Градска инфраструктура (општо)

Улицата Македонија конечно готова

Третиот дел од улицата Македонија, на потегот од улицата Даме Груев до Мито Хаџивасилев-Јасмин е пуштен во сообраќај. Со тоа заврши комплетната реконструкција на оваа улица, што Општина Центар ја вршеше во изминативе четири години.Овој дел пролетва третпат беше раскопан поради обнова на водоводната мрежа и поставување нова атмосферска канализација. Со замената на инсталациите, чиј капацитет не ја задоволуваше бројноста на граѓаните и на градбите, ќе се спречат поплавите по секој пороен дожд - велат од Општината Центар. Во рамките на овој проект извршена е и комплетна реконструкција на коцката од коловозот. Лани Центар ги реконструираше тротоарите на овој дел од улицата и постави клупи, канти за отпадоци и комплетно ново осветление.  Поставени се и нови рабници, електрична инсталација и осум канделабри. На тротоарите има и заштитни столпчиња за да се спречи паркирањето на возила, со што ќе се заштити гранитот. Овој дел од улицата доби и девет клупи, шест жардиниери и 11 канти за отпадоци, а засадени се и осум дрвја од видот лириодендрони, какви што има на првите две делници. Клупите имаат сосема нов дизајн, тие се полукружни, но помали - велат општинските власти.

(А.П.)

ОВАА ГОДИНА ПРОЕКТ, В ГОДИНА РЕАЛИЗАЦИЈА

Со проектот се опфатени десет сообраќајни и два пешачки моста, на кои нема да се прават поголеми градежни зафати, односно нема да се интервенира во конструкциите

На Мостот Гоце Делчев има пукнатини, иако пред пет години беше
целосно реконструиран

Градските власти за еден месец ќе распишат јавен повик за изработка на проект за санација на мостовите на реката Вардар. Станува збор за најавеното уредување на коловозните и на тротоарските површини на мостовите, како и за санација на оградите и на осветлувањето. Од Градот велат дека нема да се прават поголеми зафати, односно нема да се интервенира во конструкциите на мостовите. Со проектот се опфатени десет сообраќајни и два пешачки моста.Во Градот велат дека оваа година ќе се изработи проектот, а идната ќе се реализира. Објаснувањето е дека во Буџетот за 2008 година биле предвидени средства само за изработка на проект. Сепак, до реализација на проектот, ќе се одвива тековно одржување на мостовите.Ако во меѓувреме на одредени мостови се појават поголеми оштетувања на тротоарите и на коловозите, истите ќе бидат интервентно санирани. Главна цел е поголема безбедност на возачите и на пешаците. Оваа година извршивме замена на оградата на надвозникот „Дијамант“ во Автокоманда, а беше санирана тротоарската површина и осветлението на мостот кај Народна банка - велат градските власти.

По налог на градоначалникот Трифун Костовски ,Секторот за урбанизам направи анализа за потребата од санација на сите мостови во Скопје. Проектната анализа требаше да покаже во кој обем ќе се санираат мостовите. При правењето на анализата стручните екипи требаше да ја утврдат состојбата на коловозот, тротоарите, оградите, осветлувањето и на конструкцијата на мостовите. Исто така, се правеше процена за времето и за парите потребни за реализација на санацијата. Според извештајот, скопските мостови немаат големи оштетувања.

- Евидентирани се помали оштетувања на коловозите и на тротоарите, слабо осветление и оштетувања на дел од оградите на дванаесетте моста - велат во Градот.На некои од скопските мостови не им е безбедна оградата, имаат искршени тротоари или пукнатини. На Мостот Гоце Делчев, кој иако пред пет години беше целосно реконструиран, сега има пукнатини што оставаат сомнеж за неговата безбедност.Во најлоша состојба е Мостот Обединети нации во Карпош. Пред неколку години градските власти зборуваа како на овој мост му е потребна целосна реконструкција, но истовремено даваа изговори дека не можат никако да најдат пари за таква реализација. На Мостот Слобода кај хотелот „Холидеј ин“ му треба поиздржлива ограда. Таму се чести сообраќајните несреќи при кои возилата ја кршат оградата.

http://dnevnik.com.mk/?ItemID=5582E42B293D5043955ED2CE9EC7423A

Министерството за транспорт и врски информира дека во тек е постапката за категоризација на автобуските станици во државава, преку што ќе се овозможи воведување ред во внатрешниот и меѓународниот автобуски превоз. За целосно категоризирање на автобуските станици во земјава, во Министерството за транспорт и врски е формирана комисија во која членуваат и претставници од општините во  Македонија.

Како што се вели во соопштението од министерството, врз основа на поднесени барања од страна на стопанствениците на автобуски станици, Комисијата за определување на категоризацијата на автобуските станици врши мониторинг на опременоста на автобуските станици согласно Правилникот за потребната опрема и начинот на определување на категоризацијата на автобуските станици кој произлегува од Законот за превоз во патниот сообраќај.

Во Македонија веќе се категоризирани автобуските станици во Скопје и Виница, а до Министерството за транспорт и врски барање за определување на категоризацијата поднеле уште 14 стопанственици на автобуски станици за кои постапката за категоризација е во тек.

Министерството за транспорт и врски ги повикува сите стопанственици со автобуски станици во најкус можен рок да достават барање за определување на категоризацијата со цел доследно применување на Законот за превоз во патниот сообраќај и целосна имплементација на категоризацијата на автобуските станици во Македонија со што ќе се овозможат подобри услови за работење на самите стопанственици, но ќе се обезбедат и подобри услови за граѓаните кои се корисници на автобускиот превоз.

http://www.netpress.com.mk/vest.asp?id=41991&kategorija=1