Црква на Плоштад Македонија

Опседнатост со црквата

Се' е подготвено за изградба на црква на плоштадот во Скопје

Храмот ќе претставува спој на традицијата и модерното

Билјана Јовановска

Веќе нема дилеми - ставањето камен-темелник на црквата на скопскиот плоштад ќе се случи кон крајот на месецов или најдоцна во првите денови на мај. Проектот е одамна изготвен, обезбедени се и најголемиот дел од средствата, иако оваа цифра се чува во најголема тајност, а новата црква ќе го носи името на онаа што сега ќе се возобновува - „Свети Константин и Елена“.

Оние кои го виделе архитектонското решение тврдат дека храмот ќе претставува интересен спој на традицијата со модерното. Црквата нема да има тркалезна форма со приоди од сите страни, како што првично се најавуваше, туку ќе биде во облик на крст.

Неофицијално, од владини извори се дознава дека основата на храмот ќе биде 25 на 25 метри, а височината ќе биде во рамките на дозволените димензии. Конкретно, тоа значи дека камбанаријата ќе биде висока 29 метри, односно како десеткатница. Централниот влез ќе биде кај „Дал мет фу“, а олтарот ќе се постави во правецот на Градскиот трговски центар. Црквата ќе има пет куполи, а најатрактивниот дел, тврдат, ќе биде камбанаријата која ќе има улога на кула, каде што по скали ќе можат да се качуваат посетители кои ќе сакаат центарот на Скопје да го гледаат од птичја перспектива.

Фасадата на храмот нема да стрчи во однос на околните згради, но ќе има и парчиња мозаик. Особено внимание е посветено на надворешната илуминација, која ќе ги менува боите.

Во долниот дел, под подот на црквата „Св. Константин и Елена“, ќе има сала каде што се планираат различни активности, од промоции на книги до пригодни концерти. Градбата ќе трае повеќе години, бидејќи станува збор за поспецифична изведба, а веднаш по ставањето на камен-темелникот ќе биде отворена и жиро-сметка за донации од граѓаните, зашто тоа била традиција за сите православни храмови.

Со самиот факт дека црквата ќе биде во епицентарот на Скопје, авторите на проектот чии имиња се' уште не се соопштуваат, воделе сметка таа да претставува своевидна туристичка атракција. Во нејзината градба најмногу ќе се користи травертин од македонските рудници, а камбанаријата најверојатно ќе биде набавена од Русија. За материјалот од кој ќе се изработува олтарот се' уште не се размислува, а тоа важи и за фрескоживописот.

Група граѓани најавуваат претставка поради почитување на процедурата при донесување на ДУП „Мал ринг“

Група граѓани наскоро ќе поднесат претставки до Уставниот суд против иницијативата за изградба на црква на централниот скопски плоштад, Македонија, за кој тој даде зелено светло. Преставката е поради пропусти во процедурата при донесување на Детаљниот урбанистички план „Мал ринг“ од страна на Општина Центар.

- Според тоа што можевме да го видиме, направени се сериозни пропусти во самата процедура поради што сметаме дека одлуката за донесување ДУП е невалидна. Пред се', не е спроведена соодветна јавна расправа, ниту, пак, јавна презентација на планот, што е спротивно на Законот за просторното и урбанистичкото планирање, изјави еден од иницијаторите Мирјана Најчевска.

Најчевска информираше дека друга група граѓани ќе поднесе иницијатива за преиспитување на уставноста на одлуката за финансирањето на проектот за изградбата на црквата од страна на Министерството за култура, што е спротивно на Уставот, кој забранува мешање на државата во работите на црквата.

.......