Локации

На јавниот тендер, кој е отворен за пријави до 10 октомври, е понудена парцела со површина од 6.135 квадратни метри со почетна цена од 6.000 денари. Во април, квадрат на истото земјиште беше 25.000 денари

Со четири пати поевтина цена Министерството за транспорт и врски ќе ја продава парцелата за изградба на деловно-комерцијален објект спроти ТЦ Бисер во Аеродром. На јавниот тендер, кој е отворен за пријави до 10 октомври, е понудена парцела со површина од 6.135 квадратни метри со почетна цена од 6.000 денари за метар квадратен. Во април, истото земјиште беше понудено за продажба, но со почетна цена од 25.000 денари за квадрат, но тендерот пропадна поради тоа што Комисијата констатирала непотполна документација на единствениот пријавен купувач.

Тогаш, имаше поплаки до комисијата поради енормно високата почетна цена и поради престроги услови од јавниот повик. Домашни фирми реагираа дека е економски нелогично квадрат земја во Аеродром да се продава неколкупати поевтино од центарот на Скопје, каде почетната цена за квадрат земјиште зад Рамстор, на пример, беше 8.500 денари. Објаснувањето од надлежните од ресорното минстерство беше дека разликата во цената произлегува од различните услови, но уште тогаш најавија дека ќе се разгледа опцијата за намалување на цената за следното наддавање. "За земјиштето во Центар беа дадени многу поригорозни услови затоа што очекуваме да се јават сериозни странски инвеститори кои брзо ја надминаа почетната цена. Таму квадрат се продаде 25 илјади денари", повторија од Министерството. Во овој повик останаа и условите заинтересираната фирма да поседува најмалку пет деловни или комерцијални објекти и капитал од најмалку 500 милиони евра искажан во финансиски извештај.