Противпожарна заштита

Авиони добивме, пилоти не

Пробниот лет на противпожарните авиони „АТ 802 А“ вчера го извршија пилоти од Шпанија бидејќи Македонија се' уште нема обучено кадар за нивно управување и сервисирање

Двајца пилоти од Шпанија вчера на аеродромот „Александар Велики“ во Скопје изведоа пробен лет со двата противпожарни авиона „ АТ 802 А“ што Македонија ги набави преку шпанската фирма „Ер трактор“. Тие двапати прелетаа над претставници од Владата, меѓу кои беше и премиерот Никола Груевски, и во лет ги испразнија резервоарите со по 3.104 литри вода, импровизирајќи гаснење на шумски пожар. Кога слетаа, пилотите извадија знамиња на Македонија и со тоа симболично им ги предадоа авионите на надлежните од Дирекцијата за заштита и спасување. Летачките трактори требаше да пристигнат во јуни годинава, но поради задоцнета исплата на долгот од зделката вредна 10,3 милиони долари, целата постапка беше одложи. Токму затоа годинава Владата, наместо договорените три авиони, набави само два. Третиот се очекува да пристигне во јануари, кога ќе се исплати долгот кон шпанската фирма.

Проблемот со исплатата е надминат со потпишување на Анекс на првичниот договор, но сега има нов проблем. Иако државата има авиони, нема кој да ги управува. Двајцата пилоти од Шпанија, кои го изведоа пробниот лет и кои ги донесоа авионите, си заминуваат од Македонија.

Тоа значи дека се' поизвесно е дека авионите ќе останат неискористени најмалку до април, до кога се очекува да бидат обучени седум пилоти, четворица механичари и двајца инженери. Изборот на кадарот се' уште не е извршен, а обуката ќе се спроведе во Шпанија, во седиштето на „Ер трактор“.

На вчерашната презентација, покрај премиерот Груевски, присуствуваа и министерот за одбрана Зоран Коњановски, директорот на Дирекцијата за заштита и спасување Шабан Салиу и претставникот на шпанската фирма, Хуго Арцео. Груевски беше задоволен од пробниот лет.

- Задоволство ми е што првпат од независноста на државата се купуваат противпожарни авиони, кои се од голема корист во летниот период. Владата го исполни ветувањето за нивна набавка, а во јануари се очекува да пристигне и третиот авион - рече Груевски.

Според премиерот, авионите во месеците во кои се очекуваат пожари ќе се користат и за набљудување, со што навреме ќе интервенираат при гаснење.

- Со купувањето на авионите ќе нема потреба Македонија да бара помош од другите држави за гасење пожари како што беше случај во минатото - објасни премиерот.

Македонските „летачки трактори“, освен за гасење пожари, ќе се користат и за воздушно запрашување и за воздушно пошумување на изгорени површини.

Авионите вчера летаа под знамето на Шпанија и со регистарски ознаки на таа земја, поради потребите од транспортот. Сега се очекува тие да бидат регистрирани во Македонија и да добијат наши регистарски ознаки. Авионите амфибии „АТ 802 А“ се произведуваат во Тексас, САД и поради нивната ниска цена од околу 3 милиони долари, им станаа сериозен конкурент на канадските „канадери“, кои се помасивни, носат двојно повеќе вода, но се речиси десетпати поскапи. (А.М.)

Турција донираше опрема за гаснење шумски пожари

Донацијата од 300.000 долари е за Министерството за земјоделство и за „Македонски шуми“

Две теренски возила и бројна опрема за гаснење шумски пожари во вредност од 300 илјади долари и' донираше Турција на нашата земја. Софистицираната опрема што ја прими Министерството за земјоделство, шумарство и водостопанство е наменета исклучиво за гаснење шумски пожари и токму затоа ќе ја користат Министерството и ЈП „Македонски шуми“.

Донираната опрема се состои од пожарникарско возило-камион и теренско возило за брза интервенција, со разновидна опрема која вклучува 20 моторни пили, 20 безжични комуникациски мобилни апарати со радиоцентрала и околу 200 парчиња различни прирачни средства за справување со огнени стихии. За борба со пламените јазици на располагање ќе имаат огноотпорни униформи, заштитни маски, шлемови, грбни прскалки за вода од 25 литри, секири, лопати, копачи, гребла, метални метли и батериски лампи.

Турското министерство за земјоделство на македонските колеги им подари на користење пожарникарско возило - камион и теренско возило за брза интервенција, кои вклучуваат комплетна опрема за гаснење пожари за 20 лица.

„Шесттонската цистерна за гаснење пожари и теренското возило со опремата одговараат на нашите шумски тешко достапни планински терени. За ракување со донираната опремата и со возилата имаме доволно стручни кадри“, рече министерот за земјоделство Љупчо Димовски.

Донацијата што ја доби македонското Министерството за земјоделство беше реализирана преку турската владина администрација за развој и соработка (ТИКА). На македонскиот министер завчера опремата симболично му ја предаде во употреба турскиот амбасадор во Република Македонија, Арслан Хакал Окчал, врачувајќи му ги клучевите од возилата. (Сн.К.)

Паланка ќе гаси пожари со британско возило