На слеп колосек со половина од соседите

Македонија е веројатно единствената држава во Европа што нема железничка конекција со две од четирите соседни земји

Ако за патните коридори се вели дека се крвотокот на секоја држава, тогаш Македонија со децении наназад е без крвоток, вегетира како да е самоникнато растение, а не жив општествен организам.

Веројатно затоа и економијата ни е безживотна, млитава и во постојна битка за гол опстанок. На важноста од инфраструктурното поврзување, изградба на железничките и патните коридори постојано укажуваат политичарите, бизнис-заедницата и експертите. Но, за жал, 20 години по осамостојувањето Македонија нема ниту железничко поврзување со половина од соседите.

- Веќе 20 години на Балканот има две држави што немаат железничка врска, немаат авиоврска, имаат многу лоша патна врска, немаат разгранети енергетски врски итн. Се работи за Македонија и Бугарија. Коридорот 8 не е само пат, не е само железница, туку директната врска што ја поврзува целата стока што се пренесува преку Македонија кон Албанија и Италија. Ако Македонија сака да развие трговски односи со средноазиските земји Кина, Индија и Русија, Коридорот 8 е можност да се стигне таму - вели Иван Жерков, раководител на трговско-економскиот оддел на бугарската амбасада. Според него, крајно време е да се почне со изградба на Коридорот 8 и да го избришеме срамот од нашите чела, бидејќи во 21 век немаме контакти и врски меѓу себе. Изградбата на почната траса на пругата кон Бугарија е прекината веќе 8 години и за нејзино довршување се потребни околу 400 милиони евра. И Карло Змајшек, од Здружението на шпедитери, смета дека при железничкото поврзување со Бугарија значително ќе се намалат трошоците за транспорт на домашните компании. Сега практично зависиме од пристаништето во Солун, каде што постојано има штрајкови, што ја одлага испораката на робата и им нанесува големи штети на македонските компании.

Во Министерството за транспорт и врски велат дека за источниот дел од Коридорот 8, односно пругата на потегот Куманово – граница со Бугарија во должина од 89 километри, во тек е постапката за изработка на инвестициско-техничка документација.

- Обезбедени се средства од ЕБОР во висина од 500.000 евра за изработка на студија за оправданост за делницата од Куманово до Деве Баир, граница со Република Бугарија и завршена е постапката за избор на консултантска куќа што ќе ја изработува оваа студија, по што е предвидено да се аплицира за обезбедување финансиски средства за изработка на инвестициско-техничка документација за целата делница - вели Драган Симоновски, портпарол во Министерството за транспорт и врски.

Освен со источниот сосед, Македонија нема ниту железничко поврзување со Албанија ниту, пак, се завршени двата клучни патни коридори 8 и 10. Според процените на експертите, за доизградба и осовременување на патната и железничка инфраструктура се потребни повеќе од две милијарди евра.
- Од стратегиска важност е и поврзувањето на Македонија со Албанија. Поврзувањето може да биде од Струга до Ќафасан, со што се отвора и можност за користење на пристаништата Драч и Валона - смета професорот Зоран Кракутовски.

Должината на железничките пруги во Македонија е 868 километри, од кои отворени пруги се 669 километри. Електрификација е извршена на околу 233 километри отворени пруги, или на 35 проценти од вкупната должина. Нешто подобра, но далеку од задоволителна, е состојбата со патната инфраструктура. Од целокупната патна мрежа во Македонија, на автопатишта припаѓаат 495 километри, од кои се изградени 227 километри, а за изградба преостануваат 270 километри.

До Косово преку тунел низ Шар Планина?

Шефки Идризи, сопственик на компанијата „Ренова“, вели дека за домашното стопанство е најважно да се инвестира во патната и железничката инфраструктура. Тој предлага да се пробие тунел низ Шар Планина, преку кој од Скопје до Ѓаковица би се стигнувало за половина час. Годинава Албанија и Косово се поврзаа преку тунелот Решен - Калимаш, долг 5,6 километри, како дел од автопатот Драч - Кукс - Морино, со кој дистанцата меѓу Приштина и Тирана се скрати за 65 километри.

http://www.novamakedonija.com.mk/NewsDetal.asp?vest=12201094397&id=10&setIzdanie=22162