Ски центар Кожуф

Странците го откриваат Кожув

Околу 1.000 Грци,Французи,Холанѓани и домашни скијачи викендов уживаа, се скијаа, шетаа и пиеја кафе во највисокиот ресторан во Македонија, во недопрената природа на планината

Еднодневно користење на услугите на ски-центарот чини од 400 до 800 денари, во зависност од тоа колку ски-лифтови се во функција

Грци, Французи, Холанѓани и најмногу домашни гости викендов уживаа на скијачките терени и во недопрените предели на планината Кожув. Тие се одушевуваа од убавините на македонскиот бисер, како што го нарекоа најмладиот скијачки центар во Македонија. Повеќе од 1.000 посетители се рекреираа во центарот, кој засега е отворен од четврток до недела. Меѓу скијачите беше и тетовецот Љубиша Божиноски. Иако Попова Шапка му е на само 18 километри тој поминал 250 километри за да скија на Кожув. Тука беше со семејството и со пријателите, како што рече, да ги запознае условите за скијање во новиот ски-центар.

- Има прекрасна природа и се гледа дека е многу направено од луѓето што решија Кожув да му го покажат на светот - ни рече Божиноски.Тој има 46 години, а вели дека скија веќе 40. Некогаш бил натпреварувач, а сега овој спорт му е само хоби. Првите спустови со него ги правеше и неговата тригодишна ќерка Мила, а ќерката на неговите пријатели Серафимовски од Тетово, која има 5,5 години, скијаше на патеката под жичницата која е само за најискусните. Божиновски, како натпреварувач вели дека ги видел повеќето од зимските центри на Балканот и смета дека Кожув има голем потенцијал.

- Најмногу можам да направам паралела со Попова Шапка. Таму има природа, но лично сметам дека таму е застанат развојот пред 20 и повеќе години. Овде се гледа дека се работи, ентузијазмот се гледа насекаде. Од Скопје до Смрдлива Вода кај Гевгелија има 175 километри, а оттука до ски-центарот има уште 13 километри по асфалтиран, но технички пат. Претставник на центарот во Смрдлива Вода информира за условите на патот кој е широк 4,5 метри. Тие што не сакаат да продолжат со свое возило, можат тоа да го сторат со минибуси на ски-центарот за сто денари.

- Заради безбедносни причини, до 12 часот движењето е само нагоре, а потоа до 16 часот само надолу кон Смрдлива Вода - велат од центарот. Меѓу многубројните скијачи на терените имаше и многумина со санки.

- Целиот живот работиме по лозјата, па еве сега кога веќе го имаме Кожув, дојдовме да подишиме чист воздух. Не знаеме да скијаме, па затоа носиме санки. За нас е доцна, но нашите деца ќе можат да ја почувствуваат убавината на скијањето - ни рече гостин од Криволак. Еднодневно користење на услугите на ски-центарот чини од 400 до 800 денари, во зависност од тоа колку ски-лифтови и патеки се во функција. За деца од 8 до 14 години се плаќа половина цена, а за најмладите е бесплатно.

На над 2.000 метри надморска височина се наоѓа ресторанот кој е на највисоко ниво во Македонија, а е изграден на местото на кое некогаш била армиска караула. Таму можете да се стоплите, да се напиете нешто и да каснете. Додека се насладувате, слушате за лисицата која доаѓа во одредено време по храната која и' се остава, за мечката со две мечиња чии траги во снегот можат да се забележат околу центарот...

За оние што сакаат да преноќат на располагање им се 100 легла. Во функција е и првата вила со хотелско сместување, сателитска телевизија и интернет. Сместувањето со појадок и вечера чини 25 евра од човек. При крајот на овој месец треба да почне изградбата на новиот пристапен пат до центарот во должина од 17 километри, кој се очекува да биде готов до ноември годинава. Досега во ски-центарот се инвестирани околу 15 милиони евра, а комплетниот проект се проценува дека чини околу 80 милиони евра.