Црква на Плоштад Македонија

Поделени стручни мислења за изградба на црквата

Емилија Јовановска	Коментари (0)

Негативното мислење на Градот за изградбата на црквата на плоштадот Македонија е грешка, непознавање на историјата и на инфраструктурните решенија на метрополата, смета архитектот Вангел Божиновски.

„Се што прави Градското собрание, оваа гарнитура, си става само минус кој историски ќе им биде неизбришан. Таква работа, на кое и да е друго место, во која и да е друга држава, Градското собрание ќе ја поддржи“, изјави Вангел Божиновски, архитект.

Изградбата на црквата нема да го затвори и загуши плоштадот Македонија. Напротив, со овој сакрален објект кој може да опфати површина од 600 метри квадратни и височина на камбанаријата од 50 метри, плоштадот ќе добие идентитет, вели Божиновски.

„За загушување, што ќе загуши? Ќе го затвори плоштадот? Ќе ја оформи потковицата. Тоа отсекогаш било тема и ние сме разговарале на различни начини да биде вака или онака. Темата да се изгради црква, како архитекти сто пати е разговарана, имало варијанти да биде пак на тоа место“, рече Вангел Божиновски.

Професорот Владо Поповиќ, пак, тврди дека постојаните измени на деталните урбанистички планови носат само лоши архитектонски решенија. Спорна е локацијата на која е предвидено да се гради црквата.

„Прво просторот не дозволува, многу е мал. За да изградите тука, треба некоја црква која ќе биде помала по димензија, а повисока за да во тој волумен излезе некако, затоа што околните згради се високи, но тогаш ќе потсетува на катедрала, а не на овие рано-византиски цркви како нашите што се“, вели Владо Поповиќ, архитект-урбанист.

Идејата за изградба на црквата на плоштадот Македонија е на Владата. Веќе е направено идејно решение по конкурсот кој го распиша Министерството за култура.

Еден од основните услови на конкурсот беше црквата да го зачува изгледот на македонските православни храмови.

Градот немоќен да ја запре изградбата на црквата

Црквата најверојатно ќе се гради и покрај негативното мислење за ДУП

Деспина Трајковска


Министерството за култура одбра идејно решение за црквата на плоштадот и покрај несогласувањето на Градот со последните корекции за урбанистичкиот изглед на центарот на Скопје. Најдоцна за две недели ќе биде познат конечниот изглед на црквата на плоштадот „Македонија“. Министерството за култура го избра трудот на авторите Искра Атанасова и Владимир Лековски, како најблизок до бараните критериуми, кој доби трета награда, но со сугестии за негова доработка. Според Елизабета Канческа- Милевска, државен секретар во Министерството за култура, во избраното решение некои елементи треба да се усогласат во согласност со црковните канони. Тоа како облик било најблиско до бараните критериуми, иако во целост не ги задоволило строгите архитектонски и верски елементи. Откако решението ќе биде коригирано, ќе се пристапи кон скратена постапка за изготвување изведбен и главен проект.

„Авторите на третонаградениот труд ни дадоа гаранција дека имаат искуство и во изготвување на неопходните преостанати фази за проектот, така што одлучивме се' понатаму да се одвива по скратена постапка и до крајот на годината храмот да почне да се гради“, вели Канческа-Милеска, која не сака да ги коментира превирањата на релација Град Скопје и Општина Центар околу ДУП „Мал ринг“, кој претрпе наменски корекции за потребите на планираниот црковен објект. Додава дека тоа го остава на надлежните и се надева дека, како што вели, настанатите недоразбирања ќе бидат надминати.

Веќе е познато дека уште пред неколку месеци, кога општинарите од Центар „тазе“ изменетиот ДУП повторно почнаа да го коригираат за да ја вметнат црквата, од Градот реагираа дека измените се спротивни на ГУП. Градските власти укажаа дека урбанистичката подлога за верскиот објект на плоштадот е несоодветна, пред се', од сообраќаен аспект. Во меѓувреме, од Центар го повлекоа планот на доработка, но и потоа ништо не сменија во однос на црквата. Напротив, нацртаа нова маркичка за градба на левиот брег на Вардар пред Комерцијална банка, за која, според градските власти, исто така постојат недоречености во поглед на сообраќајното решение. Градот дефинитивно даде негативно мислење во однос на измените на ДУП, но дали тоа ќе се земе предвид, од Центар не кажуваат ни збор.

Градските власти, преку Партиципативното тело за урбанизам, минатата недела најавија оти ќе побараат средба со општинарите и со Министерството за транспорт и врски за да се надминат настанатите проблеми. Досега средбата не е одржана ниту, пак, има најави за нејзино одржување. И покрај се', од Градот се свесни за немоќта да ги сопрат општинарите од Центар во урбанистичките проекции не само за црквата туку и воопшто за урбанизацијата на централното градско подрачје. Недореченостите во законот, како и измешаните ингеренции, не се реална пречка проектот за црквата Општината, односно Владата, да си го истера по свое. Дека Општината не го почитува мислењето на Градот за урбанистичките планови се докажа и за ДУП „Голем ринг“, кога, и покрај негативното мислење за стокатниците спроти „Холидеј ин“, општинарите урбанистички го испланираа реонот според својата замисла.