Возен парк (ЈСП - двокатни автобуси)

Автобусите се' уште ја возат тендерската траса

Скопјани сакаат квалитетен и функционален јавен превоз

До крајот на неделата ќе се знае која фирма ќе биде избрана на меѓународниот конкурс за производство на 302 двокатни автобуса, кои Владата ќе му ги подари на ЈСП. Два од нив ќе бидат отворени за туристички разглед и ќе им бидат подарени на Охрид и на Скопје. Во Министерството за транспорт и врски велат дека додека не заврши конкурсот не смеат да ги изнесуваат податоците за понудите на четирите фирми: скопски „Санос“, кинеската групација „Џенгџоу Јутонг“, бугарската фирма „Кинг лонг“ и словачка „ПРЕ-ОС“.

- Законски не смееме да ги изнесуваме податоците додека не биде избрана фирмата со најповолна понуда. Комисијата обично има рок од 20 до 30 дена по отворањето на понудите за да ги разгледа, да ги бодува и да одлучи, иако во согласност со Законот за јавните набавки нема утврдено рок“ - вели Драган Симоновски, портпарол во министерството.Но, во бизнис-круговите долго се шпекулира дека за победник на конкурсот се мести „странска фирма“ зад која стои бизнисмен од Скопје. Според условите, 50 бода носи најниската понудена цена, 30 техничките карактеристики и дизајнот, 15 бода гарантираниот период и 5 бода рокот за испорака.

Дознаваме дека освен словачката фирма, другите три фирми што се јавиле на тендерот - „Санос“, бугарската и кинеската - немале банкарски гаранции, па Комисијата им дала рок од 10 дена за да достават. Според Славе Распашковски, генерален директор на „Санос“, тие ги доставиле сите документи, но досега не добиле известување од Комисијата дека е потребно да достават банкарска гаранција и смета дека на тој начин се опструирани.

- Јас не сум известен за такво нешто. Но, затоа имаме заверен нотарски акт кој е замена за банкарската гаранција со кој со целиот движен и недвижен имот гарантираме за серизоноста на нашата понуда. Сепак ќе се потрудиме и тоа да го исполниме - вели Распашковски .Тој објаснува дека главните компоненти на нивниот автобус (мотор, менувач, осовина, клима) имаат генерална гаранција од четири години, односно двојно повеќе отколку другите понудувачи, како и 12 години на каросеријата и на деловите на шасијата, а другите даваат гаранција од само пет години. Освен словачката фирма и „Санос“, другите две немаат мотор со стандард Евро 5, туку Евро 4. Распашковски истакнува дека тие се единствената фирма што го исполнува условот за ретро-изглед на автобусите и тврди дека ќе бидат изработени од најквалитетни материјали, за разлика од кинеските, на кои по изминати 250.000 километри им е потребен ремонт на моторот.

- Овој проект носи и нови вработувања. Се проценува дека со тоа ќе бидат вработени 300 лица директно во „Санос“ и уште околу 200 кај кооперантите - вели Распашковски.И директорот на ЈСП, Александар Бошковиќ, вели дека би било добро да заживее фабриката „Санос“.

- Кога имаме наше македонско квалитетно, зошто да не го искористиме. Ќе биде полесно и за сервисирање на возилата - дециден е Бошковиќ. Позитивен став за овој производител изрази и скопскиот градоначалник Трифун Костовски, но за нископодни, а не за двокатни автобуси.

Конкурсот за набавка на 302 двокатни автобуса првично требаше да заврши на 1 декември. Министерството за транспорт го продолжи рокот до 20 јануари по барање на дел од фирмите. Конкурсот првично беше објавен во домашни и странски печатени медиуми, првично за набавка на 102 автобуса. Потоа Владата се премисли и распиша конкурс за набавка на 302 двокатни автобуса. Вакви автобуси засега се користат во Лондон, Даблин, Хонг Конг, Сингапур и во Отава.