Кинеската компанија "Јутонг", која го доби тендерот за изработка на 202 двокатни автобуси за градскиот превоз во Скопје собрал најмногу награди на меѓународниот саем што се одржал минатиот месец во Шангај. Во конкуренција на голем број производители на автобуси, Јутонг" на саемот се претставил со 7 автобуски модели и ги освоил шесте награди: за изработувач на автобуси на годината, награда за иновации, награда за безбедност на автобусите, награда за зачувување на животната средина, награда за најдобри БРТ автобуси и престижната - Гранд БААВ награда за најдобар автобус.

Според образложението што е презентирано на официјалната веб-страница на компанијата наградата изработувач на автобуси на годината е највисока и највлијателна меѓу наградите, која ги проверува претпријатијата-кандидати во однос на управување со претпријатието, иновации на производи, моделот на маркетинг, рангот на претпријатието итн.
- Затоа, оваа награда е исто така, најконкурентна и посакувана од страна на многу производители на автобуси. Софистицираните производи на Јутонг" и исклучителниот придонес за автобуската индустрија придонесе за освојувањето на оваа висока почесна награда, се вели во образложението.

Јутонг" е претходник и лидер на автобуската индустрија во Кина. Производител е на возила за многу странски пазари како Куба, Русија, Иран, Саудиска Арабија, Хонг Конг, Макао, а од следната година и за Македонија.

Прототип од двокатните автобуси, новогодишен подарок за скопјани

Возилото ќе се пушти во сообраќај заради проверки на терен, по што би почнало сериското производство

Деспина Трајковска


Околу Нова година се очекува по скопските улици да се провози првиот произведен двокатен автобус на кинеската компанија „Јутонг“, која треба да ја реализира државната набавка на 202 автобуса, инвестиција вредна 35 милиони евра. Прототип-возилото е во завршна фаза на изработка, а се подготвува и уште едно возило кое ќе биде испратено на тестирање, односно хомологација во Германија.

Кинезите го финализирале дизајнот на автобусите, за кој е дадено одобрение од Министерството за транспорт и врски и од ЈСП. Иако се' уште не откриваат како ќе изгледаат 202 даблдекера, од компанијата посочуваат дека станува збор за ретродизајн, речиси истиот што го презентираа на отворањето на понудите, слично на автобусите што возеле низ Скопје во 50-тите и 60-тите години од минатиот век. Од ЈСП потврдуваат дека автобусите ќе бидат со металик црвени страници и покрив во драп боја.

Во досегашната комуникација на градското сообраќајно претпријатие и „Јутонг“, потврдени се техничките карактеристики, всушност, оние што се бараа на тендерот. Кинеските двокатни автобуси ќе користат мотор еуро 4, ќе имаат дигитален такограф, автоматска рампа, ќе имаат по 60 седишта за седење и 20 места за стоење и целосно ќе бидат „покриени“ со систем за разладување и затоплување.

„Со компанијата сме во зачестена комуникација и по потпишувањето на договорот, претставници од ‘Јутонг‘ два пати беа во посета кај нас за да ги дефинираме техничките карактеристики. Без никакви сомнежи може да кажам дека се' се одвива според планот и потпишаниот договор. Има најави дека околу Нова година ќе пристигне прототип-возилото кое ќе се пушти во сообраќај со цел да се извршат и последните проверки на терен, за потоа да почне сериското производство на сите предвидени 202 возила“, вели Мишо Николов, директор на ЈСП „Скопје“.

Од Министерството за транспорт и врски потврдуваат дека веќе го исплатиле авансот од 3.542.541 евра, што е 10 отсто од висината на целата набавка.

Тоа дека се' се одвива според предвидената динамика, потврдуваат и од „Јутонг“. Велат дека нивни инженери во изминатиов период два пати ја посетиле државава за да продискутираат со надлежните околу одредени детали со цел автобусите да бидат приспособени на локалните услови.

„Во меѓувреме е финализиран и дизајнот и тој беше одобрен од Министерството за транспорт и од ЈСП. Сега се работи на прототипот што треба да биде готов до крајот на месецов. Во средина на октомври ќе ги поканиме претставниците од Министерството и од ЈСП да дојдат во Кина и да го видат прототипот. Со цел да се осигура квалитетот, прототипот дополнително ќе биде тестиран според ЕЦЕ регулацијата“, информираат од „Јутонг“.

Според потпишаниот договор, првите 66 двокатни автобуси треба да се испорачаат до крајот на идната година, а во наредните две години да стасуваат по 68 даблдекери. Државата ќе ги исплаќа возилата по секоја испорачана тура со средства од државниот буџет обезбедени од три фискални години.

Кинеската компанија „Јутонг“ ја доби зделката дури во петтиот обид на државата да ја реализира предвидената набавка откако претходните тендери беа поништувани поради нецелосни понуди, а првично и поради зголемување на бројот на бараните возила. Два од 202 двокатни автобуса ќе бидат со отворен покрив и ќе се користат за туристичко разгледување. Еден од нив ќе се подари на Охрид за развој на туризмот.

Напролет доаѓа прототипот на двокатните автобуси

До крајот на годинава треба да биде завршено дополнителното тестирање на автобусот, а од Кина во Македонија ќе биде доставен во март, велат од ЈСП Скопје

Во март во Скопје треба да пристигне прототип од вкупно 202-та двокатни автобуса што ќе ги произведува фабриката „Џенџгоу Јутонг“ од Кина. Оваа фабрика го доби тендерот дури по петтиот обид на Министерството за транспорт и врски.

- Во согласност со тендерската документација, „Јутонг“ треба да направи две возила како прототип. Едното треба да пристигне во Скопје и доколку има одредени забелешки, да се направат исправки, по што ќе почне производството, а другото за хомологација, која ќе се врши во Германија - објасни директорот на јавното сообраќајно претпријатие, Мишо Николов.

Од „Јутонг“ велат дека по потпишувањето на договорот, што се случи во средината на април годинава, инженери на оваа фабрика во два наврата ја посетиле Македонија за да се договорат за одредени детали, со цел автобусите да бидат приспособени на локалните услови.

- Во меѓувреме е финализиран дизајнот на автобусите, одобрен од надлежните во Министерството за транспорт и врски и од ЈСП. Сега се работи на прототипот кој треба да биде готов до крајот на месецов. Потоа ќе ги поканиме претставниците на Министерството во средината на октомври да дојдат во Кина и да го видат прототипот - објаснуваат од „Јутонг“.

Дополнително тестирање

За да се осигура квалитетот, прототипот ќе биде дополнително тестиран според т.н. ЕЦЕ-регулацијата, а тестирањето ќе заврши до крајот на годинава во Кина.

И од Министерството информираат дека е почната изработката на првиот примерок од двокатните автобуси. За реализацијата на склучениот договор за набавка на 202 новопроизведени двокатни автобуса за градскиот превоз во Скопје, засега надлежното Министерство исплатило 3.542.541 евра како авансна исплата на производителот на автобусите. Првата третина, односно 66 двокатни автобуси, треба да пристигнат до крајот на октомври 2011 година, 68 возила - до крајот на 2012, а останатите - до крајот на 2013 година. За 200 двокатни автобуси државата ќе плати 35 милиони евра, а двете отворени возила ќе чинат 310.000 евра, без ДДВ. Едниот од отворените двокатни автобуси што ќе бидат наменети за туристичко разгледување ќе му биде подарен на Охрид. Двокатните автобуси се со ретро-дизајн на оние што сообраќале во 50-тите и 60-тите години, имаат емисија на издувни гасови евро 5, дигитален тахограф за работа, автоматски управувана рампа за инвалидски и за детски колички и клима-уреди. Двокатните автобуси ќе имаат 60 седишта, а отворените по 63 седишта.

Украинските - во октомври

Еден од 11 нископодни украински автобуси денеска ќе оди на хомологација во Германија. Со тоа наместо во септември, најверојатно овие 11 автобуси во Скопје ќе пристигнат во октомври.

- Процесот на хомологација може да трае две недели, а може и еден месец. Откако ќе заврши хомологацијата, Бирото за метрологија треба да издаде сертификат дека тие можат да се пуштат во употреба - најави Мишо Николов, директор на ЈСП „Скопје“. Тој информира дека во петок претставници од Машинскиот факултет, од ЈСП и од Министерството за транспорт и врски повторно ќе одат во контрола на фабриката „Лавовски автобусни заводи“ (ЛАЗ) за да видат како оди производството на автобусите. Тендерот истекува во декември годинава.

ЛАЗ во декември 2009 за производство на 80 соло-автобуси понуди цена од околу 10 милиони евра, или 126.000 евра за еден нископоден автобус. Според тендерот, останатите 69 автобуси ќе бидат доставени најдоцна до февруари 2011. Првично беше најавено дека 11 соло-автобуси и 4 зглобни треба да пристигнат до 1 јуни.