Црква на Плоштад Македонија

Костовски стравува дека црквата ќе биде дивоградба

Градоначалникот апелира Уставниот суд конечно да пресече за ДУП „Мал ринг“

Градоначалникот Трифун Костовски има сознанија дека по 15 јануари на плоштадот „Македонија“ ќе почнат да се градат црквата и фонтаната -споменик на Александар Македонски, кои ќе претставуваат дивоградби доколку во меѓувреме Уставниот суд не се произнесе околу законитоста на измените на ДУП „Мал ринг“. Тогаш, смета Костовски, имајќи предвид дека Градот е концесионер на плоштадот, ќе се создадат дополнителни комплицирани ситуации.

„Никој нема право да гради на плоштадот доколку ДУП не е законски, ниту Општина Центар, ниту пак Владата. Барам Антикорупциската комисија и Уставниот суд конечно да се изјаснат во врска со мојата иницијатива, којашто е поднесена уште на 25 јули“, апелираше вчера Костовски, без да прецизира дали и што ќе преземе Градот доколку навистина се остварат неговите сознанија за започнување на градежните работи на плоштадот. Градоначалникот дополни дека одлуката на Уставниот суд за него ќе биде пресудна, што значи ќе ја спроведе и ако не се совпадне со неговиот став. За Костовски, планот кој, покрај изградба на црква и педесетина споменици, предвидува и нова зграда за Уставниот суд, е спорен бидејќи се косел со одредбите од Законот за Град Скопје и Законот за просторно планирање. Од Уставниот суд, пак, завчера информираа дека не можат да предвидат кога ќе биде одлучено дали ДУП е донесен во законските рамки, бидејќи допрва ќе следува седница на која ќе се разгледува последниот акт кој судот го доби за комплетирање на документацијата. Имено, по барање на Уставниот суд, својот став за ДУП завчера го даде Советот на Град Скопје, чие мнозинство одлучи дека планот е донесен почитувајќи ги сите законски одредби. (Дс.Т.)

Грижата на архитектите за естетиката можеби најпрво би требало да се концентрира на зградата во која го печеле занаетот. Исто така, црквата ќе била некомпатибилна со плановите за изградба на подземна сообраќајница. Многу ќе тежела. Е па, ајде да ги срушиме и ГТЦ и ЕСМ, па нема да тежи ништо. Или уште подобро - да ја направиме сообраќајницата надземна. Со десет ленти. Проток невиден.
А што е црквата? Меѓу другото, таа е место каде што секој христијанин (покрај во секојдневието) ја практикува својата вера, се смирува, се соединува со Бога. Ги зајакнува своите духовни вредности, својата вера и посакува мир и љубов. Ќе се најде ли некој „јунак“ што ќе се обиде да образложи зошто не ни требаат градби од овој тип? Кому му пречат црквите? Апсурдот е тому во тоа што критиките доаѓаат од нас самите, од Македонците. Од библиската земја Македонија.
По катастрофата од 1963 година, не им завидувам на оние што треба да смислат кои мотиви да ги употребат на разгледниците од Скопје. И за крстот на Водно имаше мноштво противници, па токму таа градба е најупотребувана во сликите и сувенирите од Скопје. И за улицата Македонија се бунеа што центарот се раскопува, па денес туристите што сакаат да се фотографираат во центарот на Скопје, токму таму го прават тоа.
Кои се белезите на градот, освен Камени мост и Калето? Палатата на Ристиќ? „Дал-мет-фу“? ГТЦ? Студентскиот дом „Гоце Делчев“? Канцелариите на телекомот? Или зградите на „Рекорд“? Естетика каква што нема никаде. Ах, да. За малку ќе ја заборавев. Маркантната зграда во која се школуваат идните архитекти.

Темата е доста активна и на Интернет. Покрај на форумите и на блоговите, македонските младинци на најголемата виртуелна мрежа „Фацебоок“ се сетиле да формираат и своја група, наречена „Не сакам црква на плоштад“. А што сакаат? Џамија?
Ајде нека се индиферентни. Ајде што интимно можеби не сакаат црква. Ама да се закренат да формираат група, агресивно да го промовираат сопствениот атеизам и да убедуваат други луѓе да им се придружат - е тоа „нема ни у Београду“. Навистина, „народ со ваква младина, не треба да се грижи за сопствената иднина“.

Васко Наумовски

(Авторот е доктор на правни науки)