За да се избегне метежот од с` поголемиот број посетители, раководството на Зоолошката градина напролет ќе почне со градежни активности за отворање на уште една влезна партија. Постојната и единствена е на улицата Илинденска. Паралелно со изградбата на нов влез, надлежните ќе вложат средства и во автоматизирање на постојната капија - наместо сегашните железни врати ќе се постават автоматски.

Портпаролот на оваа институција, Дане Kузмановски, објасни дека размислуваат втората партија да биде отворена од страната на Градското собрание, имајќи предвид дека таму веќе има инфраструктура за такво нешто. Втората опција им е таа да биде од страната на старото ракометно игралиште кое гледа кон влезот на „Луна-парк“. Надлежните биле поттикнати од бројката од 3.000 посетители, регистрирани во минатата сабота, кога беше прв потопол ден по долгата зима. 

- Реално би било инвеститор за новата влезна партија да бараме во мај. Ќе настојуваме вториот влез да биде дури пофункционален и поубав од постојниот, кој е обновувен лани со донација во износ од 70.000 евра - изјави тој, потенцирајќи дека напролет и в лето очекуваат значително поголем број посетители. 

Со ланската реконструкција постојниот влез беше поплочен, натписот сменет, а беа обновени и чуварницата и билетарницата.

Напролет ново вовче, старото ќе се паркира како експонат

Сегашното вовче во рамките на Зоолошката градина, кое служи за забава на најмладите, е амортизирано и расипано, па набрзо ќе биде набавена нова шинска композиција, најавија надлежните од оваа јавна градска установа. Нема да се набави ново вовче, туку половно, односно локомотива и два вагона, како поевтина варијанта. 

- Доколку с` биде во ред со потпишувањето на договорот, наскоро тоа ќе пристигне од Умаг, Хрватска - информира Дане Kузмановски, портпарол на Зоолошката градина.

Старото ќе остане како експонат. Досега, рече тој, неколкупати било поправано, но неуспешно, па не може да продолжи да ја извршува својата досегашна функција. 

Вовчето ќе се купи со донација во висина од 70.00 евра, од еден мобилен оператор. 

Раководството на Зоолошката градина допрва ќе одлучи дали користењето на овој реквизит ќе се наплаќа во рамките на влезницата или, пак, за него ќе се одреди единечна симболична цена.

Анела Петрова