Совети за аеродромите летаат со 500 евра на час

Министерството за транспорт и врски ангажира фирма од Холандија за чија правна помош за договорот за концесија на аеродромите ќе и' плаќа по 500 евра од час

По 500 евра од час за правни совети и мислења за договорот за концесија на македонските аеродроми добиваат консултанти од холандска компанија што ја ангажира Министерството за транспорт и врски. Ресорното министерство на јавен оглас ја избра фирмата „Интервистас консалтинг груп“ од Холандија, која за 120 до 150 работни часа советување ќе добие околу 74.000 евра. Грубо пресметано, за осум работни часа дневно, еден консултант ќе добива по 4.000 евра.

Договорот со холандската компанија, Министерството го склучи на 23 март годинава, а треба да заврши за шест месеци, односно до 23 септември. Според јавниот оглас, за тој период консултантите треба да даваат совети, мислења и анализи за учество во преговори и укажување на последиците од договорот за концесија на аеродромите склучен со турската компанија ТАВ. Но, останува нејасно зошто се бараат правни совети за последиците од договорот и за условите за неговото склучување откако тој е потпишан и веќе се спроведува.

Од јавниот оглас е тешко да се заклучи што конкретно ќе работат консултантите. Во описот на предметот на договорот за јавна набавка е посочено:

„Набавка на правни услуги и тоа совети, мислења, анализи (предлог-текстови, укажување на последиците и учество во преговори) потребни за договарање на главните услови и одредби на Договорот за согласност и преземање, според Договорот за концесија на аеродромите „Александар Велики“ во Скопје и „Св. Апостол Павле“ во Охрид и на нов карго-аеродром во Штип“, пишува во условите на јавната набавка.

Таму е прецизирано дека бараните услуги не се однесуваат на правна помош, односно на адвокатски услуги.

Од Министерството за транспорт и врски не добивме прецизен одговор што конкретно ќе биде задачата на ангажираната компанија. Иако инсистиравме на детали за набавката, од ресорното министерство не објаснија зошто токму сега, кога ТАВ веќе работи на аеродромите, а договорот за концесија и за преземање веќе се потпишани, им се потребни вакви услуги. Единствено добивме писмен одговор во кој е посочено:

„Правните услуги се однесуваат на Договорот за согласност и преземање кој произлегува од Договорот за концесија на аеродромскиот систем на Македонија за негова модернизација и развој. Со предметниот договор се ангажирани две лица за давање правни услуги“.

Оттаму уште дообјаснуваат дека холандската компанија „Интервистас консалтинг груп“ дала најдобра понуда на меѓународниот оглас. Според податоците објавени на интернет-страницата за јавни набавки, оваа компанија всушност била и единствен понудувач, при што понудила цена од 33.715 денари по час советување по човек.

На интернет-страницата на холандската компанија е објавено дека склучиле договор со македонската влада за услуги за постојните аеродроми.

- Бевме избрани од македонското Министерство за транспорт за да развиваме, препорачуваме и имплементираме модел на јавно-приватно партнерство за развој на аеродромите во Скопје и Охрид за период од шест месеци - пишува на страницата на „Интервистас консалтинг груп“.

Холандската компанија не е единствената што ќе му дава совети на Министерството во врска со концесискиот договор со ТАВ. Транспорт во февруари годинава по вторпат распиша јавен оглас преку кој бараше консултант кој ќе врши надзор врз спроведувањето на концесискиот договор. Според огласот, избраната компанија треба да дава консултантски, архитектонски и инженерски услуги, како и да прави технички испитувања и анализа на аеродромите во Скопје и во Охрид, но и на просторот каде што по десетина години треба да се гради карго-аеродромот во Штип. Таа консултантска компанија ќе биде ангажирана за период од две години.

(Не)транспарентен транспорт

Транспарентноста, која не ја покажува на дело, Министерството за транспорт ќе ја промовира преку скапа медиумска кампања. Ресорот неодамна ја ангажира агенцијата „Република“ за изработка на медиумска кампања тешка над 100.000 евра, преку која ќе ги уверува граѓаните дека работи транспарентно, законски и без корупција. Сево ова се прави во период кога генералната оценка на јавноста е дека ова Министерство е затворено за комуникација со медиумите, со што информациите не стасуваат и до граѓаните.

Скопскиот аеродром се уште во старо руво

сабота, 31 јули 2010, 16:29

КОМЕРЦИЈАЛНА, СТОПАНСКА И ТУТУНСКА БАНКА СЕ ПОВЛЕКОА ОД СКОПСКИОТ АЕРОДРОМ

ТАВ барал 700 евра за поставување банкомат

За трите банки тој износ бил неприфатлив зашто бил далеку повисок од 100-ината евра што ги плаќале до доаѓањето на Турците

На скопскиот аеродром "Александар Велики" ги нема банкоматите на трите македонски банки - Стопанска, Тутунска и Комерцијална банка. Сега на аеродромот има само експозитура на ИК банка, отворена пред неколку дена.
Трите банки објаснија дека причината за повлекувањето од Скопскиот аеродром е неусогласување на условите на договорот за соработка.
"Тоа не значи дека по извесно време, доколку двете страни процениме дека има место за договор, нема повторно да го вратиме банкоматот на аеродромот 'Александар Велики'", велат од Тутунска банка.
Од Стопанска банка објаснија дека ја продолжуваат добрата соработка со ТАВ и дека ќе постават банкомат кога ќе биде изградена новата аеродромска зграда, на дојдовниот терминал, зашто и досега немале многу ќар од банкомат поставен на терминалот од кој патниците заминуваат од земјава.
Од ТАВ Македонија, компанијата концесионер на аеродромот, велат дека одлуката да бидат отстранети банкоматите, ја донел менаџментот на самите банки.
"Банките не ја прифатија понудата на ТАВ да бидат продолжени договорите за соработка. Единствена банка која ја прифати понудата на ТАВ и го потпиша договорот е ИК банка. На сите банки им беа понудени исти услови и договори за соработка", изјавија од ТАВ Македонија.
Неофицијално, банките и новиот газда на аеродромот не успеале да се договорат за цената на закупот за поставувањето на банкоматите. До влегувањето на турски ТАВ во аеродромите, банките плаќале под 100 евра месечно закуп. Турците, наводно по совет на консултант, прво им побарале по 700 евра месечно, а по преговорите го преполовиле месечниот износ за закуп, но за трите банки не бил прифатлив ниту овој износ.
ИК банка, чиј мнозински акционер е "Демир-Халк банк", холандска банка во турска сопственост, обезбеди кредит од 10 милиони евра за ТАВ, како предфинансирање за реконструкцијата на аеродромите. (А.С.)

екстра таман ќе се надоврземе, секој месец рифреш...   мххх сител..