Возен парк (ЈСП - ЛАЗ)

ОД ЈСП СЕ КАТЕГОРИЧНИ ЗА МОЖНОСТИТЕ НА НОВИТЕ ВОЗИЛА

Новите автобуси ќе нудат квалитетен превоз

За квалитетот на автобусите и на нивните мотори гарантираат производителите, Машинскиот факултет и Бирото за метрологија

Граѓаните ќе добијат модерен и удобен превоз со новите автобуси кои ги исполнуваат сите пропишани домашни стандарди, уверуваат надлежните од ЈСП, по малите дефекти што досега се случија на новите украински и кинески возила.

Генералниот директор на ЈСП, Мишо Николов вели дека на почетокот имале проблем со украинските автобуси, но тој е надминат.

- Точно е дека тие се расипуваа, но тоа беше само на почетокот. Генерална причина за тоа е дефект на турбините, а имаше проблеми и со неколку акумулатори. Дојдоа стручњаци од украинскиот производител и веднаш ги отстранија недостатоци, односно проблематичните делови беа заменети со нови. Оттогаш повеќе нема проблем - вели Николов.

Украинските автобуси имаат мотор еуро 4, кој има двегодишна гаранција како и подвозјето, а шасијата е со пет години гаранција. Нив за време на гарантниот рок ќе ги сервисира ЈСП, а ќе продолжи и по неговото истекување. При нивната промоција беше истакнато дека се еколошки и ќе ги намалат трошоците за одржување и за гориво.

- Автобусите на ЛАЗ се со германски мотор, а германски е и менувачот. Прототип од нископодните украински автобуси беше испратен на хомологација во Германија и доби позитивно мислење, а позитивно мислење даде и Машинскиот факултет. Самото тоа кажува дека станува збор за безбедни и современи автобуси - вели Николов.

И професорот по возила на Машинскиот факултет, Милан Ќосевски неодамна даде позитивно мислење за украинските автобуси.

- Имаат современ мотор и автоматски менувач, што ги прави возила од втора генерација. Тие може да се движат со поголеми перформанси. Со сигурност знам дека новите автобуси се со врвна светска технологија и со врвна ефикасност - изјави Ќосевски.

Кинеските двокатни автобуси имаат еколошки мотори еуро 5. Станува збор за англо-американски мотори од марката „каминс“ со гаранција од две години. За тоа време овластен сервисер ќе биде „Авто Македонија“. Генералниот менаџер на „Јутонг“, Ниу Бо, при презентацијата на првиот двокатен автобус што се одржа во градот Жанг Жои, потенцираше дека автобусите се произведуваат со највисока технологија и ќе им обезбедат добри услуги на патниците.

- Хомологацијата и на првиот прототип од Кина успешно мина во Германија и на Машинскиот факултет - потенцираше Николов.

И од Бирото за метрологија се категорични во врска со квалитетот на новите автобуси:

- Штом се дозволува регистрација на возилата и имаат добиено одобрение од нас, значи ги задоволуваат актуелните хомологациски барања во Македонија, како и барањата наведени во тендерот при нивната набавка - одговорија во Бирото.

Возниот парк треба да се обнови со вкупно 217 кинески автобуси, од кои 17 се со отворен покрив, како и со 80 нископодни автобуси и 16 минибуси.

Анела Петрова