Деловен објект на местото на старата Народна банка

Зградата на плоштадот, конечно, ќе добие темели

Инвеститорите досега работеле на дислокација на подземната инфраструктура

Дури една година откако стартуваа активностите околу изградбата на деловната зграда на аголот на кејот, наскоро ќе бидат поставени темелите на објектот. Местото на некогашна Народна банка беше заградено лани во октомври кога почнаа и ископувања на теренот. Инвеститорите тврдат дека и досега работеле, но на дислокација на подземните инсталации, што неочекувано им одзело многу време. Велат дека подземната инфраструктура сега целосно е дислоцирана, а тоа е процес кој бил главна причина поради која, и по речиси една година, се' уште не се поставени темелите на објектот.

„Не се точни шпекулациите дека работите на терен одат бавно, бидејќи сме немале пари. Напротив, планираме за дваесетина дена да поставиме камен-темелник на објектот, што значи ќе почне интензивно да се гради. Верувам изградбата нема да се одолговлече, ќе надоместиме со секојдневна интензивна работа. Се надевам дека неочекуваното пролонгирање на почетокот на градежните активности нема да биде причина за пробивање на рокот за изградба на зградата, предвиден за крајот на 2010 година“, вели Александар Ивановски, управител на „Дивелоп“, која заедно со фирмата „Латис“ е инвеститор на деловната зграда вредна десет милиони евра.

Ивановски очекува до март идната година објектот да биде изграден до фаза на карабина. Тогаш, според утврдениот план за работа, ќе почне и изградбата на подземната сообраќајница, која треба да биде единствен сообраќаен линк со новата деловна зграда, а ќе води од киоскот кај „Холидеј ин“ до објектот по должината на кејот. Според проектот, деловната зграда ќе има шест ката, а во делови фасадата ќе личи на некогашниот објект на Народна банка.