Аеродроми

Скопје една од ретките метополи која со години нема редовна автобуска линија до аеродромот Александар Велики во Петровец. Патниците кои патуваат со авион или пак оние кои пречекуваат гости на аеродромот мора да се снаоѓаат за превоз. Најлошо поминуваат туристите кои не се информирани дека не постои терминал, па мора да ги користат такси-услугите кои чинат од 25 евра па нагоре.
- Наплатуваат паушално и ако не се ценкаш, ќе те одерат. Такси-услугите чинат колку авионските билети. Такви цени нема никаде во светов, бидејќи аеродромите се поврзани со редовни автобуски, жлезнички, трамвајски, тролејбуски линии, па патувањето е брзо едноставно и што е најважно евтино, вели еден од редовните корисници на авионските услуги.

Откако пред многу години ЈСП го укина терминалот поради нерентабилност, имаше многу иницијативи за повторно воспоставување на сообраќајна врска. Деновиве барање до Градското собрание за воведување на автобуска линија на релација град Скопје - Александар Велики поднесе советничката група на Либерално-демократската партија.
- Потребно е итно воведување на редовна автобуска линија по која автобусите би се обраќале од центарот на град Скопје до аеродромот и обратно и тоа неколку пати дневно, според редот на возење кој би бил подреден на распоредот на полетување и слетување на авионите на аеродромот. Линијата би била сосема рентабилна имајќи го предвид бројот на летовите, се вели во денешното соопштение од ЛДП, вели Зоран Шапуриќ од ЛДП и воедно му предложи на Советот на Град Скопје да прифати заклучок со кој ќе го задолжи градоначалникот и ЈСП итно да започнат со активностите за воведување редовна автобуска линија на споменатата релација и одвивањето на сообраќајот по оваа линија да започне да функционира во рок од 30 дена од донесувањето на овој заклучок.

Раководството на ЈСП вели дека оваа идеја е веќе разгледувана, деновиве било разговарано и со новиот менаџерски тим на ТАВ, но иако постои расположение, сепак, немаат донесена конечна одлука. "Доколку добиеме барање, ние ќе го разгледаме и верувам дека позитивно ќе одговриме", велат од ЈСП Скопје.

Во моментов автобусите со број 52, 53, 62 и 68 возат од Транспортниот центар до селото Петровец за цена од 35 денари.

Елизабета АРСОСКА
http://www.vecer.com.mk/?ItemID=A41DC32CA397E74AAAA691A1B7E6FB87

Патниците, кои често се странци, се „ограбени“ од такси-возила без таблички, што остава грда слика за тоа како ни е организирана државата во целина

Се чини дека некому одговара што Скопје со години нема директна автобуска линија до аеродромот. На овој проблем укажа и Либерално-демократската партија, која побара од Градот да организира јавен превоз до „Александар Велики“. Иницијативата не е ни прва ни нова, но тешко се реализира. За тоа време, диви таксисти ги „ограбуваат“ патниците, кои често се странци што остава грда слика за тоа како ни е организирана државата во целина.

- Морав да платам 800 денари за да се превезам до аеродромот „Александар Велики“. Од такси-компанијата „Наше такси“ велат дека тоа им била фиксна цена. Не се малку, но немав избор, зашто немаше кој да ме превезе. Дека 800 денари се една убава дневница призна и самиот таксист. Рече дека само одредени такси-возила од нивната компанија ја имале таа привилегија, се жали скопјанката П.Б..

На аеродромот чекаат диви таксисти, кои наплаќаат и по 1.500 денари, односно 25 евра, па дури и повеќе, во зависност од тоа колку авиони ќе слетаат тој ден. Иако на аеродромот се истакнати цените за такси-превозот до секој град поединечно, дивите ја искористуваат неукоста на патниците, особено на странците.

- Мое мислење е дека цената од 700 денари, колку што наплаќа нашата компанија е реална, ако се земат предвид далечината - дваесетина километри и патарината. Проблемот е во тоа што диви таксисти, кои чекаат на аеродромот наплаќаат двојно повеќе. Сметам дека овој проблем би требало да го реши ТАВ, кој сега управува со аеродромот. Тие или ќе распишат оглас или ќе понудат своја такси-услуга, вели Марјан Стојановски, таксист во компанијата „Водно“ .

Претседателот на Групацијата на автотакси-превоз при Стопанската комора на Македонија и управител на такси-компанијата“Коммак-комерц“, Сашо Рајчановски, вели дека се оди дотаму што одредени диви таксисти стојат покрај скопските хотели и склучуваат договор со нив за да имаат ќар и тие и вработените во хотелите.

- Рецепционерот на хотелот му вели на гостинот од хотелот, странец се разбира, до аеродромот ќе ве чини 1.500 денари. Од тие, 1.000 денари одат во рацете на таксистот, а 500 денари за рецепционерот - вели Рајчановски.

Тој објаснува дека ако се викне такси од тие што се регистрирани и имаат лиценца, со петцифрени повикувачки телефонски броеви, повеќе од сигурно е дека патниците нема да бидат излажани ниту оштетени.

- Цената во зависност од видот на такси-возилата и опремата во нив кај одредени компании се движи од 590 до 800 денари, и таа е во ред. Нашиот таксист ви доаѓа дома, ви ги зема куферите, плаќа патарина, паркинг на аеродромот. Од аеродромот назад се враќа празен, бидејќи според законот, такси-компаниите од градот не смеат да земаат патници од аеродромот. Тоа го прават дивите таксисти од територијата на Општина Петровец. Тие наплаќаат двојно поскапо, а некогаш и повеќе, за што не' информираат патници запознати со проблемот - објаснува Рајчановски. Тој смета дека аеродромот треба да преземе мерки.

Градоначалникот на Петровец, Борче Митевски, вели дека 60 таксисти од Општината сообраќаат легално и имале склучено договор со претходната управа на аеродромот.

- Претходно работев на аеродромот како шеф на обезбедување, па многу добро сум запознат со оваа проблематика. Тој проблем е решен уште пред една година. Нашите таксисти имаа договор со претходната управа на аеродромот и поседуваат лиценци. Договорот истекува на крајот од месецот, па се очекува нов со новите управители, на кој ќе се приспособат нашите таксисти - вели Митевски.

Тој негира дека таксистите од Петровец возат по двојно повисоки цени, а вината ја префрла кај дивите таксисти од Скопје.

- На табла на излезот од самиот аеродром е истакната цената по која смеат да возат нашите таксисти. Тоа е 20 евра до центарот на Скопје. Проблемот се' уште го прават неколку диви таксисти од Скопје, кои на паркингот се без табличка што означува такси-возило, а ги прибираат патниците, земајќи им колку сакаат. Со нив не може да се справи ниту полицијата, бидејќи бегаат, објаснува Митевски.