Автопати и експресни патишта (општо)

Да не има некој слики од виадуктите на A1 од Велес до Скопје?
Барав на интернет, ама тешко да најдам.
Едино на мапа ако пребарам Езеро Младост, па у позадина еден виадукт што има, ама не е тоа тоа.
Ако има некој сликано испод виадуктите, или кај село Отовица, уште подобро.

Автопатот Тетово – Гостивар полн со дупки, ќе се проектира неговата реконструкција во 2022 година



Иако се наплаќа патарина, на автопатот Тетово – Гостивар се вози по брановиден и оштетен асфалт, кој е полн со дупки и нерамнини со кои се отежнува движењето на возилата. Делницата долга 22 километри меѓу двата града се нарекува автопат, но на одредени нејзини сегменти се вози со ограничување на брзината до 80 километри на час. Автопатот Тетово – Гостивар е најфреквентниот патен правец во земјава, со просечен годишен дневен сообраќај (ПГДС) од 16.300 возила регистрирани во 2019 година. За да се вози по нереконструираниот автопат, возачите на автомобили плаќаат 60 денари во еден правец. Во изминатиов период, со тие средства единствено се крпеа дупките во асфалтот и се санираше жичаната ограда долж трасата.

Од Јавното претпријатие за државни патишта се запознаени со проблемот и велат дека планирана е реконструкција на овој дел од патниот Коридор 8. Сепак, точни детали за периодот кога ќе отпочне реконструкцијата, како и колку средства ќе бидат потребни за претстојниот зафат, засега не можат да соопштат.

„Во моментот се работи на проектна задача за избор на експерти кои ќе изработат тендерска документација за проектирање на реконструкција со проширување на автопатот Тетово – Гостивар“, велат за „Мета.мк“ од ЈП за државни патишта.

Средствата за изработка на проектната документација во висина од 2 милиони евра е планирано да се обезбедат преку ИПА 3 фондовите на ЕУ. Покрај санацијата на постојниот коловоз, автопатот Тетово – Гостивар со претстојниот зафат ќе треба да се прошири со изведба на помошна лента за застанување во двата правци. Проектирањето на реконструкцијата и проширувањето се очекува да започне на почетокот од 2022 година.

„За реконструкција со проширување на делницата најпрво треба да се изработи проектна документација, врз основа на која ќе се избере соодветно техничко решение, од кое ќе зависи времето на реализација и потребните средства за градежни работи“, објаснуваат од ЈП за државни патишта.

Трасата меѓу Тетово и Гостивар беше првата автопатска делница од Коридорот 8 што се изгради на македонска територија. Делницата долга 22 километри се градеше со заем од Светската банка, а овој автопат беше пуштен во употреба во октомври 1996 година.

https://meta.mk/avtopatot-tetovo-gostivar-poln-so-dupki-kje-se-proektira-negovata-rekonstrukczija-vo-2022-godina

A? Wtf? Proektiranjeto kje chini 2 mil eur i kje zapochni duri vo 2022? Grebenje asfalt kje proektiraat 3 godini za 2 mil eur?

Vesti od idninata, izgleda dotogash prosechnata inzhinerska plata kje iznesuva 12 000 evra

Originally posted by Denko Ostaj toa tuku delnicite se opasni za vozenje. Vo normalna zemja dvete delnici vednas ke se stavat vo soobrakajna izolacija...

Па тоа и ми е поентата.
Делниците се категоризираат како автопат, се наплаќа патарина како за автопат, народот вози како да е на автопат, а условите по тие делници да возиш над 100 км/ч се опасни, што од самата конструкција, што од големиот број на возачи што возат дебело над ограничувањето на овие делници.

Лани се работеше на изведба, годинава ќе се пуштаат нови патишта, роковите остануваат менлива категорија

Северна Македонија годинава очекува засилен развој на патната инфраструктура и пуштање во употреба на неколку нови патишта коишто се градеа во изминатите години. И покрај вообичаените доцнења кај изведбата на проектите од цел спектар на вообичаени проблеми што лани беше надополнет со ковид-19 пандемијата, во 2021 година подобрувањето на патната инфраструктура ќе биде особено видливо во источниот дел на земјава.

Експресниот пат Штип-Кочани е новата патна делница долга 28 километри, при што годинава целата траса треба да биде пуштена во сообраќај. Првата фаза од овој експресен пат беше овозможена за користење на возачите во летото 2020 година, додека дополнителните 13,7 километри од селото Крупиште до Кочани треба да бидат завршени во 2021 година.

Веќе во првите месеци од годинава, треба да се пушти во употреба и првата фаза од експресниот пат Штип-Радовиш долга 23 километри, на потегот меѓу селото Софилари и рудникот „Бучим“. Овој инфраструктурен проект е еден од ретките патишта во земјава којшто ќе биде завршен пред зададениот рок за изведба на градежниците, а со засилено темпо се гради и втората фаза од овој пат долга 16,9 километри. Механизацијата на австриски „Страбаг“ минатата година ги почна градежните активности, при што до крајот на годинава или на почетокот на 2022 година. е планирано да се патува меѓу Штип и Радовиш по новиот пат.

Во однос на источниот дел на земјава, треба да се спомене и изведбата на патниот Коридор 8 кон Бугарија, каде што наредниве месеци од 2021 година треба да продолжи реконструкцијата на постојната и изградбата на новите делници од патот меѓу Куманово и граничниот премин Деве Баир. Државата во моментов инвестира околу 90 милиони евра во побрзо патно поврзување со Бугарија, а сите проекти треба да се завршат до 2022 година.

Меѓу нив, годинава треба да биде завршена реконструкцијата на постојниот пат од Куманово до Ранковце, со должина од 31,8 километри, кој треба да се надоврзе на веќе обновениот коловоз на патот од Ранковце до Крива Паланка. Во 2021 година треба да продолжи реконструкцијата и надградбата на постојниот пат од Крива Паланка до граничниот премин Деве Баир, кој треба да се заврши со изведба до почетокот на 2022 година. Заедно со него, до овој рок треба да се пушти во употреба и новиот експресен пат Ранковце-Крива Паланка, кој се гради во две фази долги 25 километри и каде околу половина од физичката реализација на терен досега е завршена.

За разлика од навремената реализација на патиштата на исток, развојот на патната инфраструктура во западниот дел на земјава е друга приказна. Автопатот Кичево-Охрид според актуелниот анекс на договорот за негова изградба од кинеската компанија „Синохидро“, требаше да биде завршен до 30 јуни 2021 година. Веќе е извесно дека овој рок нема да биде испочитуван од Кинезите за делницата долга 57 километри, а „Мета.мк“ информираше дека периодов се прават анализи за тоа колкав дополнителен период ќе му треба на изведувачот и подизведувачите за конечно пуштање во употреба на оваа автопатска делница.

Автопатот вреден 598 милиони евра е дел од паневропскиот Коридор 8 што минува низ земјава, а чијшто рок на изведба е сигурно дека ќе се продолжи по 30 јуни 2021 година. Досега се реализирани градежни активности на Кичево-Охрид во вредност од околу 350 милиони евра, а министерот Благоја Бочварски при презентирањето на буџетот на Министерството за транспорт и врски за 2021 година вети дека годинава ќе бидат пуштени во употреба првите 20-тина километри од овој автопат. Станува збор за трасата од Охрид кон селото Врбјани, коишто беа ветувани и лани дека ќе бидат отворени за сообраќај за возачите.

Доцнење на изведбата во западниот дел на земјава има и кај експресниот пат Градско-Прилеп, којшто се гради во три етапи. Веќе во февруари 2021 година, се очекува да биде потпишан договорот за довршување на првата фаза од овој патен правец во делот меѓу Фаришката и Дреновската клисура долг 10 километри, којшто треба да се заврши со градба најдоцна за 2 години. Досега се изградени само 35 отсто од оваа нова делница.

Со речиси идентична изведба на трасата е стигнато и на втората фаза од овој експресен пат, на потегот од Градско до Дреново, каде е завршена изведба на околу третина од вкупните градежни активности. Во 2021 година треба да продолжи изведбата и на оваа делница, но и на третата фаза од месноста Тројанци до влезот во Прилеп во должина од 7,5 километри. Она што е извесно, зададениот рок за завршување на експресниот пат Градско-Прилеп до крајот на годинава сигурно дека нема да се испочитува.

Во делот на значајните проекти од патната инфраструктура, она што се очекува од Јавното претпријатие за државни патишта во 2021 година е да ја забрза изградбата на автопатот Скопје-Блаце и да отпочне со изградба на автопатот Гостивар-Кичево. Во делот на автопатското поврзување со Косово, годинава ќе биде клучна за реализацијата на овој градежен зафат. Основниот проект за втората фаза од автопатот од селото Блаце до скопската обиколница треба да се заврши во третиот квартал од 2021 година, а до крајот на годинава да се распише и тендерот за избор на градежна компанија. Во меѓувреме, скопски „Гранит“ треба да ја забрза изградбата на првите 2 километра од граничниот премин до селото Блаце, чија што изведба беше ветувано дека ќе се финишира во текот на 2021 година.

Годинава првичната фаза од автопатот Гостивар-Кичево, трасата меѓу Кичево и селото Букојчани долга 12,7 километри, треба да почне да се гради. Од ЈП за државни патишта очекуваат дека тендерот за изградба на првата фаза ќе се распише кон средината на годинава, додека до крајот на 2021 да отпочне изведбата на градежните активности на терен.

Покрај во изградбата на нови патишта, наредните 12 месеци ќе се работи на реконструкција и осовременување на автопатот долж Коридорот 10. Во 2021 година се очекува да заврши санацијата и надградбата со трета коловозна лента на автопатот Петровец-Катланово во должина од 10 километри. Наредните месеци треба да почне изведбата и на реконструкцијата на автопатските делници Хиподром-Петровец, Миладиновци-Петровец и Миладиновци-Хиподром во Скопскиот регион.

За Коридорот 10 годинава ќе биде значајна и во поглед на распишувањето на меѓународниот тендер за изградба на комуникациско-информацискиот систем за контрола и управување на сообраќајот (Интелигентен транспортен систем), којшто треба да се објави до декември, а да се реализира следната година.
2021 година ќе биде многу важна за целосната имплементација на електронската наплата на патарини на сите автопати низ земјава. Јавното претпријатие за државни патишта во декември 2020 година го потпиша договорот со турско-македонскиот конзорциум од компанијата „Аселсан“ од Анкара и „Жикол“ од Струмица, кои треба да ја воведат електронската наплата на патарините долж Коридорот 8, но и да изградат две наплатни станици на автопатот Миладиновци-Штип и една патарина на автопатот Кичево-Охрид. Со договорот вреден 12,5 милиони евра треба да се воведе плаќање со електронски уреди на патарина на сите автопати, по примерот на развиените земји.

Севкупно земено, пред државните власти во наредните 12 месеци е исправен амбициозен план за развој на патната инфраструктура, која за волја на вистината, изминативе години доби апсолутен приоритет пред развојот на било кој друг вид инфраструктура. Ковид-19 пандемијата се очекува во 2021 да биде проблем кој сè помалку ќе се потенцира како оправдување за непредвидени доцнења на проектите, додека во поголема мерка ќе доаѓа до израз на подготвеноста и капацитетот на властите да ги спроведат крупните проекти. Овде ќе имал сè помал простор за нови оправдување за пробивање на роковите за изведба кои властите сами си ги задале.

https://meta.mk/lani-se-raboteshe-na-izvedba-godinava-kje-se-pushtaat-novi-patishta-rokovite-ostanuvaat-menliva-kategorija/

Интелигентниот транспортен систем на Коридор 10: Годинава на тендер, догодина ќе се стави во функција

Програмата за економски реформи 2021-2023 година што беше донесена на вчерашната владина седница прецизно ја утврдува динамиката за реализација на Интелигентниот транспортен систем (ИТС) на автопатот долж Коридор 10, проект за кој „Мета.мк“ веќе подолг период наназад известува. Годинава треба да се забрза практичната имплементација преку распишување на меѓународниот тендер за изведба на Интелигентниот транспортен систем (комуникациско – информациски систем за контрола и управување на сообраќајот).

Притоа, во усвоената Програма се наведува дека во 2021 година ќе се потпише договор со изведувачот на ИТС на Коридорот 10, како и договор со фирмата што ќе го врши надзорот над работите. Инсталацијата на опремата и надзорот над работите ќе започнат на крајот на 2021 година, а целокупниот проект би се завршил и би се ставил во функција во 2022 година.

Имплементацијата на ИТС треба да овозможи на автопатот од Табановце до Гевгелија да се зголеми безбедноста во сообраќајот преку воведување на контрола и информирање на возачите за временските неприлики, за застој на патот, да се контролира транспортот на опасни материи и да се мери густината на сообраќај и тежината на товарни возила.

Со проектот вреден 18,6 милиони евра на автопатот од Табановце до Гевгелија ќе се инсталираат уреди за мерење на тежина на возила во движење, метеоролошки станици – системи за давање информации за временските услови на патот и за мерење на стакленичките гасови, ќе се постават камери за видео-надзор, СОС-телефони на патот и електронска сообраќајна сигнализација за информирање на возачите за условите на патот. Притоа, сите овие параметри за состојбата на патот деноноќно ќе се мониторираат од контролниот центар на Јавното претпријатие за државни патишта.

„Најголемото влијание се очекува да биде во зголемување на безбедноста и заштеда на времето за патување. Вкупното време на патување ќе се намали како резултат на координацијата на навремениот информатички систем за корисниците на патот долж Коридорот 10. Поради раното предупредување за можни застои од страна на системот, заштедите на време преку исклучување на доцнењата ќе им овозможат на корисниците да ги намалат нивните патни трошоци и според тоа Коридор 10 ќе биде
поконкурентен за користење, особено за меѓународен транспорт. Компаниите што вршат транспортни активности ќе имаат помали трошоци и намалено време на транспорт“, се наведува во Програмата за економски реформи 2021-2023 година во делот на придобивките од воведувањето на Интелигентниот транспортен систем.

Инаку, воведувањето на овој комуникациско – информациски систем за контрола и управување на сообраќајот на Коридорот 10 се одложуваше неколку години наназад. Од Владата во вчерашното соопштение пак велат дека проектите од Програмата за економски реформи 2021-2023 година се обврска и се дел од реформите согласно евроинтеграцискиот процес, а документот треба да се достави до Европската комисија најдоцна до крајот на овој месец.

https://meta.mk/inteligentniot-transporten-sistem-na-koridor-10-godinava-na-tender-dogodina-kje-se-stavi-vo-funkczija/

Бочварски: Предвидена е изградба на нов автопат од Гостивар до Тетово

Министерот за транспорт и врски Благој Бочварски денеска изјави дека годинава ќе се започне со постапка за изработка на физибилити студија за изградба на нов автопат од Гостивар до Тетово.

При денешната посета на Тетово, тој заедно со заменик министерот за транспорт и врски Беким Реџепи остварија средба со градоначалникот на општина Тетово, Теута Арифи, на која средба се разговараше за инфраструктурни проекти во општината и регионот.

На средбата, покрај другите проекти што се реализираат во општина Тетово, министерот Бочварски потенцираше дека во програмата на ЈП за државни патишта за оваа година предвидена е изработка на студија за изградба на нов автопат од Гостивар кон Тетово.

„Бидејќи има голем број на постоечки инфраструктурни објекти на сегашната траса на патот, предвидено е тие да бидат реконструирани. Едната варијанта која се разгледува е постоечката траса да се користи од Тетово до Гостивар, а од Гостивар до Тетово да се изгради нов пат така да ќе добиеме ново модерно решение. Предвидено е оваа година да се започне со постапка за изработка на физибилити студија и некаде следната година очекувам да започне пробивање на новата траса“, изјави министерот за транспорт и врски Благој Бочварски.

Инаку, автопатот Тетово-Гостивар е најфреквентниот патен правец во државата со години наназад. По делницата долга 22 километри, се вози по брановиден и оштетен асфалт, кој е полн со дупки и нерамнини со кои се отежнува движењето на возилата. Дел од заштитната ограда повремено се оштетува, па неретко и животни претрчуваат на патот, со што се загрозува безбедноста во сообраќајот.

https://meta.mk/bochvarski-predvidena-e-izgradba-na-nov-avtopat-od-gostivar-do-tetovo/

На овој автопат секое исклучување во источен правец, на сите клучки до една како што ќе се симнеш наидуваш на железнички премин. Или некое тунелче тесно како кај Жеровјане или преку пруга. Затоа најдобро е автопатот да се проширува на источна страна меѓу постоечкиот автопат и пругата. Во новитот план добро е кај сите клучки да се продолжат надвозниците над пругата и да се спуштаат возилата после железничките премини. Исто така секој постоечки надвозник/подвозник кој не е клучка е добро да се направи клучка. Мегалоселисот, тетово-гостивар е метрополитен ареа и овој автопат е практично булевар. Секоја клучка директно кон секое село само драстично ја зголемува безбедноста низ самите села.

Годинава физибилити студија за автопатот Требениште-Струга-Ќафасан, забелешките на УНЕСКО ќе се разгледаат

Јавното претпријатие за државни патишта годинава планира да ангажира проектант за изработка на физибилити студија врз основа на идеен проект за идниот автопат Требениште-Струга-Ќафасан на патниот Коридор 8. Документацијата ќе се изготви во согласност со ФИДИК правилата за подготовка на тендерска документација за градење на вакви инфраструктурни проекти, велат за „Мета.мк“ од ЈП за државни патишта.

Од ова јавно претпријатие го добиле и го разгледале Нацрт-извештајот на УНЕСКО за состојбата со природното и културното богатство на Охридскиот регион. Тие посочуваат дека вклучените технички препораки во извештајот ќе бидат разгледани на техничко ниво и во координација со другите јавни претпријатија до кои се упатени забелешките од УНЕСКО.

Инаку, „Мета.мк“ веќе пишуваше за препораките на УНЕСКО во најновиот Нацрт-извештај, во кои се вели дека пругата, автопатот, далноводот и гасоводот меѓу Македонија и Албанија треба да одат по иста траса во Струшкиот регион, како би се избегнало загрозување на уникатниот биодиверзитет и пејсажот заштитен од УНЕСКО. Притоа, посебно внимание во овој извештај се става на идното железничко и автопатско поврзување меѓу двете земји, за кое се бара да се градат во еден тунел под планината Јабланица.

Во однос на ваквите препораки од УНЕСКО, од ЈП за државни патишта информираат дека стручните лица-проектанти и ревиденти ќе ги разгледаат техничките возможни решенија за автопатот, при што ставовите на ова претпријатие ќе се презентираат на Работната група на ниво на Влада, а конечните ставови и координирањето во однос на инфраструктурните проекти на ЈП за државни патишта, ЈП за железничка инфраструктура, МЕПСО и Национални енергетски ресурси ќе го врши Владата и Националната комисија за УНЕСКО при Министерството за култура.

Од ЈП за државни патишта информираат дека во вториот квартал од 2021 година треба да започне рехабилитацијата на постојниот патен правец од Подмоље преку Струга до граничниот премин Ќафасан, со што конечно ќе се реши проблемот со оштетениот коловоз.

Во однос на изградбата на новиот автопат кон Ќафасан, прецизни рокови нема, но најпрво ќе се чека изработката на физибилити студија и проектната документација, како и обезбедувањето на финансиски средства за овој сегмент од Коридорот 8.

Во 2018 година, под притисок на УНЕСКО, Министерството за транспорт и врски одлучи да ја сопре изградбата на автопатот Требениште-Струга за да се испитаат дополнително влијанијата врз животната средина од реализацијата на планираната траса што беше избрана со веќе изготвената проектна документација.

https://meta.mk/godinava-fizibitiliti-studija-za-avtopatot-trebenishte-struga-kjafasan-zabeleshkite-na-unesko-kje-se-razgledaat/

Што е со статијава? Обезбедени се веќе за Скопје-Блаце или не? Само за тие 2км обезбедија ли?

Инаку првпат слушам за тоа дека една делница од Гостивар-Кичево планираат да почнат, што е ок. Цела ако се тера одеднаш, веројатно уште повеќе ќе заглави со реализација и од Кичево-Охрид.

Edited by <Fresno> - 24-Feb-2021 at 00:02