Возен парк (ЈСП - двокатни автобуси)

Поништен тендерот за набавка на 302 двокатни автобуса

Три од четири фирми немале банкарска гаранција, а ниедна не понудила соодветен ретродизајн

Сања Наумовска

Министерството за транспорт и врски го поништи тендерот за набавка на 302 двокатни автобуса. Причина за поништувањето е банкарската гаранција која не ја доставиле три од четирите пријавени фирми. Исто така, ниедна од фирмите не понудила ретродизајн на автобусите, идентичен на „даблдекерите“ кои возеле низ Скопје во педесеттите години.

Набавката на автобуси за јавниот сообраќај во Скопје се поништува трет пат едноподруго. Владата минатата година го поништи тендерот на кој набавуваше 50 единечни автобуси за ЈСП „Скопје“, со цел да набави 102 двокатни. Поништена беше и таа набавка за да се дојде до бројката од 302 двокатни возила. Од Министерството информираат дека наскоро ќе распишат нов тендер, но не соопштуваат никакви детали, дали и понатаму строго ќе се држат до барањата за ретродизајнот, како и дали пак ќе набавуваат двокатни автобуси и во колкав број.

На последниот тендер, единствено словачката фирма „ПРЕ-ОС“ во документацијата имала валидна банкарска гаранција дека нема да се откаже од потпишувањето на договорот. Сепак, ниту Словаците не влегле во конкуренција да го освојат тендерот, бидејќи нивната цена била двојно повисока од сите други понуди. Имено, кинеската „Џенгџоу Јутонг групација“ за 302 автобуса побарала 60 милиони евра, „Санос“ 65 милиони евра, а бугарската „Кинг лонг“, 64 милиони евра. Сумата што ја побарала словачката фирма била 111 милиони евра.

Според информации од Министерството, домашниот производител на автобуси „Санос“ во доставената документација имал само нотарска потврда дека потпишувањето на договорот, ако го освои тендерот, го гарантира со целиот недвижен и движен имот, што за комисијата не било доволна гаранција. Доколку постоела банкарска гаранција и покрај тоа што не понудил најниска цена од сите четири фирми, домашниот производител би бил во игра за освојување на тендерот, велат извори од Министерството за транспорт и врски.

Во „Санос“ вчера не беа официјално информирани за одлуката на Министерството за транспорт и врски. Во компанијата објаснуваат дека нотарскиот акт што го приложиле е доволен гарант за сериозноста на нивната понуда. За банкарска гаранција биле одбиени од Стопанска банка од Битола. Велат, образложение не добиле, иако ги одбиле само неколку часа пред отворањето на понудите. Во барањето за гаранцијата бил понуден целокупниот имот на фирмата, кој е 12 пати поголем од гаранцијата.