Интензивно се реконструира охридскиот аеродром

Од ТАВ изјавуваат дека се' уште траат преговорите со Владата на Македонија за штипскиот карго-аеродром

Мики Трајковски

Охрид - Камиони и друга градежна механизација веќе десетина дена интензивно работат на реконструкција на охридскиот аеродром „Свети Апостол Павле“. Аеродромскиот комплекс е претворен во вистинска градежна зона, бидејки, според најавите од турската компанија ТАВ, работите е планирано да се завршат до крајот на март идната година.

Главниот проект-инженер за аеродромот во Охрид, Јурген Куртај од Тирана, за „Утрински весник“ вели дека охридскиот аеродром има капацитет за многу поголем број авиони. „Во текот на летниот период овде слетуваат петнаесетина авиони неделно, но со новите инвестиции, бројот на летови ќе биде далеку поголем. И бројот на патници планираме да се зголеми за двојно, па и тројно, оти аеродромот располага со таков капацитет. Со новите инвестиции ќе ја забрзаме и постапката околу обработката на багажот, а ќе го олесниме влезот и излезот на патници“, вели Куртај.

Од ТАВ се надеваат дека охридскиот аеродром во иднина ќе биде далеку поконкурентен отсега. Оттаму, очекуваат оти значаен број компании кои сега ги користат аеродромите во Тирана и во Приштина наместо таму, ќе оперираат од Охрид и обратно.

„Во план сме да воведеме и неколку нови дестинации што ги нема на аеродромот во Тирана. Со тоа голем дел од населението кое сега го користи тиранскиот или приштинскиот аеродром, а каде што летовите до одредени држави се редовни, но и поевтини од оние во Скопје, ќе ги придобиеме кај нас. Исто така, се надеваме дека нашите услуги ќе ги користат и жителите на албанските погранични градови Подградец, Корча Либраж и Пешкопеја. Нив им е многу поблиску да дојдат до Охрид отколку до Тирана. Веќе работиме на договарање нови редовни, но и сезонски линии, а голем дел од европските авиокомпании, кои засега не оперираат до Македонија, изразија подготвеност да го прават тоа откако реконструираниот аеродром ќе го пуштиме во употреба“, додава Куртај.

На аеродромот во Охрид веќе е изграден новиот паркинг-простор од 6.000 квадратни метри. Моментно се гради нов хангар со површина од 1.000 и ВИП-салон од 2.000 квадратни метри. Во тек се подготовките за реконструкција на административната зграда, а ќе се интервенира и во терминалот и карго-секторот. Од ТАВ велат дека ќе се инвестира и во пасошката контрола, а од постојните четири, аеродромот ќе добие шест коридори за контрола на пасошите. Нема да се интервенира само на аеродромската писта, бидејќи таму било интервенирано во 1996 година. Од ТАВ засега немаат податок за колку години ќе можат да ја вратат инвестицијата за охридскиот аеродром, која изнесува пет милиони евра.

Од вкупно десет аеродроми во светот со кои управува и менаџира турски ТАВ, охридскиот е најмал. Реконструкцијата на аеродромот во Охрид и неговото осовременување ќе значи нов импулс во развојот на туризмот. Слабата авионска врска со европските и светските метрополи е главна причина што туристичките работници ја посочуваат како виновник за се' помалиот број гости од година на година. Со ова, велат, долгогодишниот проблем, конечно, ќе биде минато, а нашите најголеми туристички центри Охрид и Струга ќе свртат нова страница со развојот на туризмот.

Што се однесува до изградбата на штипскиот карго-аеродром, од ТАВ за „Утрински весник“ изјавија дека се' уште траат преговорите со Владата на Македонија. Проблеми има од аспект на усогласување на начинот на менаџирање со него, а за тоа кога ќе почне и кога ќе заврши неговата изградба не можеме да кажеме, велат од компанијата. Вкупната инвестиција за модернизација на македонските воздухопловни пристаништа е проектирана на 200 милиони евра. Ревитализацијата на аеродромите „Александар Велики“ во Скопје и „Свети Апостол Павле“ во Охрид ја раководи компанијата „ТАВ констракшн“, а повеќе македонски градежни фирми се ангажирани како подизведувачи.