Роза Петкова


Кружниот тек на влезот во општината Ѓорче Петров, најверојатно, ќе го чека 15 март, терминот кога се пуштаат асфалтните бази за да се заврши, а од истиот датум треба да почне и изградбата на ротондата кај гимназијата „Ѓорѓи Димитров“. Застојот во градежните работи за првиот кружен тек градските власти го објаснуваат со врнежливото време поради кое се одложува првичниот рок, а не сакаат да кажат кој е новиот термин до кога се очекува крајот на изградбата. - Неповолните временски услови во текот на оваа есен значително придонесоа да се одложат предвидените термини за изградба на кружниот тек. Преголемата концентрација на влажни и на дождливи денови ги попречија финалните работи за формирање на тампонските слоеви на ротондата, а со тоа го одложија и асфалтирањето - велат од одделението за односи со јавност на Град Скопје.
Додека Градот чека да поминат врнежливите денови, граѓаните мораат да поминуваат по кал и по вирови од двете раскопани страни. Во општина Ѓорче Петров велат дека тие редовно фрлале крупен чакал на трасите, за толку што можат да го олеснат минувањето на жителите. - Работите не се целосно сопрени, туку сега се прави десната лента, во правец од Ѓорче Петров кон центарот. Ископани се двете страни, само сега не може да се асфалтира затоа што не работат асфалтните бази. Очекувам кружниот тек кај трговскиот центар „Планет“ да биде готов до крајот на март, а наредната година ќе се изградат уште две ротонди. Во првата половина на 2011 година треба да се заврши кружниот тек кај црквата „Св. Петар и Павле“ што беше договорено на последната средба на градоначалниците Сокол Митровски и Коце Трајановски. Другиот кружен тек ќе биде малку подолу, во делот каде што се сечат Македонска војска и улицата Ѓорче Петров - вели Момо Николовски, портпарол на Општина Ѓорче Петров. Според него, Општината цела година размислувала дали да стави семафори на овие две крстосници или да го реши сообраќајот со кружен тек, затоа што со изградбата на дел од булеварот Македонска војска се вози од сите страни и настанува хаос. Во Град Скопје, кои треба да бидат инвеститори и на двете ротонди на Македонска војска, велат дека засега имаат идејно решение за кружниот тек кај црквата „Св. Петар и Павле“ и веќе е во постапка изработката на изведбеното решение. Исто така, градот работи на изнаоѓање на нова локација на постојната Противпожарна бригада, која ќе се премести во непосредна близина. Жителите на општината одамна реагираат за преселбата на зградата на Противпожарна, затоа што со пробивање на булеварот овој објект пречи во прегледноста на сообраќајот.
Кружниот тек кај средното училиште „Ѓорѓи Димитров“, кој го најави општината Карпош, ќе почне да се гради напролет.
- За кружниот тек на крстосницата меѓу улиците Варшавска и Париска, Општина Карпош има обезбедено одобрение за градба, како и елаборат за привремена измена на режим на сообраќај. Од МВР имаме добиено и одобрение за привремената измена на режимот на сообраќај, меѓутоа неговата важност е дури од 15 март 2011 година кога почнува градежната сезона - вели Виолета Цветковска, портпаролка во Општината.
Горлива точка за скопјани е и крстосницата кај Католичката црква, за која одамна се ветува дека ќе се реши со кружен тек, но неа градските власти ќе ја прават заедно со проширувањето на улицата Митрополит Теодосиј Гологанов, кое се најавува за следната година.