Новата плажа отворена, старата - заборавена

Градоначалникот Коце Трајановски истакна дека плажата ќе претставува ново културно катче во градот, а на посетителите ќе им понуди пријатно место за рекреација и можност за разладување во топлите летни денови

За градоначалникот Трајановски плажата ќе претставува ново културно катче во градот

Под мотото „На чекор од тебе“ градоначалникот Коце Трајановски викендов ја отвори втората градска плажа „Камени мост“, само една година од отварањето на првата плажа во Градскиот парк, која сега е целосно запуштена и заборавена.

Отворајќи ја новата плажа, градоначалникот Трајановски изјави дека таа ќе им понуди на скопјани место за рекреација, одмор и разладување во топлите летни денови.

- Со овој проект го враќаме духот на Скопје и придонесуваме градот да ја продолжи својата урбана традиција. Градските плажи во поблиското минато биле дел од забавниот и од рекреативниот живот на скопјани, а одењето на плажа било модерно. Плажата ќе претставува ново културно катче во градот, а на посетителите ќе им понуди пријатно место за рекреација и можност за разладување во топлите летни денови - порача Трајановски.

Скопјани се чини не се согласуваат многу со градоначалникот. Според нив, никој не ќе сака да седи на плажа, полна со прашина, зад која се отворени неколку градилишта.

- Веднаш до плажата се градат Уставниот суд, Музејот на жртвите на комунизмот... Не знам кој би сакал и кој би можел да се релаксира додека над него работи градежна механизација. Ќе биде бучно и ќе има прашина. Првата плажа, која се наоѓа на кејот во Градскиот парк, ќе биде попосетена - велат скопјани.
За рестартирање на првата плажа годинава сé уште нема никаков абер. Дали ќе функционира или не - сé уште никој не кажува. Иако лани Градската плажа 1 беше отворена со голем ентузијазам, оваа година дрвените платформи и шанковите се празни и запуштени. Датумот за отворање не е утврден, а не се знае ниту кој ќе стопанисува со шанковите. Минатата година со шанковите на плажата кај Градскиот парк стопанисуваа кафулињата „Кала“ „Змија“, „Тренд“ и „Колосеум“, а за тоа не му плаќаа никаков надомест на градот.

Со кафулињата на новоотворената градска плажа „Камени мост“ ќе работи фирмата „Градска плажа груп - СИЗ Скопје“, односно кафулињата „Бастион“, „Опиум“, „Стоби“ и „Бел груп“, кои плаќаат пет денари за квадратен метар за еден ден, од вкупно 500 квадратни метри корисен простор. Работното време на новоотворената плажа ќе биде од 10 часот наутро до полноќ, што е за еден час повеќе од онаа во Градскиот парк.

Денес пројдов од карши плажа. Освен вработените на шанковите, живо пиле немаше.