Надземни и подземни пешачки премини

За изградбата на пешачкиот мост што ќе биде поставен на булеварот Крсте Петков-Мисирков и ќе го поврзува Бит-пазар со поликлиниката, инвеститорите за возврат ќе бараат само поставување нивни рекламни табли, соопштуваат од општината Чаир. Одлуката за изградба на овој натпатник градоначалникот Изет Меџити ја донесе на последната средба со градските власти, кога се договорија и повеќе други проекти што треба да се реализираат во наредниве шест месеци. Паралелно градот ќе ја реконструира и клучката кај Бит-пазар, која треба да добие форма на детелинка.

ПОКРИЕН МОСТ СО ЛИФТОВИ

Од општината Чаир велат дека деновиве се подготвува привременото сообраќајно решение за да може да се направи пешачки мост кај Бит-пазар според проектите за натпатници што ги подготвувал градот. Со тоа, тие се надеваат дека ќе се реши проблемот со пешаците што го поминуваат булеварот Крсте Петков-Мисирков кон пазарот. Градските власти ќе го помогнат овој проект со идејно решение, а ќе направат и бетонски жардиниери меѓу двете сообраќајни ленти на булеварот и ќе го уредат просторот хортикултурно.

- Натпатникот ќе се изгради меѓу пазарот и поликлиниката, а ќе биде направен од бетонска и од железна конструкција. Тој ќе биде затворен, а од страните ќе поставиме лифтови со кои ќе им овозможиме на постарите и на болните полесно да се качат на мостот. Овој пешачки мост е предвиден во деталниот урбанистички план, а кога ќе биде готово сообраќајното решение веднаш ќе можеме да почнеме со изградбата. Инвеститорите што ќе го финансираат поставувањето на натпатникот за возврат ќе бараат поставување на нивните рекламни табли, кои ќе бидат најверојатно прикачени од страните на мостот - објасни Изет Меџити, градоначалникот на општината Чаир.

НЕПРООДЕН БУЛЕВАР

Додека профункционира клучката кај хотелот „Континентал“, овој булевар ќе остане единствен булевар што го спојува северниот дел на градот со центарот. Таму постојано има застој во сообраќајот, а граѓаните не можат безбедно да преминат од едната на другата страна, поради што се случуваат и голем број несреќи.

Граѓаните што живеат од двете страни на булеварот се жалат дека понекогаш се случува да не можат да ја преминат улицата поради големиот број возила, трите градски и приградски автобуски станици, како и заради големата раздвиженост на луѓето. Тие велат дека Бит-пазар е место каде што во текот на денот поминуваат луѓе од сите делови на градот и каде што автобуските линии се вкрстуваат, па затоа и метежот е преголем.

- Јас сум постара жена и постојано одам на прегледи во поликлиниката Бит-пазар. Но ми треба половина час за да стигнам дотаму. Кога ќе излезам од зградата има многу диви продавачи и треба да се пробијам меѓу нив и импровизираните тезгиња за да стигнам до улицата. А таму, пак, сообраќајот е толку густ што ми претставува напор и ми треба многу време за да поминам.

Се случува да застане еден автомобил, но тој зад него е нестрплив и веднаш го престигнува, па затоа треба да се внимава. Не знам зошто досега општината не направи некое решение за да можеме ние постарите и децата да поминуваме безбедно. Се надевам дека со изградбата на натпатникот ќе се решат овие проблеми - вели скопјанката Славица Илиевска.