26 милиони евра за ентериерот и мебелот во Македонска филхармонија

За ентериерни и инсталатерски работи со кои ќе биде уредена внатрешноста на објектот на Македонска филхармонија, Министерството за култура ќе потроши 1,6 милијарди денари, или 26 милиони евра. Ентериерното уредување ќе го изработи австриската фирма „Страбаг“ која деновиве го склучила договорот со Министерството. Од таму велат дека договорот опфаќа комплетно уредување на внатрешните простории со мебел и инвентар и опремување на концертните сали и канцелариите. 

Фирмата која ќе го опреми објектот била и претходно ангажирана од македонските државни институции, па освен тоа што ќе го гради ПЕТ Центарот за позитроска и емисиона томографија до близу некогашна Воена болница, ќе ги изведе и градежните активности за изградба на административниот објект на ЕЛЕМ, кој во неокласичен стил ќе се подигне во некогашниот парк спроти хотел „Бристол“, а по цена од 11 милиони евра.

Изградбата на објектот на Македонска филхармонија, инаку, беше извесно време во стагнација затоа што претходната фирма која беше ангажирана, австриската „Алпине Бау“, прогласи банкрот во меѓувреме. Неколку месеци подоцна Министерството склучи договор со скопската градежна фирма „Гранит“ за привршување на градежните работи кои беа стопирани додека градбата се наоѓаше во фаза на карабина. „Гранит“ ќе продолжи со доизградбата за 5,6 милиони евра, а времетраењето на договорот е во период од осум месеци, кога се очекува и објектот да биде завршен. Камен темелникот, пак, беше поставен во 2009 година и се најавуваше дека проектот ќе финализира за една година. Првичните пресметки предвидуваа дека трошоците ќе бидат околу 5,8 милиони евра, сума која е веќе неколкукратно надмината. 

Архитектонското решение за големата концертна сала на Македонска филхармонија е на Виктор Михајлов и содржи објект со современ изглед. Предвидено е да опфати голема симфониска концертна дворана со околу 1.000 седишта за класична музика, и мала концертна дворана до 300 седишта за експериментални типови на музика.

http://www.plusinfo.mk/vest/130921/26-milioni-evra-za-enterierot-i-mebelot-vo-Makedonska-filharmonija

Новата концертна сала не мрда од фазата карабина

Од Министерството за култура велат дека работите се одвиваат според „предвидениот рок и динамика“, но останува непобитен фактот дека предвидените рокови и динамики одамна се пробиени, а филхармоничарите и понатаму остануваат без толку посакуваната концертна сала. Наместо во нова концертна сала, како што беше најавено, филхармоничарите 70-годишнината од основањето на институцијата ќе ја прослават на сцената на МОБ
ЈУБИЛЕЈОТ НА ФИЛХАРМОНИЈАТА СЕПАК ВО МОБ Македонската филхармонија нема да го прослави јубилејот во новата концертна сала што се гради веќе пет години, иако беше најавено дека објектот ќе биде готов годинава и дека оваа институција свечено ќе ја одбележи 70-годишнината од основањето во новиот дом. Новата концертна сала е единствен објект што се гради со забавена динамика во однос на другите проекти што беа составен дел од „Скопје 2014“ - се гради цели пет години и сѐ уште не е завршена ни карабината. Карабината треба да биде готова до октомври Работата на концертната сала минатата година беше прекината, бидејќи банкротира австриската фирма „Алпине бау“, која на јавен повик за избор беше одбрана за изведувач на градежните работи на карабината на објектот. Помина речиси половина година додека Министерството за култура на тендер не избра нова фирма да ја доврши почнатата карабина. „Алпине бау“ ја замени македонската фирма „Гранит-Скопје“, која од февруари оваа година продолжи да работи на објектот што никако не може да мрдне од фазата - карабина. Од Министерството за култура велат дека работите се одвиваат според „предвидениот рок и динамика“, но останува непобитен фактот дека предвидените рокови и динамики одамна се пробиени, а филхармоничарите и понатаму остануваат без толку посакуваната концертна сала. - Кога ја ангажиравме фирмата за изградба на карабината на концертната сала на Македонската филхармонија не можевме да предвидиме дека таа ќе банкротира. Понудата на „Алпине бау“ беше најдобра, а воедно се работеше и за фирма што важеше за една од водечките во Австрија - велат од Министерството за култура. Фирмата „Гранит- Скопје“, која ја довршува карабината на новата концертна сала, најави дека градежните работи ќе траат осум месеци, до октомври годинава. Досега за овој објект се потрошени 5,14 милиони евра, а за довршување на работите се предвидени дополнителни 4,79 милиони. Изградбата на новата концертна сала ќе чини околу 10 милиони евра. Јубилејот ќе го слават во МОБ Поминаа пет години откако почна изградбата на концертната сала на Македонската филхармонија. Иако во почетокот беше најавено дека ќе биде готова за две години (2011-та), рокот постојано се одложуваше. Последната најава што беше пласирана како дефинитивна беше дека Македонската филхармонија во новиот дом ќе се пресели во 2014 година, кога ќе го одбележи и 70-годишниот јубилеј од основањето. И овој термин ќе биде пробиен. Филхармоничарите, кои повеќе од шест децении свиреа во неакустичниот простор на Домот на АРМ и немаа свој дом, од минатата година поради лошите услови за работи се преселија во Македонската опера и балет и таму ја реализираа концертната сезона. И оваа сезона ќе ја минат како потстанари во МОБ. Некои од музичарите пред неколку години протестираа, незадоволни од динамиката со која се гради салата. Новиот дом на Македонската филхармонија е идејно решение на архитектот Виктор Михајлов. Проектот вклучува голема концертна сала, со капацитет од 1.000-1.200 седишта, и помала, наменета за камерна музика, со 300 седишта. Ова е максимумот, иако салите треба да бидат со флексибилен капацитет. Во новата концертна сала, која се гради на просторот меѓу Факултетот за музичка уметност и Македонската опера и балет, треба да има и простории за вежбање, гардероби, ресторан, продавница за музичка литература и за музика. http://www.novamakedonija.com.mk/NewsDetal.asp?vest=815141519352&id=16&prilog=0&setIzdanie=23251