Фудбалски тренинг-центар во Ново Лисиче

Четири игралишта ќе бидат со капацитет до 1000 гледачи, а едното ќе биде мини стадион кој ќе собира 3000 гледачи


Министадион со две трибини, четири фудбалски игралишта со по една трибина и еден објект кој ќе биде Управна зграда на Фудбалската федерација на Македонија ќе се градат покрај Кејот на Вардар на потегот од пред спортската сала на МЗТ до Мостот близнак, односно до последната автобуска станица на 5 и 15. Овој проект ќе го реализира Општина Аеродром со поддршка на Агенцијата за млади и спорт и ФФМ. На вчерашната промоција на фудбалскиот тренинг центар во Ново Лисиче, градоначалникот Ивица Коневски најави дека поставувањето на камен-темелникот ќе се случи во првата половина од октомври и дека изградбата треба да заврши за 12 месеци.
- Петте фудбалски игралишта и Куќата на фудбалот се вцртани во Деталниот урбанистички план за локалитетот Ново Лисиче кој опфаќа површина од 35 хектари и е во фаза на донесување, а колку ќе чини изведбата ќе се знае по изградбата - информираше Коневски. Тој рече дека капацитетот на четири игралишта ќе бидат од 800 до 1000 гледачи, а едното ќе биде мини стадион со капацитет од 3000 гледачи.
Директорот на АМС Драган Ѓучевски нагласи дека четирите игралишта ќе се градат во рамките на Владината акција "35 фудбалски игралишта низ државата" и потенцираше дека на новите фудбалски игралишта ќе тренираат професионалните фудбалери, но и сите заинтерсирани граѓани.

- Со изградба на ваков спортски ценатр ќе се овозможат комплетни услови за професионалните македонски фудбалери и за жителите на Аеродром и пошироко за постигнување на подобри фудбалски резултати. Во слободното време терените нема да бидат затворени туку 365 дена ќе им бидат на располагање на сите граѓани за кои верувам дека ќе ја зголемат нивната спортска активност, нагласи Ѓурчевски.
Новиот секретар на ФФМ Игор Климпер изрази задоволство што конечно ќе добијат еден фудбалски комплекс каков што Македонија заслужува и каде ќе се собираат македонските репрезентативци, но ќе се организираат и многу кампови за младите фудбалери, а во центарот ќе биде сместена и "куќата на фудбалот".
Во меѓувреме, Еко-патролата на ЈП Комунална хигиена, засилено патролира и го контролира комуналниот ред на целата локација, која неодамна беше исчистена од дивите депонии.