Два лава од идниот месец ќе го чуваат мостот „Гоце Делчев“

Според Тодоровиќ, финансиската криза е минато и Општината продолжува со нарачката на спомениците

Деспина Трајковска


Ако се суди според најавите на градоначалникот Владимир Тодоровиќ, двата египетски лава од четирите што се пристигнати во Скопје заедно со коњаничките скулптури на Гоце Делчев и Даме Груев, најмногу за еден и пол месец ќе почнат да го чуваат мостот „Гоце Делчев“.

Нема да ги чекаат другите два антички лава за да се постават истовремено. И скулптурите на Гоце Делчев и на Даме Груев наскоро ќе се монтираат пред Камениот мост. Во „Бетон“ привршува изработката на постаментите за скулптурите, кои од завчера, пак, се наоѓаат во халите на МЗТ. Таму наскоро се очекува да пристигнат работници од леарницата „Фердинандо Маринели“, кои имаат обврска да ги склопат пристигнатите делови, чиј транспорт, конечно, заврши завчера со пристигнувањето на последниот осми камион од пратката вредна четири милиони евра.

„Многу бргу ќе почнеме да ги правиме постаментите. Не треба многу време, мислам дека ќе се изведат во бетон за две-три недели. Облогите се мермерни, можеби ќе треба уште една-две недели две за разубавување на бетонскиот постамент“, рече градоначалникот Тодоровиќ, кој оцени дека кризната 2009 година е минато и од тие причини Општината предвидела дополнителни седум милиони евра за споменици. Со тоа, официјалната сума за изработка на споменици во централното градско подрачје се искачи на дури 17 милиони евра. „Имаше малку застој во динамиката на собирање пари. Оценивме дека кризната 2009 година ја поминавме не толку страшно и донесовме одлука да се продолжи и со другите предвидени споменици“, дополни Тодоровиќ, кој повтори дека споменикот на Александар Македонски ќе биде готов и поставен дури в година.

Инаку, едниот пар од лавовите, што веќе пристигнаа, се египетски, а пак другите што се изработуваат се' уште се во антички стил. Сите се високи пет метри и тешки речиси четири тона. Грандиозните димензии на лавовите, како што неколкупати досега оцени дел од стручната јавност, нема да ја доведе во прашање стабилноста на неколкудеценискиот мост. Коњаничките скулптури на Даме Груев и на Никола Карев, пак, се високи околу осум метри.

Овие четири споменици ја чинат Општина Центар и Владата дури четири милиони евра, не вклучувајќи ги транспортот, царината и другите давачки. Според тврдењата на градоначалникот Тодоровиќ, леењето во бронза на четирите лава изнесува 2,3 милиони евра, а леењето на скулптурите, пак, на Гоце Делчев и на Даме Груев - 850.000 евра.

http://www.utrinski.com.mk/?ItemID=6347BEE812085445A15D0FBC5E2890CF