Булевар Македонија

Во старо-новиот донесен ДУП "Стара железничка", покрај подземниот сообраќаен коридор, облакодери, катна гаража се предвидува и изградба на трговски центар на паркингот помеѓу Музејот на Град Скопје и ТЦ "Рамстор"

На местото на постоечката магистрална сообраќајница Јужен булевар, општина Центар ќе гради катна гаража, модерен подземен сообраќаен коридор, но и повеќе објекти, висококатници од 70 метри (приземје + 20 ката). Ова е дел од донесените одлуки на последната седница на општина Центар околу измените во Деталниот урбанистички план "Стара железничка станица". Измените повторно ги изгласа Советот на општина Центар откако, по иницијативата на професорот Мирослав Грчев, Уставниот суд ја укина последната одлука за истиот ДУП, поради скратената постапка во која беше донесен.

Инаку за изградбата на Јужен булевар под земја, најпрво ќе се бара инвеститор, кој за возврат ќе ја добие парцелата над подземната сообраќајница. Првите неколку ката од објектите кои ќе се градат над подземната сообраќајница ќе се користат за паркиралишта, а предвидено е и изградба на трговски центар на паркингот помеѓу Музејот на Град Скопје и ТЦ "Рамстор", како и изградба на катна гаража зад "Рамстор". Во споредба со претходно предвидениот урбанистички план, во новата замисла на проектантите не е зголемена само катноста на објектите, туку и површината за градба од 150.000 на 213.000 метри квадратни.

При расправата на Советот, се отвори дилемата за тоа колку идниот инвеститор ќе се придржува кон договорот: прво да ја изгради подземната сообраќајница, па потоа да гради, посочувајќи го примерот со објектот (Старата народна банка) на Градскиот плоштад, што е веќе во крајна фаза на изградба, а за што инвеститорот исто така беше обврзан, најпрво да изгради подземна сообраќајница која ќе понира од зградата, а ќе излезе кај хотелот "Холидеј ин". Тоа не се случи, иако Советот ја изгласа таа одлука.

Инаку на јавната анкета за ДУП-от "Стара железничка станица" се доставија само четири анкети со забелешки околу новите измени во планот.

Според ГУП, Јужниот булевар е уреден како сообраќаен коридор со две регулациски линии од неговата лева и десна страна и треба да биде експресна магистрала која ги поврзува Тетово со населбата Ѓорче Петров, да поминува низ Центар, низ населбата Кисела Вода, па кон Драчево. Иако, оваа одамна предвидена сообраќајница досега не се изгради, планерите укажуваат дека на неа се темели сообраќајниот план за градот и е од витално значење за регулирање на сообраќајниот метеж по скопските улици.

http://vecer.com.mk/?ItemID=C87267C965F1074A944639F2C30DC9C6