистички планови, кои и' се неопходни за да го среди хаосот во градот предизвикан од долгогодишното недефинирање на железничката траса што треба да минува низ ова подрачје. Откако, по цели 13 години години, беше донесено ново идејно решение за пругата низ градското подрачје, создадени се услови за изработка на новата документација, но на локалната самоуправа и' требаат најмалку 100.000 евра за да се направат потребните измени и дополнувања. Таа еднаш веќе вложи 50.000 евра за изработка на детаљниот урбанистички план, кој пак, во последен момент не можеше да се примени поради промената на трасата низ Крива Паланка. Ќе бараат помош од државата.

- Во 1995 година државата ја финансираше изработката на новиот генерален план за градот, а општината - на деталниот план за десниот брег од Крива Река, според тогашното решение за т.н. висинска траса на пругата низ градот. Тие беа изработени до завршна фаза, со согласност од надлежните институции, но, во последен момент, државата донесе одлука трасата повторно да се смени, така што новоизработената планска документација пропадна. Парите беа залудно потрошени, не по наша вина, а оттогаш цели 13 години чекавме ново решение за пругата. Граѓаните секојдневно реагираат за штетите што ги трпат. Без помош од државата нема да можеме да го решиме овој огромен проблем, кој е кочница за целокупниот развој на градот - вели Добривој Николовски, раководител на Секторот за урбанизам, комунална инфраструктура и заштита на животната средина.Нови урбанистички решенија се потребни и за генералниот план за целиот град, на кој не се направени измени и дополнувања уште од 1989 година, и за 120 хектари за деталниот план за десниот брег, кој е стар 30 години.

Роза Петкова

Пазарот „Буњаковец“ ќе стане затворен пазар со сопствен паркинг, кога на Партизанска, во делот пред пазарот, ќе се изградат објекти високи до 26 метри, а ќе се пробијат и неколку слепи улички. Со новиот детален урбанистички нацрт-план за Дебар маало 2, кој во моментот е на јавна анкета пред граѓаните, покрај овие, се предвидени и измени во парцелите, со кои на сопствениците им е овозможено самостојно да градат до височина од дваесетина метри. Планот предизвика огромен интерес кај жителите од населбата, кои во голем број доаѓаат во урбаната заедница „Дане Крапчев“ од каде што потврдуваат дека за првите неколку дена примиле педесетина забелешки. Една од нив се однесува на новата уличка, која ќе се пробие зад пазарот за да се овозможи пристап до него. Жителите што имаат имоти во овој дел беа гневни поради ваквото решение за кое во урбаната заедница им објаснија дека ќе се реализира со одземање на површина од нивните дворови. - Властите на Општина Центар се, навистина, арогантни, кога по којзнае кој пат ја цртаат оваа уличка врз нашите имоти - револтирано се бунеше семејство од населбата Дебар маало. Пазарот се предвидува да биде сместен во објект со висина до пет метри, кој ќе овозможи и подземно паркирање. Надлежните од секторот за урбанизам во Центар велат дека по вторпат се предвидува затворен пазар на локацијата, но дека неговата реализација зависи само од сопственикот „Скопски пазар“. Според општинарите, објектот морале да го вцртаат затоа што немало друг начин како да се означи дека на местото има пазар. На аголот на булеварите Свети Климент Охридски и Партизански одреди, спроти Соборниот храм се планира станбен објект со сличен габарит на тој што сега се гради до „Порта Буњаковец“ и со висина до 26 метри. Високите градби се дозволени и на Ленинова и на Орце Николов, а во внатрешноста на маалото тие се снижуваат и се дозволува изградба на приземје, три ката и станбен дел под покривот бидејќи објектите излегуваат на улици со помал профил. Планот предвидува да се пробие улицата Дебарца, која се прекинува зад пазарот „Буњаковец“ и да излегува на Партизански одреди, а уличките Коле Неделковски и 8 Март да се пробијат на Илинденска. Според надлежните од секторот за урбанизам во Центар, деталниот план се донесува поради нискиот процент на реализација на претходниот. Сличните планови на општинските власти за високи згради издигнати на големи парцели веќе се остварија во другиот дел од Дебар маало, како на улицата Владимир Мајаковски каде што новоградбите целосно ја задушија уличната мрежа.

Седум објекти-дивоградби

Во планот дури седум објекти од населбата се означени како дивоградби. Меѓу бесправно подигнатите градби се обележани и зградата во која е сместено кафулето „Бастион“ и таа отспротива. Во секторот за урбанизам не појаснија дали целиот објект се смета за дивоградба или само некој негов дел. Тие велат дека кај овие градби има одредени отстапки, па поради тоа се обележани како нелегални, но ниту општината ниту планот предвидува дали треба да се урнат. Само додаваат дека ќе го чекаат Законот за легализација на дивоградби.

Пет хотели и катна гаража ќе се градат под Кале

Советот на Центар денеска ќе гласа за ДУП-от кој е дел од владината приоритетна програма

Деспина Трајковска

Пет хотели, катна гаража и спортски комплекс со апартмани и спортски терени сместени под Кале крај Вардар. За ваков изглед на овој реон денеска ќе гласа Советот на Општина Центар.

Деталниот урбанистички план „Централно зеленило покрај река Вардар - Парк 2“, кој ќе се најде на разгледување пред советниците, е дел од владината програма за приоритетна изработка на урбанистички планови. Тој опфаќа површина од 19,79 хектари земја која во најголем дел е во државна сопственост. Државата ја финансираше изработката на планот кој се донесува по скратена постапка со цел, како што напомнуваа досега од Министерството за транспорт и врски, економски развој и привлекување странски инвестиции, а наедно и за урбанизација на досега неразвиените подрачја во Скопје.

Речиси целиот план за реонот предвидува изградба на нови објекти, единствено се потврдува и се планира надградба на резиденцијата на поглаварот на МПЦ, а планот овозможува и изградба на нови содржини во функција на постојните верски објекти. Петте хотели, пак, е предвидено да бидат распоредени еден до друг крај брегот на Вардар, три од нив ќе можат да достигнат максимална висина од 14,5 метри, а два од 11 метри, односно ќе бидат на три, односно два ката. Катната гаража е предвидено да има осум подземни нивоа и капацитет од 1.960 возила, додека објектите во спортскиот комплекс ќе можат да достигнат висина до осум метри. Во овој комплекс, планот дозволува изградба на спортско-рекреативна сала, придружни објекти во функција на спортот, отворени спортски терени и привремено сместување. Државата планира градежните парцели да ги отуѓи преку јавна лицитација.

Инаку, дел од земјиштето наменето за изградба на три од петте хотели беше понудено на продажба уште во 2006 година. Некои од учесниците на лицитацијата поднесоа жалби, по што отуѓувањето „заглави“ и се' уште нема официјални информации што се случи со него. Како што неодамна информираа од Министерството за транспорт, сите предмети се во судска постапка, се испитува дали продажбата е извршена во согласност со сите закони и прописи. Иако се очекуваше, тогаш на лицитацијата не учествуваше ниту едно познато име од хотелиерскиот бизнис. Две парцели купи фирмата „Гемак трејд“ од Скопје, сопственост на Енвер Малиќи, а една Ејуп Алими, кој понуди 10.050 денари за квадрат. Претставникот на „Гемак трејд“ тогаш изјави дека немаат решено што ќе прават со земјиштето, но навести дека најверојатно ќе градат луксузни хотели.